ମୁମ୍ବାଇ, ୨୬/୦୩: ଦିଶା ସାଲିଆନଙ୍କ ମୃତ୍ୟୁ ମାମଲାରେ ମଙ୍ଗଳବାର ଶିବସେନା (ୟୁବିଟି) ନେତା ଆଦିତ୍ୟ ଠାକ୍ରେ, ବଲିଉଡ୍ ଅଭିନେତ୍ରୀ ରିୟା ଚକ୍ରବର୍ତ୍ତୀ, ଡିନୋ ମୋରେଆ, ସୁରଜ ପଞ୍ଚୋଲି ଓ ଅନ୍ୟମାନଙ୍କ ବିରୋଧରେ ଏଫ୍ଆଇଆର୍ ହୋଇଛି । ଦିଶାଙ୍କ ପିତା ସତୀଶ ସାଲିଆନଙ୍କ ତରଫରୁ ତାଙ୍କ ଓକିଲ ଏହି ଏଫ୍ଆଇଆର୍ କରିଛନ୍ତି । ସତୀଶଙ୍କ ପକ୍ଷରୁ ମୁମ୍ବାଇ ପୁଲିସ କମିଶନରଙ୍କୁ ଅଭିଯୋଗ ପତ୍ର ଦିଆଯାଇଛି । ଏଥିରେ ସେ ଆଦିତ୍ୟ ଠାକ୍ରେଙ୍କୁ ଅଭିଯୁକ୍ତ ଦର୍ଶାଇବା ସହ ତାଙ୍କୁ ବଞ୍ଚାଇବାକୁ ଉଦ୍ୟମ ହୋଇଥିବା କହିଛନ୍ତି ।
ସେହିଭଳି ଅଭିନେତା ଡିନୋ ମୋରେଆ, ସୁରଜ ପଞ୍ଚୋଲି, ତାଙ୍କ ଅଙ୍ଗରକ୍ଷୀ ପରମବୀର ସିଂହ, ସଚିନ ୱାଜେ ଓ ଅଭିନେତ୍ରୀ ରିୟା ଚକ୍ରବର୍ତ୍ତୀଙ୍କୁ ମଧ୍ୟ ଅଭିଯୁକ୍ତ ଦର୍ଶାଇଛନ୍ତି ସତୀଶ । ସତୀଶଙ୍କ ଅଭିଯୋଗପତ୍ରକୁ ଆଧାର କରି ତାଙ୍କ ଓକିଲ ନୀଲେଶ ଓଝା କହିଛନ୍ତି, ପରମବୀର ସିଂହ ଏହି ମାମଲାକୁ ଲୁଚାଇବା ପାଇଁ ମାଷ୍ଟରମାଇଣ୍ଡ ଭାବେ କାର୍ଯ୍ୟ କରିଛନ୍ତି । ସେ ଆଦିତ୍ୟ ଠାକ୍ରେଙ୍କୁ ସୁରକ୍ଷା ଦେବା ଲାଗି ଏକ ସାମ୍ବାଦିକ ସମ୍ମିଳନୀରେ ମିଛ କହିଛନ୍ତି । ଏନ୍ସିବି ତଦନ୍ତ ରିପୋର୍ଟରେ ମଧ୍ୟ ଏହା ସ୍ପଷ୍ଟ ହୋଇଛି ଯେ ଆଦିତ୍ୟ ନିଶା କାରବାରରେ ସାମିଲ ଥିଲେ । ଦିଶା ଅଭିନେତା ସୁଶାନ୍ତ ସିଂହ ରାଜପୁତଙ୍କ ପୂର୍ବତନ ମ୍ୟାନେଜର ଥିଲେ । ସୁଶାନ୍ତଙ୍କ ମୃତ୍ୟୁର ଏକ ସପ୍ତାହ ପୂର୍ବରୁ ତାଙ୍କର ମୃତ୍ୟୁ ଘଟିଥିଲା ।
