ଭୁବନେଶ୍ୱର,୨୬/୦୩: ବିଧାନସଭାରେ ୧୨ଜଣ କଂଗ୍ରେସ ବିଧାୟକଙ୍କୁ ନିଲମ୍ବନ ଘଟଣାକୁ ତୀବ୍ର ସମାଲୋଚନା କରିଛି ଯୁବ କଂଗ୍ରେସ । ମଙ୍ଗଳବାର ରାତିରେ ଯୁବ କଂଗ୍ରେସର କର୍ମକର୍ତ୍ତାମାନେ ରାସ୍ତାକୁ ଓହ୍ଲାଇ ଗାନ୍ଧି ମାର୍ଗରେ ବିକ୍ଷୋଭ ପ୍ରଦର୍ଶନ କରିଥିଲେ । ରାତିସାରି ରାଜରାସ୍ତାରେ ଧାରଣା ଦେଇଥିଲେ ବିଧାୟକ । ଏଥିସହ ମୁଖ୍ୟମନ୍ତ୍ରୀଙ୍କ କୁଶପୁତ୍ତଳିକା ଦାହ କରାଯାଇଥିଲା । ତୁରନ୍ତ ସରକାର ବିଧାୟକଙ୍କ ଉପରୁ ନିଲମ୍ବନ ଆଦେଶ ପ୍ରତ୍ୟାହାର କରିବାକୁ ସେମାନେ ଦାବି କରିଥିଲେ ।
ରାଜ୍ୟରେ ନାରୀଙ୍କ ସମ୍ମାନ ଓ ସୁରକ୍ଷା ପାଇଁ ୨୭ରେ କଂଗ୍ରେସ ବିଧାନସଭା ଘେରିବ । ଏହି ପ୍ରତିବାଦ କାର୍ଯ୍ୟକ୍ରମକୁ ସଫଳ କରିବାକୁ ସମସ୍ତଙ୍କ ସହଯୋଗ ଲୋଡିଛି କଂଗ୍ରେସ । ପିସିସି ସଭାପତି ଭକ୍ତଚରଣ ଦାସ ଏକ ଭିଡିଓ ବାର୍ତ୍ତା ଜାରି କରି ସମସ୍ତଙ୍କୁ ଏକଜୁଟ ହେବାକୁ ନିବେଦନ କରିଛନ୍ତି । ସେ କହିଛନ୍ତି, ଏ ଲଢେଇ ନାରୀଙ୍କ ପାଇଁ । ବାରମ୍ବାର ନାରୀ ଓ ଶିଶୁ ନିଖୋଜ ହେଉଛନ୍ତି । ବିଗତବର୍ଷମାନଙ୍କରେ ୪୪ହଜାର ୮୨୩ ମହିଳା ନିଖୋଜ ଥିବା ବେଳେ ସେଥିମଧ୍ୟରୁ ୮ହଜାର ଶିଶୁ ନିଖୋଜ ରହିଛନ୍ତି । ରାଜ୍ୟରେ ଆଇନଶୃଙ୍ଖଳା ପରିସ୍ଥିତି ବିଗିଡିଯାଇଛି ।
ରାଜ୍ୟରେ ଡବଲ ଇଂଜିନ ସରକାର ଥିବା ବେଳେ ୧୬ଶହ ମହିଳାଙ୍କୁ ନିର୍ଯ୍ୟାତନା ଓ ୫୪ ମହିଳାଙ୍କୁ ବଳାତ୍କାର କରାଯାଇଛି । ତଥାପି ସରକାର ନିରବ । ଏବେ କଂଗ୍ରେସ ଏହି ପ୍ରସଙ୍ଗ ଉଠାଇଛି । ଏପର୍ଯ୍ୟନ୍ତ ରାଜ୍ୟ ସରକାର ବିଧାନସଭାରେ ଗୃହ କମିଟି ତିଆରି କରିପାରିନାହାନ୍ତି । ସର୍ବଦଳ ନେତାଙ୍କୁ ନେଇ କମିଟି କଲେ ସେମାନେ ବିଭିନ୍ନ ଘଟଣାର ଅନୁଧ୍ୟାନ କରବେ ବୋଲି କଂଗ୍ରେସ ଦାବି କରୁଛି । କ୍ଷୋଭର କଥା, ବିଜେଡି ମଧ୍ୟ ଏ ପ୍ରସଙ୍ଗକୁ ସମର୍ଥନ କରୁନି । ଏହା ଦୁଃଖର କଥା । ତେଣୁ ମହିଳାଙ୍କ ସୁରକ୍ଷା ପାଇଁ କଂଗ୍ରେସ ଲଢୁଛି, ଲଢିଚାଲିବ । ଏଥିରେ କୃଷକ, ଛାତ୍ର, ମହିଳା, ଆଦିବାସୀ ତଥା ସମସ୍ତ ରାଜ୍ୟବାସୀଙ୍କ ସହଯୋଗ ଦରକାର ବୋଲି ଭକ୍ତ କହିଛନ୍ତି । ଯଦି ବିରୋଧୀ ଦଳର ନେତୃବୃନ୍ଦ ଚାହିଁବେ ସେମାନେ ମଧ୍ୟ ଆନ୍ଦୋଳନରେ ଯୋଗଦେଇପାରିବେ ବୋଲି ସେ କହିଛନ୍ତି । ମଙ୍ଗଳବାର ଏଆଇସିସି ସାମାଜିକ ଗଣମାଧ୍ୟମ ବିଭାଗର ଅଧ୍ୟକ୍ଷା ତଥା ଜାତୀୟ କଂଗ୍ରେସ ମୁଖପାତ୍ର ସୁପ୍ରିୟା ସ୍ରିନେତ୍ ଏବଂ ଓଡିଶା ସାମାଜିକ ଗଣମାଧ୍ୟମ ଏଆଇସିସି ପ୍ରଭାରୀ ସୁମିତ୍ ଦୁବେ ଓଡ଼ିଶା ଗସ୍ତରେ ଆସିଛନ୍ତି । ଏ ଅବସରରେ ସୁପ୍ରିୟା ପିସିସି ସଭାପତି ଭକ୍ତଙ୍କୁ ଭେଟିଥିଲେ । ରାଜ୍ୟରେ ବୃଦ୍ଧି ପାଉଥିବା ଏବଂ ପ୍ରତିଦିନ ମହିଳା ଓ ଛାତ୍ରଛାତ୍ରୀ ମାନଙ୍କ ପ୍ରତି ହେଉଥିବା ନିର୍ଯାତନା ସମ୍ପର୍କରେ ଭକ୍ତଙ୍କ ସହ ଆଲୋଚନା କରି ୨୭ରେ ହେବାକୁ ଥିବା ଆନ୍ଦୋଳନକୁ ସଫଳ କରିବାକୁ କହିଥିଲେ ।
