ନୂଆଦିଲ୍ଲୀ,୦୬/୦୬: ଲୋକସଭା ନିର୍ବାଚନ ଫଳାଫଳ ପ୍ରକାଶ ପାଇସାରିଛି । ଗଠନ ହେବାକୁ ଯାଉଛି ନୂଆ ସରକାର । ନୂଆ ସରକାରଙ୍କ ଆଗରେ ରହିବ ଅନେକ ପ୍ରମୁଖ ନୀତିଗତ ସମସ୍ୟା । ଏହାମଧ୍ୟରେ ରହିଛି ବେକାରି ମୁକାବିଲା, ଜିଏସ୍ଟି ବ୍ୟବସ୍ଥାରେ ସୁଧାର, ଦରଦାମ ବୃଦ୍ଧି, ପବ୍ଲିକ୍ ଫାଇନାନ୍ସ ଏବଂ ନିବେଶ । ସରକାରଙ୍କୁ ଅନେକ ଆହ୍ୱାନର ସାମ୍ନା କରିବାକୁ ପଡ଼ିବ ।
ପ୍ରଥମେ ଭୁ-ରାଜନୈତିକ ଅନିଶ୍ଚିତତା ଏବଂ ବିଶ୍ୱ ଆର୍ଥିକ ସମସ୍ୟାଗୁଡ଼ିକ ମଧ୍ୟରେ ଦେଶରେ ଦ୍ରୁତ ସୁଧାର ଆଣିବାକୁ ପଡ଼ିବ । ତେବେ କେନ୍ଦ୍ରରେ ମେଣ୍ଟ ସରକାର ହେବା ଦ୍ୱାରା ଏହା ସହଜ ହୋଇ ନ ପାରେ । ଘରୋଇକରଣ ଏବଂ ଜିଏସ୍ଟି ଉପରେ ପୁନର୍ବିଚାର ଭଳି କେତେକ ପ୍ରସଙ୍ଗକୁ ନେଇ ସହମତିର ଆବଶ୍ୟକ ପଡ଼ିବ । ନୂଆ ସରକାରଙ୍କ ଆଗରେ ରହିବ ଏଭଳି ଅନେକ ଚ୍ୟାଲେଞ୍ଜ୍ ।
୫ ସ୍ଲାବ୍ଯୁକ୍ତ ଜିଏସ୍ଟି ହାର ଢ଼ାଞ୍ଚାକୁ ନେଇ ତୁରନ୍ତ ସମୀକ୍ଷା କରାଯାଇପାରିବ ନାହିଁ । ଏଥିପାଇଁ ୧୨% ଏବଂ ୧୮% ସ୍ଲାବ୍କୁ ମିଶାଇବାର ଆବଶ୍ୟକତା ପଡ଼ିବ, ଯାହାଦ୍ୱାରା ଉପର ବାସ୍କେଟ୍ରେ ଆସୁଥିବା ସାମଗ୍ରୀ ଏବଂ ସେବା ଶୁଳ୍କରେ ବୃଦ୍ଧି ଲୋଡ଼ା । ଏହା ଏଭଳି ଏକ ପ୍ରସଙ୍ଗ ଯାହା ଉପରେ ରାଜନୈତିକ ସହମତି ଆଣିବା ସହଜ ହୋଇ ନ ପାରେ ।
ଘରୋଇକରଣ ଯୋଜନାକୁ କିଛି ସମୟ ପାଇଁ ସ୍ଥଗିତ ରଖାଯାଇପାରେ । ଭାରତୀୟ ରିଜର୍ଭ ବ୍ୟାଙ୍କର ୨.୧ ଲକ୍ଷ କୋଟିର ମେଗା ଲାଭାଂଶ ଏବଂ ମଜଭୁତ ଜିଏସ୍ଟି ରାଜସ୍ୱ ଦ୍ୱାରା କେନ୍ଦ୍ରର ଆର୍ଥିକ ସ୍ଥିତି ଭଲ ରହିବ । ତେଣୁ ଘରୋଇକରଣ ଉପରେ ସେତେଟା ନିର୍ଭର କରିବାକୁ ପଡ଼ି ନ ପାରେ ।
