ବଲାଙ୍ଗିର/ବୁର୍ଲା, ୨୬/୦୩ : ସ୍ପେଶାଲ ଟାସ୍କ ଫୋର୍ସ (ଏସ୍ଟିଏଫ୍) ପଞ୍ଝାରୁ ବର୍ତ୍ତିବାକୁ ବ୍ରିଜ୍ ଉପରୁ ତଳକୁ ଡେଇଁପଡ଼ିଲା । ଭାଙ୍ଗିଗଲା ଗୋଡ଼ହାତ । ମୁଣ୍ଡରେ ଲାଗିଲା ଗଭୀର ଆଘାତ । ଡାକ୍ତରଖାନାରେ ଚିକିତ୍ସାଧୀନ ଅବସ୍ଥାରେ ଚାଲିଗଲା ଜୀବନ । ସୋନପୁର ଜିଲ୍ଲା ଖାରୀ ନଦୀ ନିକଟରେ ଘଟିଛି ଏଭଳି ଅଭାବନୀୟ ଘଟଣା । ମୃତକ ହେଲେ ଛତିଶଗଡ଼ ରାଜ୍ୟ ବିଳାସପୁର ଅଞ୍ଚଳର ଶୁଭମ ଯାଦବ ଓରଫ୍ ଦିଲ୍ଲୀପ (୩୦ ବର୍ଷ) । ଅନ୍ୟତମ ସହଯୋଗୀକୁ ପୁଲିସ୍ କାବୁ କରିଛି । ଚାଲାଣ ହେଉଥିବା ଗଞ୍ଜେଇ ଭର୍ତ୍ତି ଗାଡ଼ିକୁ ଜବତ କରାଯାଇଛି ।
ବୌଦ୍ଧ ଜିଲ୍ଲା କଣ୍ଟାମାଳ ଅଞ୍ଚଳରୁ ଛତିଶଗଡ଼କୁ ଏକ ଗାଡ଼ିରେ ବିପୁଳ ପରିମାଣର ଗଞ୍ଜେଇ ଚୋରାଚାଲାଣ ହେଉଥିବା ସୂଚନା ପାଇଥିଲା ଏସ୍ଟିଏଫ୍। ଗାଡ଼ିକୁ ଧରିବାକୁ ପିଛା କରିଥିଲେ ବିଭାଗୀୟ କର୍ମଚାରୀ । ଏହି ସମୟରେ ଗଞ୍ଜେଇ ମାଫିଆ ଦିଲ୍ଲୀପ ଗାଡ଼ି ଛାଡ଼ି ଖାରୀ ନଦୀ ବ୍ରିଜ୍ରୁ ତଳକୁ ଡେଇଁ ପଡ଼ିଥିଲା । ନଦୀରେ ପାଣି ନ ଥିବାରୁ ତା’ର ଗୋଡ଼ହାତ ଭାଙ୍ଗି ଯାଇଥିଲା । ମୁଣ୍ଡରେ ଗଭୀର ଆଘାତ ଲାଗିଥିଲା । ମୁମୁର୍ଷୁ ଅବସ୍ଥାରେ ତାକୁ ଉଦ୍ଧାର କରି ଚିକିତ୍ସା ପାଇଁ ପ୍ରଥମେ ବଲାଙ୍ଗିର ପରେ ବୁର୍ଲା ସ୍ଥାନାନ୍ତର କରାଯାଇଥିଲା । ଚିକିତ୍ସାଧୀନ ଅବସ୍ଥାରେ ମଙ୍ଗଳବାର ଦିଲ୍ଲୀପର ମୃତ୍ୟୁ ହୋଇଯାଇଥିଲା । ରାତିରେ ମୃତକଙ୍କ ପରିବାର ସଦସ୍ୟ ହସ୍ପିଟାଲରେ ପହଞ୍ଚିଥିଲେ । ବୁଧବାର ମୃତଦେହ ବ୍ୟବଚ୍ଛେଦ ପରେ ହସ୍ତାନ୍ତର କରାଯିବ ବୋଲି ଜଣାପଡିଛି ।
ଏହି ଖବରଟିକୁ ପଢନ୍ତୁ-୧୨ କଂଗ୍ରେସ ବିଧାୟକଙ୍କୁ ନିଲମ୍ବନ ଘଟଣା: ଗାନ୍ଧି ମାର୍ଗରେ ଯୁବ କଂଗ୍ରେସର ପ୍ରତିବାଦ, ୨୭ରେ ଘେରିବେ ବିଧାନସଭା
