ମୁମ୍ବାଇ, ୨୭।୦୬: ବଲିଉଡ ଅଭିନେତା ରିଷି କପୁର। ସେ ଏବେ ଆମ ସହିତ ନାହାଁନ୍ତି। କିନ୍ତୁ ତାଙ୍କର ସ୍ମୃତି ଏବଂ ଚଳଚ୍ଚିତ୍ର ଦର୍ଶକଙ୍କ ହୃଦୟରେ ରାଜ କରିଥାଏ। | ସମୟ ଥିଲା ରିଷି କପୁରଙ୍କ ସହ କାମ କରିବାକୁ ବ୍ୟାକୁଳ ହେଉଥିଲେ ହିରୋଇନମାନେ |୮୦ ଦଶକରୁ ଏକବିଂଶ ଶତାବ୍ଦୀ ପର୍ଯ୍ୟନ୍ତ ଜଣେ କିମ୍ବା ଦୁଇଜଣ ନୁହେଁ ବରଂ ୨୦ ଜଣ ଅଭିନେତ୍ରୀ ତାଙ୍କ ସହିତ ନିଜର ଚଳଚ୍ଚିତ୍ର କ୍ୟାରିଅର ଆରମ୍ଭ କରିଛନ୍ତି | ଏହି ତାଲିକାରେ ଡିମ୍ପଲ୍ କାପାଡିଆ, ଜୟାପ୍ରଦା, ଜେବା ବଖତିଆର, ଶୋମା ଆନନ୍ଦ, ଭାବନା ଭଟ୍ଟ, ରାଧିକା ଏବଂ ରଞ୍ଜିତା କରଙ୍କ ପରି ଅନେକ ଅଭିନେତ୍ରୀ ସାମିଲ। ସମସ୍ତଙ୍କ କ୍ୟାରିୟର ହୋଇଥିଲା ସୁପରହିଟ୍ |
କିନ୍ତୁ ରିଷି କପୁରଙ୍କ ନାଁ ରେ ଅଭିଯୋଗ ଆଣିଥିଲେ ତାଙ୍କ ସହ ଡେବ୍ୟୁ କରିଥିବା ଜଣେ ଅଭିନେତ୍ରୀ । ନିଜ ଅସଫଳ କ୍ୟାରିଅର ପାଇଁ ରିଷି କପୁରଙ୍କୁ କରିଥିଲେ ଦାୟୀ । ସେ କହିଥିଲେ କି ରିଷି ତାଙ୍କ କ୍ୟାରିୟରକୁ ନଷ୍ଟ କରି ଦେଇଥିଲେ । ଯଦିଓ ଅଭିନେତ୍ରୀଙ୍କ ପ୍ରଥମ ଚଳଚ୍ଚିତ୍ର ବକ୍ସ ଅଫିସରେ ସୁପରହିଟ୍ ବୋଲି ପ୍ରମାଣିତ ହୋଇଥିଲା, କିନ୍ତୁ ରିଷିଙ୍କ ଷ୍ଟାରଡମ୍ ତୁଳନାରେ ଏହା ବହୁତ କମ ଥିଲା । ତେବେ ଘଟଣାଟି ହେଉଛି ୧୯୭୭ର । ରିଷି କପୁରଙ୍କ ସହିତ ଅଭିନେତ୍ରୀ ଏକ ବ୍ଲକବଷ୍ଟର ଫିଲ୍ମରେ ଆରମ୍ଭ କରିଥିଲେ ନିଜର କ୍ୟାରିୟର ।
୧୯୭୭ରେ ନିର୍ଦ୍ଦେଶକ ନାସିର ହୁସେନ୍ ସେ ସମୟର ସବୁଠାରୁ ଦାମୀ ଅଭିନେତା ରିଷି କପୁର ଏବଂ କାଜଲ କିରଣଙ୍କ ସହ ବ୍ଲକବଷ୍ଟର ଫିଲ୍ମ 'ହମ୍ କିସି ସେ କମ ନେହି' କରିଥିଲେ । ଏହା ଥିଲା ଅଭିନେତ୍ରୀଙ୍କର ପ୍ରଥମ ଚଳଚ୍ଚିତ୍ର । କାଜଲ ତାଙ୍କର ପ୍ରଥମ ପ୍ରୟାସରେ ସୁପରହିଟ୍ ଅଭିନେତ୍ରୀ ହୋଇଥିଲେ । କିନ୍ତୁ ଏହି ଫିଲ୍ମ ରିଲିଜ୍ ହେବା ପରେ ସେ ଆଗାମୀ ଫିଲ୍ମ ପାଇଁ ଚାହିଁ ବସିଥିଲେ । ସେ କୌଣସି ବିଶେଷ ଫିଲ୍ମ ପାଇନଥିବାରୁ ବକ୍ସ ଅଫିସରେ ଫ୍ଲପ୍ ପ୍ରମାଣିତ ହୋଇଥିଲେ ।
ଗଣମାଧ୍ୟମ ରିପୋର୍ଟ ଅନୁଯାୟୀ ,ନିଜର ଫ୍ଲପ୍ କ୍ୟାରିୟର ପାଇଁ କାଜଲ ଲଗାତର ରିଷି କପୁରଙ୍କୁ ଦାୟୀ କରିଛନ୍ତି । ସେ କହିଥିଲେ ଯେ ରିଷି କପୁରଙ୍କ ଷ୍ଟାରଡମ୍ ତାଙ୍କ କ୍ୟାରିଅରକୁ ନଷ୍ଟ କରିଦେଇଛି । ଏଥିରେ ବିବ୍ରତ ହୋଇ ପ୍ରତ୍ୟୁତ୍ତରରେ ରିଷି କହିଥିଲେ, ଡିମ୍ପଲ୍ କାପାଡିଆ ଏବଂ ଜୟାପ୍ରଦା ତାଙ୍କ ସହ ଡେବ୍ୟୁ କରିଥିଲେ ଏବଂ ସେମାନଙ୍କ କ୍ୟାରିଅର୍ ସବୁବେଳେ ସଫଳ ହୋଇଥିଲା । କାହାର ସଫଳତା କିମ୍ବା ବିଫଳତା ପାଇଁ ସେ ଦାୟୀ ନୁହନ୍ତି । ଅଭିନେତ୍ରୀ କେବଳ ଯେ ରିଷି କପୁରଙ୍କ ବିରୋଧରେ ଅଭିଯୋଗ କରିଛନ୍ତି ତା ନୁହେଁ ସେ ଫିଲ୍ମର ନିର୍ଦ୍ଦେଶକ ନାସିର ହୁସେନ୍ଙ୍କୁ ମଧ୍ୟ ବାଦ ଦେଇନଥିଲେ । ନାସିର ତାଙ୍କୁ ଠିକ୍ ଭାବରେ ପ୍ରମୋଟ୍ କରିନାହାଁନ୍ତି ବୋଲି ଅଭିନେତ୍ରୀ ଅଭିଯୋଗ କରିଥିଲେ । ତେବେ କାଜଲ କିରଣ ୧୯୯୧ରେ ୩୩ ବର୍ଷ ବୟସରେ ଫିଲ୍ମ ଜଗତରୁ ଅବସର ନେବା ପରେ ବିବାହ କରିଥିଲେ ଏବଂ ସ୍ୱାମୀଙ୍କ ସହ ନେଦରଲ୍ୟାଣ୍ଡକୁ ଚାଲି ଯାଇଥିଲେ । ସେ ଗତ ୩୦ ବର୍ଷ ଧରି ୟୁରୋପରେ ରହୁଛନ୍ତି।