୨୦୨୧-୨୨ରେ ୮୫୦୦ କୋଟି ଡଲାରର ଉଚ୍ଚ ସ୍ତରରେ ପହଞ୍ଚିବା ପରେ ଲଗାତର ଦୁଇ ବର୍ଷ ହେବ ପ୍ରତ୍ୟକ୍ଷ ବିଦେଶୀ ପୁଞ୍ଜିନିବେଶ(ଏଫ୍ଡିଆଇ)ରେ ହ୍ରାସ ଘଟୁଛି । ଏହା ୨୦୨୩-୨୪ରେ ୭୧୦୦ କୋଟି ଡଲାର ରହିଛି । ନିବେଶ ଟାଣିବା ପାଇଁ ସରକାରଙ୍କୁ ଅନେକ କାର୍ଯ୍ୟ କରିବାକୁ ପଡ଼ିବ । ନୂଆ ସରକାର ଇଲେକ୍ଟ୍ରିକ୍ ଯାନ ଏବଂ ଆର୍ଟିଫିସିଆଲ ଇଣ୍ଟେଲିଜେନ୍ସ ସହିତ ଅନେକ କ୍ଷେତ୍ରରେ ନିବେଶ ବ୍ୟବସ୍ଥାକୁ ଆହୁରି ଆକର୍ଷକ କରିବା ନେଇ ଆଶା ରହିଛି ।
ଉତ୍ପାଦନ ସଂଯୁକ୍ତ ପ୍ରୋତ୍ସାହନ(ପିଏଲ୍ଆଇ) ଯୋଜନା ଦ୍ୱାରା ସ୍ମାର୍ଟଫୋନ୍ ଏବଂ ଅନ୍ୟ ଉତ୍ପାଦର ରପ୍ତାନିକୁ ପ୍ରୋତ୍ସାହନ ମିଳିଛି କିନ୍ତୁ ଏହାକୁ ଖେଳନା ଏବଂ ଜୋତା ଭଳି ଅନ୍ୟ କ୍ଷେତ୍ରକୁ ସମ୍ପ୍ରସାରଣ କରିବା ପାଇଁ ଦାବି ହେଉଛି । ଦେଶରେ ଉତ୍ପାଦନକୁ ବଢ଼ାଇବା ଲାଗି ପିଏଲ୍ଆଇ ସ୍କିମ୍କୁ ଅଧିକ ମଜଭୁତ କରିବାକୁ ପଡ଼ିବ ।
ଅଧିକାଂଶ ଅର୍ଥନୀତିଜ୍ଞ କହିଛନ୍ତି ଯେ, ୨୦୨୩- ୨୪ ଭଳି ୨୦୨୪-୨୫ରେ ଜିଡିପି ଅଭିବୃଦ୍ଧି ୮.୨% ରହିବ ବୋଲି କହିହେବ ନାହିଁ । ବର୍ତ୍ତମାନ ପରିସ୍ଥିତିରେ ୭% ଅଭିବୃଦ୍ଧି ହାରକୁ ସୁନିଶ୍ଚିତ କରିବା ବି ସହଜ ହେବ ନାହିଁ । ଅର୍ଥ ମନ୍ତ୍ରାଳୟ ବିଶିଷ୍ଟ ଲକ୍ଷ୍ୟଗୁଡ଼ିକ ସହ କାର୍ଯ୍ୟ କରିବା ପାଇଁ ଯୋଜନା ପ୍ରସ୍ତୁତ କରିଛି । ଯଦି ନୂଆ ସରକାରରେ ଏହି ଯୋଜନାଗୁଡ଼ିକୁ ସହମତି ମିଳେ ତେବେ ମନ୍ତ୍ରାଳୟର ଏହି ଯୋଜନାଗୁଡ଼ିକୁ ଅନାବରଣ କରାଯିବ ।