ମୁମ୍ୱାଇ, ୨୭।୬: ଜୁଲାଇ ୧୨ରେ ବିବାହ କରିବେ ମୁକେଶ ଅମ୍ବାନୀଙ୍କ ସାନପୁଅ ଅନନ୍ତ ଅମ୍ବାନୀ ଏବଂ ରାଧିକା ମର୍ଚାଣ୍ଟ । ବିବାହ ପୂର୍ବରୁ କାର୍ଡ ବଣ୍ଟନ ଆରମ୍ଭ କରିଛନ୍ତି ଅମ୍ବାନୀ ପରିବାର । ନିକଟରେ ନୀତା ଅମ୍ବାନୀ ତାଙ୍କ ପୁଅର ବିବାହ ପାଇଁ ବାବା ବିଶ୍ୱନାଥଙ୍କୁ ନିମନ୍ତ୍ରଣ କରିବାକୁ କାଶୀ ଯାଇଥିଲେ । ଏବେ ଦେଖିବାକୁ ମିଳିଛି ଅନନ୍ତ-ରାଧିକାଙ୍କ ବିବାହ କାର୍ଡର ଏକ ଝଲକ ।
ଅନନ୍ତ–ରାଧିକାଙ୍କର ବିବାହ କାର୍ଡର ଭିଡିଓ ସ୍ମୃତି ରାକେଶ ତାଙ୍କ ଇନଷ୍ଟାଗ୍ରାମ ଷ୍ଟୋରୀରେ ସେୟାର କରିଛନ୍ତି । କାର୍ଡରେ ଅତିଥିମାନଙ୍କ ପାଇଁ ରହିଛି ଏକ ବିଶେଷ ଉପହାର । ଲାଲ୍ ବାକ୍ସରେ ରହିଛି ଭଗବାନ ଗଣେଶ, ରାଧା-କୃଷ୍ଣ ଏବଂ ମା’ ଦୁର୍ଗାଙ୍କର ସୁନାମୂର୍ତ୍ତି ଏବଂ ଏକ ରୂପାମନ୍ଦିର । ଏଥିସହିତ କାର୍ଡରେ ଏକ ରୂପାବାକ୍ସ ମଧ୍ୟ ରହିଛି ।
ବିବାହ କାର୍ଡ ଭକ୍ତି ଏବଂ ପରମ୍ପରାରେ ରହିଛି ପରିପୂର୍ଣ୍ଣ । ସେୟାର୍ ହୋଇଥିବା ଭିଡିଓରେ, ବାକ୍ସ ଖୋଲିବା ମାତ୍ରେ, ହିନ୍ଦୀର ଏକ ମନ୍ତ୍ର ବାଜୁଛି ଏବଂ କାର୍ଡରେ ବିଭିନ୍ନ କାର୍ଯ୍ୟକ୍ରମ ବିଷୟରେ ସୂଚନା ଦିଆଯାଇଛି । ଏହାବ୍ୟତୀତ କାର୍ଡରେ ଏକ ରୁମାଲ୍ ମଧ୍ୟ ଦେଖିବାକୁ ମିଳିଥିଲା । ଯେଉଁଥିରେ ଅନନ୍ତ-ରାଧିକାଙ୍କ ନାଁର ପ୍ରଥମ ଅକ୍ଷର, 'ଏ' ଏବଂ 'ଆର' ଲେଖାଯାଇଛି ।
ଗତବର୍ଷ ଅନନ୍ତ ଅମ୍ୱାନୀ ଏବଂ ରାଧିକା ମର୍ଚାଣ୍ଟଙ୍କର ନିର୍ବନ୍ଧ ହୋଇଥିଲା । ମାର୍ଚ୍ଚ ମାସରେ ଗୁଜୁରାଟର ଜାମନଗରରେ ସେମାନଙ୍କର ଗ୍ରାଣ୍ଡ ପ୍ରି-ୱେଡିଙ୍ଗ ଫଙ୍କ୍ସନ ଆୟୋଜନ କରାଯାଇଥିଲା । ପରେ ଦମ୍ପତିଙ୍କର ଦ୍ୱିତୀୟ ପ୍ରି-ୱେଡିଙ୍ଗ ଫଙ୍କ୍ସନ୍ ମେ ୨୯ରୁ ଜୁନ୍ ୨ପର୍ଯ୍ୟନ୍ତ କ୍ରୁଜରେ ହୋଇଥିଲା । ସିନେମା ଜଗତ ବ୍ୟତୀତ ବିଦେଶର ସେଲିବ୍ରିଟିମାନେ ମଧ୍ୟ ବିବାହ ପୂର୍ବରୁ ଉଭୟ ଫଙ୍କ୍ସନରେ ଯୋଗଦାନ କରିଥିଲେ ।