ଭୁବନେଶ୍ଵର, ୦୧/୦୭ : ରେଳଯାତ୍ରୀଙ୍କ ପାଇଁ ଖୁସି ଖବର। ଲଞ୍ଚ୍ ହେଲା ରେଲୱେର ସୁପର ଆପ୍। ଗୋଟିଏ ପ୍ଲାଟଫର୍ମରେ ଯାତ୍ରୀଙ୍କୁ ମିଳିବ ସମସ୍ତ ସୁବିଧା। ଜୁଲାଇ ୧ରୁ ନୂଆ ରେଲ୍ ୱାନ୍ ଆପ୍ ଲଞ୍ଚ୍ ହୋଇଛି। ସେଣ୍ଟର ଫର୍ ରେଲୱେ ଇନଫରମେସନ ସିଷ୍ଟମ (CRIS) ଏହି ନୂଆ ଆପ୍କୁ ତିଆରି କରିଛି। CRISର ୪୦ତମ ପ୍ରତିଷ୍ଠା ଦିବସ ସମାରୋହରେ ରେଳ ମନ୍ତ୍ରୀ ଅଶ୍ଵିନୀ ବୈଷ୍ଣବ ରେଲ୍ ୱାନ୍ ଆପ୍ର ଶୁଭାରମ୍ଭ କରିଛନ୍ତି।
ଏବେ ଅଲଗା ଅଲଗା ଆପ୍ ଡାଉନ୍ଲୋଡ୍ କରିବାକୁ ପଡ଼ିବନି। ଏହି ଆପ୍ ଆଣ୍ଡ୍ରଏଡ୍ ପ୍ଲେ ଷ୍ଟୋର୍ ଏବଂ ଆପ୍ ଷ୍ଟୋର୍ରେ ଉପଲବ୍ଧ ରହିଛି। ଏହି ଆପ୍ର ଏକ ସ୍ଵତନ୍ତ୍ର ସୁବିଧା ହେଉଛି ସିଙ୍ଗଲ୍ ସାଇନ୍-ଅନ୍। ଏଥିପାଇଁ ୟୁଜରଙ୍କୁ ଅଧିକ ପାସ୍ୱାର୍ଡ ମନେ ରଖିବା ଆବଶ୍ୟକ ପଡିବନି। ରେଲ୍ ୱାନ୍ ଆପ୍ ଜରିଆରେ ଯାତ୍ରୀମାନେ ସଂରକ୍ଷଣ ଟିକଟ, ଜେନେରାଲ୍ ଟିକଟ, ପ୍ଲାଟଫର୍ମ ଟିକଟ, ମାସିକ ସିଜିନ୍ ଟିକଟ ବୁକିଂ କରିପାରିବେ। ଏହା ସହ ପିଏନଆର ବି ଚେକ୍ କରିପାରିବେ। ଏହା ଟ୍ରେନ୍ର ରନିଂ ଷ୍ଟାଟସ୍ ବି ଦେବ। ଏହି ଆପ୍ ଜରିଆରେ ଖାଦ୍ୟ ଅର୍ଡର କରିପାରିବେ। କୌଣସି ପ୍ରକାରର ଅଭିଯୋଗ ମଧ୍ୟ କରିପାରିବେ। ସେହିପରି ସଂରକ୍ଷଣ ଟିକଟ ପାଇଁ ଟିଡିଆର୍ ଫାଇଲ୍ ବି କରିପାରିବେ।
ରେଲ୍ ୱାନ୍ ଆପ୍ ଆଇଆରସିଟିସିକୁ ସମ୍ପୂର୍ଣ୍ଣ ରୂପେ ରିପ୍ଲେସ୍ କରିବନି। ଏହା ଏକ ଅପ୍ସନ ରୂପେ କାମ କରିବ। ଆଇଆରସିଟିସି ସର୍ଭିସ୍ ପୂର୍ବ ଭଳି ବଳବତ୍ତର ରହିବ। ଆଗକୁ ରେଲ୍ ୱାନ୍ ଆପ୍ରେ ମେସେଜିଂ, ସୋସିଆଲ ମିଡିଆ, ଇ-କମର୍ସ, ପେମେଣ୍ଟ ଗେଟୱେ ଭଳି ସର୍ଭିସ୍ ଯୋଡ଼ାଯିବ। ଏହି ଆପ୍ ଏକ ଡିଜିଟାଲ୍ ଇକୋସିଷ୍ଟମ ଭଳି କାମ କରିବ।
