ଭୁବନେଶ୍ୱର,୨୫ ।୩(ବ୍ୟୁରୋ): ସ୍କୁଲ ପିଲାଙ୍କୁ ଏଣିକି ଅତିରିକ୍ତ ଗୋଟିଏ ଅଣ୍ଡା ମିଳିବ । ପ୍ରଧାନମନ୍ତ୍ରୀ ପୋଷଣ କାର୍ଯ୍ୟକ୍ରମ ଅନ୍ତର୍ଗତ ପୂର୍ବରୁ ସପ୍ତାହକରେ ଜଣେ ପିଲାଙ୍କୁ ୩ଟି ଅଣ୍ଡା ମିଳୁଥିବା ବେଳେ ଏବେ ଆଉ ଗୋଟିଏ ଅଧିକ ମିଳିବ । ଏଥିପାଇଁ ରାଜ୍ୟ ସରକାର ବର୍ଷକୁ ୩୭୨.୮୦ କୋଟି ଟଙ୍କା ଖର୍ଚ୍ଚ କରିବେ । ଆସନ୍ତା ଶିକ୍ଷାବର୍ଷରୁ ଏହା ଲାଗୁ ହେବ ।
ଏନେଇ ବିଦ୍ୟାଳୟ ଓ ଗଣଶିକ୍ଷା ବିଭାଗର ଅତିରିକ୍ତ ସଚିବ ଏସକେ ମହାପାତ୍ର ପିଏମ ପୋଷଣ କାର୍ଯ୍ୟକ୍ରମର ଷ୍ଟେଟ୍ ନୋଡାଲ ଅଫିସରଙ୍କୁ ଚିଠି ଲେଖିଛନ୍ତି । ଚିଠିରେ ଉଲ୍ଲେଖ ରହିଛି, ପିଏମ ପୋଷଣ ଅଧୀନରେ ପିଲାଙ୍କ ଶରୀରରେ ପୋଷଣର ମାତ୍ରା ବଢ଼ାଇବା ହେଉଛି ପ୍ରମୁଖ ଲକ୍ଷ୍ୟ । ଅଣ୍ଡାରେ ପୁଷ୍ଟିସାର ସହ ଲୌହମାତ୍ରା ରହିଛି । ପ୍ରାଥମିକସ୍ତରରେ ପ୍ରଥମରୁ ଅଷ୍ଟମ ଓ ମାଧ୍ୟମିକସ୍ତରରେ ନବମ ଓ ଦଶମ ଶ୍ରେଣୀ ପିଲାଙ୍କ ପାଇଁ ଏହା ଲାଗୁ କରାଯିବ ।
