ନୂଆଦିଲ୍ଲୀ,୨୪/୦୬: ଚଳିତ ବର୍ଷ ଭାରତ ଛାଡିପାରନ୍ତି ୪୩୦୦ କୋଟିପତି । ଏମାନଙ୍କ ମଧ୍ୟରୁ ଅଧିକାଂଶ ୟୁନାଇଟେଡ ଆରବ ଏମିରେଟ୍ସ (ୟୁଏଇ) ଯାଇପାରନ୍ତି । ଅନ୍ତର୍ଜାତୟ ଫାର୍ମ ହେନଲି ଆଣ୍ଡ ପାର୍ଟନର୍ସ ପକ୍ଷରୁ ଏଭଳି ଏକ ରିପୋର୍ଟ ଆସିଛି । ଅତିକମ୍ରେ୧୦ଲକ୍ଷ ଡଲାର ବା ୮.୩ କୋଟି ସମ୍ପତ୍ତି ଥିବା ଲୋକଙ୍କୁ ଏଥିରେ ସାମିଲ କରାଯାଇଛି । ଧନୀ ପଳାୟନ କ୍ଷେତ୍ରରେ ଭାରତ ତୃତୀୟ ସ୍ଥାନରେ ରହିଛି । ୨୦୨୩-୨୪ରେ ଚୀନରେ ସର୍ବାଧିକ ୧୫,୨୦୦ ଏବଂ ୟୁକେର ୯୫୦୦ କୋଟିପତି ଅନ୍ୟ ଦେଶକୁ ପଳାୟନ କରିଛନ୍ତି ।
ଭାରତ କଥା ବିଚାରକୁ ନେଲେ ଧନୀଙ୍କ ପଳାୟନ ଲଗାତାର ତୃତୀୟ ବର୍ଷ ହେବ ହ୍ରାସ ହୋଇଛି । ଗତବର୍ଷ ୫,୧୦୦ ଧନୀ ଦେଶ ଛାଡିଥିଲେ । ୨୦୨୨ରେ ୮ ହଜାର ଭାରତୀୟ ଦେଶ ଛାଡିଥିଲେ । ଚଳିତ ବର୍ଷ ସାରା ବିଶ୍ୱରେ ୧.୨୮ ଲକ୍ଷ କୋଟିପତି ନିଜ ଦେଶ ଛାଡିଛନ୍ତି । ୨୦୨୩ ତୁଳନାରେ ଏହି ସଂଖ୍ୟା ବଢ଼ିଛି । ଗତ ବର୍ଷ ଏହା ୧.୨୦ ଲକ୍ଷ ରହିଥିଲା । କରୋନା ପୂର୍ବରୁ ୨୦୧୯ରେ ଏହି ସଂଖ୍ୟା ଥିଲା ୧.୧୦ ଲକ୍ଷ ।
ଧନୀ ମାନେ ୟୁଏଇ ଏବଂ ଆମେରିକାରେ ରହିବାକୁ ସବୁଠୁ ବେଶି ପସନ୍ଦ କରୁଛନ୍ତି । ଏ କ୍ଷେତ୍ରରେ ଆମେରିକା ବେଶ କିଛି ବର୍ଷ ଧରି ଧନୀଙ୍କ ପସନ୍ଦ ରହିଥିଲା । ଏହି ଧାରାରୁ ଭାଙ୍ଗି ଦେଇଛି ୟୁଏଇ । ଚଳିତ ବର୍ଷ ୬୭୦୦ କୋଟିପତି ୟୁଏଇରେ ରହିପାରନ୍ତି । ସେହିଭଳି ଆମେରିକାରେ ୩୨୦୦ କୋଟିପତି ରହିବା ନେଇ ଆକଳନ କରାଯାଇଛି । ସିଙ୍ଗାପୁର ଏ କ୍ଷେତ୍ରରେ ପ୍ରମୁଖ ସ୍ଥାନରେ ଥିବା ବେଳେ ଏଠାରେ ୩୫୦୦ କୋଟିପତି ରହିବା ନେଇ ଅନୁମାନ କରାଯାଉଛି ।
