ଭୁବନେଶ୍ୱର,୨୮/୦୬: ‘ସରାଇ ଆପ୍’ରେ ବିଭିନ୍ନ ହୋଟେଲର ଆଗନ୍ତୁକ ଓ ଅତିଥିଙ୍କ ତଥ୍ୟ ସଠିକ୍ ରହୁନି । ହୋଟେଲ କର୍ତ୍ତୃପକ୍ଷ ସରାଇ ଆପ୍କୁ ହେୟଜ୍ଞାନ କରୁଛନ୍ତି । ହେଲେ ଦୀର୍ଘ ବର୍ଷେ ପରେ ପୁଣି ‘ସରାଇ ଆପ୍’କୁ ମନେପକାଇଛି କମିଶନରେଟ୍ ପୁଲିସ । ଏନେଇ ବିଭିନ୍ନ ହୋଟେଲରେ ଜୋର୍ଦାର ଯାଞ୍ଚ କରିଛି ।
କିଛି ହୋଟେଲ କର୍ତ୍ତୃପକ୍ଷ ନିୟମିତ ଭାବେ ଅତିଥି ଓ ଆଗନ୍ତୁକଙ୍କ ତାଲିକା ଅପ୍ଲୋଡ୍ କରିବାରେ ବ୍ୟତିକ୍ରମ କରୁଥିବାର ଖବର ପାଇଥିଲା ପୁଲିସ । ସେସବୁ ହୋଟେଲର ଏକ ତାଲିକା ପ୍ରସ୍ତୁତ ହୋଇଥିଲା । ଏହାପରେ ଗତକାଲି ବିଳମ୍ବିତ ରାତିରେ କ୍ୟାପିଟାଲ, ଖାରବେଳ ନଗର, ସହିଦନଗର, ଭରତପୁର, ଲକ୍ଷ୍ମୀସାଗର, ଖଣ୍ଡଗିରି, ବଡ଼ଗଡ଼, ନୂଆପଲ୍ଲୀ ଥାନା ଅଞ୍ଚଳର ବିଭିନ୍ନ ହୋଟେଲ, ଲଜ୍ ଓ ଗେଷ୍ଟହାଉସ୍ରେ ପୁଲିସ ଟିମ୍ର ପାଦ ପଡିଥିଲା । ହୋଟେଲର ରେଜିଷ୍ଟର୍ ଯାଞ୍ଚ କରିବା ସହ ସିସି କ୍ୟାମେରା ଫୁଟେଜ ମଧ୍ୟ ଦେଖିଥିଲା । ପୁଲିସ ଏହାସହ ହୋଟେଲ କର୍ତ୍ତୃପକ୍ଷଙ୍କୁ ଚେତାଇଥିଲା, ସରାଇ ଆପ୍ର ଗାଇଡ୍ଲାଇନ୍କୁ କଡ଼ାକଡି଼ ଭାବେ ମାନ । ନିୟମିତ ଅତିଥିଙ୍କ ନାମ, ଠିକଣାକୁ ଅପ୍ଲୋଡ୍ କର ।
୨୦୨୧ ଅଗଷ୍ଟରେ କମିଶନରେଟ୍ ପୁଲିସ ଏହି ଆପ୍କୁ ଉନ୍ମୋଚନ କରିଥିଲା । ଏହାର ମୂଳ ଉଦ୍ଦେଶ୍ୟ ଥିଲା, ରାଜଧାନୀରେ ଡେରା ପକାଉଥିବା ଲୁଟେରା ଓ ଠକଙ୍କୁ ଠାବ କରିବା । ସନ୍ଦିଗ୍ଧଙ୍କ ଗତିବିଧି ଉପରେ ନଜର ରଖିବା । ଆପ୍ ଯୋଗୁ ବିଗତ ଦିନରେ ଏକ ଡଜନେରୁ ଅଧିକ ଲୁଟେରା ଗ୍ୟାଙ୍ଗ ଓ ଅପରାଧୀ ଧରାପଡ଼ିଛନ୍ତି । ସରାଇ ନିୟମକୁ ହୋଟେଲ କର୍ତ୍ତୃପକ୍ଷ ଫୁ' କରିଦେଇଥିବାରୁ ଏହି ଗ୍ୟାଙ୍ଗ୍ ସବୁ ରାଜଧାନୀରେ ସହଜରେ ଡେରା ପକାଇଥିଲେ । ଗତବର୍ଷ ଜୁଲାଇ ମାସରେ କମିଶନରେଟ୍ ପୁଲିସ ହୋଟେଲରେ ମାରାଥନ୍ ଯାଞ୍ଚ ଚଳାଇଥିଲା । ଏହାପରେ ଯାଞ୍ଚ ନ ହେବାରୁ ହୋଟେଲ କର୍ତ୍ତୃପକ୍ଷ ସରାଇ ଆପ୍କୁ ଭ୍ରୂକ୍ଷେପ କଲେ ନାହିଁ ।