ମୁମ୍ବାଇ ୨୮/୦୬: ସାଧାରଣ ନିର୍ବାଚନ ଫଳାଫଳ ପୂର୍ବରୁ କଙ୍ଗନା ରଣାୱତ ଏକ ସାକ୍ଷାତକାରରେ କହିଥିଲେ, ନିର୍ବାଚନ ଜିତିଲେ ସେ ଫିଲ୍ମ ଇଣ୍ଡଷ୍ଟ୍ରି ଛାଡ଼ିଦେବେ । କିନ୍ତୁ ତାଜା ରିପୋର୍ଟ ଅନୁସାରେ, କଙ୍ଗନା ସିନେ ଯାତ୍ରା ଜାରି ରଖିବେ । ତାଙ୍କର ଅତି ଘନିଷ୍ଠ ବ୍ୟକ୍ତି ଏହା ସ୍ପଷ୍ଟ କରିଛନ୍ତି । କଙ୍ଗନାଙ୍କ ଅପ୍‌କମିଙ୍ଗ ଫିଲ୍ମ ‘ଏମର୍ଜେନ୍ସି’କୁ ନେଇ ମଧ୍ୟ ସେ ଗୁରୁତ୍ୱପୂର୍ଣ୍ଣ ସୂଚନା ଦେଇଛନ୍ତି । 

ଫିଲ୍ମଟି ‘ଚନ୍ଦୁ ଚାମ୍ପିଅନ୍‌’ ସହିତ ମୁକ୍ତିଲାଭ କରିଥାନ୍ତା । କିନ୍ତୁ କଙ୍ଗନା ନିର୍ବାଚନ ଯୋଗୁ ରିଲିଜ୍‌ ପାଇଁ ତାରିଖ ଦେଇପାରିଲେ ନାହିଁ । ସଂସଦ ଅଧିବେଶନ ଶେଷ ହେବା ପରେ ଫିଲ୍ମ ରିଲିଜ୍‌ ତାରିଖ ସ୍ପଷ୍ଟ ହେବ ବୋଲି କଙ୍ଗନାଙ୍କର ବିଶ୍ୱସ୍ତ ସୂତ୍ରରୁ ଜଣାପଡ଼ିଛି । ଆସନ୍ତା ସେପ୍ଟେମ୍ବର ୬ ତାରିଖରେ ଫିଲ୍ମଟି ମୁକ୍ତିଲାଭ କରିବ । ଅପ୍‌କମିଙ୍ଗ ଫିଲ୍ମ ବିଷୟରେ କଙ୍ଗନା ଖୁବ୍‌ଶୀଘ୍ର ଘୋଷଣା କରିପାରନ୍ତି । ଚର୍ଚ୍ଚା ହେଉଛି, ଆନନ୍ଦ ଏଲ୍‌ ରାୟଙ୍କ ‘ତନୁ ୱେଡ୍‌ସ ମନୁ-୩’ ଓ ଅଲୌକିକ ଦେସାଇଙ୍କ ପୌରାଣିକ ଫିଲ୍ମ ‘ସୀତା-ଦ ଇନ୍‌କାରନେସନ୍‌’ ଭଳି ଫିଲ୍ମ ତାଙ୍କ ହାତରେ ଅଛି ।