ସେହିଭଳି କାନାଡାରେ ୩,୨୦୦, ଅଷ୍ଟ୍ରେଲିଆରେ ୨୫୦୦, ଇଟାଲିରେ ୨,୨୦୦, ସ୍ୱିଜରଲ୍ୟାଣ୍ଡ ୧୫୦୦, ଗ୍ରୀସରେ ୧୨୦୦, ପର୍ତ୍ତୁଗାଲରେ ୮୦୦, ଜାପାନରେ ୪୦୦ କୋଟିପତି ରହିପାରନ୍ତି ବୋଲି ରିପୋର୍ଟରେ କୁହାଯାଇଛି । ୨୦୨୩ରେ ୟୁଏଇରେ ସର୍ବାଧିକ ୪୭୦୦ ଧନୀ ରହିବାକୁ ଆସିଥିଲେ । ଦ୍ୱିତୀୟରେ ଅଷ୍ଟ୍ରେଲିଆ ଥିବାବେଳେ ଏଠାରେ ୪୦୦୦, ତୃତୀୟରେ ସିଙ୍ଗାପୁର ଥିବା ବେଳେ ଏଠାରେ ୩୪୦୦, ଆମେରିକାରେ ୨,୨୦୦ ଏବଂ କାନାଡାରେ ୨୧୦୦ କୋଟିପତି ଏହି ଅବଧିରେ ବସବାସ ପାଇଁ ଆସିଥିଲେ । ୟୁଏଇରେ ଟିକସ କ୍ଷେତ୍ରରେ ମିଳୁଥିବା ରିହାତି ଏବଂ ବାଣିଜ୍ୟ ସୁଗମତା ଦୃଷ୍ଟିକୋଣରୁ ଧନୀଙ୍କର ପସନ୍ଦର ଦେଶ ଭାବେ ଉଭା ହୋଇଛି । ଦୁବାଇରେ ଧନୀଙ୍କୁ କୌଣସି ଆୟକର ଦେବାକୁ ପଡିନ ଥାଏ । ସେହିଭଳି ଶିଳ୍ପପତିଙ୍କ ଲାଗି ଏଠାରେ ସୁବିଧାଜନକ ଟିକସ ଢ଼ାଞ୍ଚା ଏବଂ ଆଇନ ବ୍ୟବସ୍ଥା ରହିଛି । ଏଭଳି ପ୍ରମୁଖ କାରଣ ଯୋଗୁ ଦୁବାଇକୁ ସାରା ବିଶ୍ୱର ଧନୀ ଟାଣି ହୋଇ ଯାଉଛନ୍ତି । ଯଦି ଭାରତୀୟଙ୍କ କଥା ବିଚାରକୁ ନିଆଯାଏ ୨୦୧୩ରୁ ୨୦୨୩ ମଧ୍ୟରେ ୟୁଏଇ ଯାଉଥିବା ଲୋକଙ୍କ ସଂଖ୍ୟାରେ ୮୫% ବୃଦ୍ଧି ହୋଇଛି ।
ଧନୀଙ୍କ ପଳାୟନ କୌଣସି ଦେଶ ପାଇଁ ଭଲ ବୋଲି ବିଚାର କରାଯାଇ ନଥାଏ । ତେବେ ଭାରତ କ୍ଷେତ୍ରରେ ଏହା ଭିନ୍ନ ରହିଛି । ଭାରତୀୟ ମାନେ ବିଦେଶ ଗଲେ ମଧ୍ୟ ନିଜ କାରବାର ଏବଂ ଅସ୍ଥାବର ସମ୍ପତ୍ତି ଦେଶ ମଧ୍ୟରେ ଛାଡି ଯାଉଛନ୍ତି । ଅଲଗା ଦେଶରେ ରହିଲେ ମଧ୍ୟ ଭାରତରେ ଘର ଏବଂ ଏଠାରେ କାରବାର କରିବାକୁ ଭାରତୀୟ ଇଛା ପ୍ରକଟ କରୁଛନ୍ତି । ଭାରତରେ ଯେତେ କୋଟିପତି ବାହାରକୁ ଯାଉଛନ୍ତି ସେହି ଅନୁପାତରେ କୋଟିପତି ମଧ୍ୟ ତିଆରି ହେଉଛନ୍ତି । ଦେଶରେ ୩.୨୬ ଲକ୍ଷ କୋଟିପତି ଏବଂ ୧୨୦ ଅରବପତି ରହିଛନ୍ତି । କୋଟିପତି ଲୋକଙ୍କ କ୍ଷେତ୍ରରେ ଭାରତ ବିଶ୍ୱରେ ୧୦ମ ସ୍ଥାନରେ ରହିଛି । ଦେଶରେ ୧୦୪୪ ଲୋକ ଅଛନ୍ତି ଯେଉଁ ମାନଙ୍କ ପାଖରେ ୧୦୦ ନିୟୁତ ଡଲାର ସମ୍ପତ୍ତି ରହିଛି । ଏ କ୍ଷେତ୍ରରେ ଭାରତ ୪ର୍ଥ ସ୍ଥାନରେ ରହିଛି।
