ନୂଆଦିଲ୍ଲୀ,୨୫/୦୩:ମହାରାଷ୍ଟ୍ର ଉପମୁଖ୍ୟମନ୍ତ୍ରୀ ଏକନାଥ ସିନ୍ଧେଙ୍କ ଉପରେ ବିବାଦୀୟ ମନ୍ତବ୍ୟ ଦେଇଥିବା ଷ୍ଟାଣ୍ଡ-ଅପ କମେଡିଆନ କୁନାଲ କାମରାଙ୍କ ବଢିବାରେ ଲାଗିଛି ଅଡ଼ୁଆ । ଶିବସେନା ସିନ୍ଧେ ଗୋଷ୍ଠୀ ତାଙ୍କୁ ଦେଇଛି ଖୋଲା ଚେତାବନୀ। ଏପରି ସ୍ଥିତିରେ ମହାରାଷ୍ଟ୍ର ଉପମୁଖ୍ୟମନ୍ତ୍ରୀ ଏକନାଥ ସିନ୍ଧେଙ୍କୁ ନେଇ ଦେଇଥିବା ଟିପ୍ପଣୀ ଉପରେ କ୍ଷମା ମାଗିବେ ନାହିଁ ବୋଲି କହିଛନ୍ତି କୁନାଲ।
ଗତକାଲି ଅର୍ଥାତ ସୋମବାର ବିଳମ୍ବିତ ରାତିରେ ସେ ସୋସିଆଲ ମିଡିଆ ପ୍ଲାଟଫର୍ମ ଏକ୍ସରେ ଏକ ପୋଷ୍ଟରେ କ୍ଷମା ମାଗିବା ବିଷୟରେ କହିଛନ୍ତି। ଏହା ସହିତ,ହାସ୍ୟ ଅଭିନେତା ଶୋ’ ରେକର୍ଡିଂ ହୋଇଥିବା ସ୍ଥାନରେ ହୋଇଥିବା ଭଙ୍ଗାରୁଜାକୁ ମଧ୍ୟ ସମାଲୋଚନା କରିଛନ୍ତି। ସେ ପୋଷ୍ଟରେ ଆହୁରି ମଧ୍ୟ କହିଛନ୍ତି ଯେ, ମୁଁ ଏହି ଭିଡ଼କୁ ଭୟ କରେ ନାହିଁ । ମୁଁ ମୋ ବିଛଣା ତଳେ ଲୁଚି ରହି ଘଟଣା ଶାନ୍ତ ହେବା ପର୍ଯ୍ୟନ୍ତ ଅପେକ୍ଷା କରିବି ନାହିଁ। ମନୋରଞ୍ଜନ ସ୍ଥାନ କେବଳ ଏକ ମଞ୍ଚ, ସମସ୍ତ ପ୍ରକାରର ଶୋ ପାଇଁ ଏକ ସ୍ଥାନ । ହାବିଟାଟ୍ (କିମ୍ବା ଅନ୍ୟ କୌଣସି ସ୍ଥାନ) ମୋର କମେଡ଼ି ପାଇଁ ଦାୟୀ ନୁହେଁ । କିମ୍ବା ମୁଁ ଯାହା କହୁଛି ତାହା ଉପରେ ଏହାର କୌଣସି କ୍ଷମତା ନାହିଁ। ଜଣେ ହାସ୍ୟ ଅଭିନେତାଙ୍କ କଥା ପାଇଁ ଏକ ସ୍ଥାନ ଉପରେ ଆକ୍ରମଣ କରିବା ଟମାଟୋ ବୋଝେଇ ଟ୍ରକକୁ ଓଲଟାଇ ଦେବା ପରି ମୂର୍ଖତା । ତଥାପି, ମୋ ବିରୋଧରେ ଯେକୌଣସି ଆଇନଗତ କାର୍ଯ୍ୟାନୁଷ୍ଠାନ ପାଇଁ ମୁଁ ପୋଲିସ ଏବଂ କୋର୍ଟକୁ ସହଯୋଗ କରିବାକୁ ପ୍ରସ୍ତୁତ।
ଏହା ମଧ୍ୟ ପଢନ୍ତୁ- ‘ଛାବା’ ଦେଖିବେ ପ୍ରଧାନମନ୍ତ୍ରୀ ମୋଦି , ସଂସଦରେ ଏହି ଦିନ ହେବ ସ୍ବତନ୍ତ୍ର ସ୍କ୍ରିନିଂ
ଅନ୍ୟପଟେ କୁନାଲ କାମରା ବିବାଦକୁ ନେଇ ଏକନାଥ ସିନ୍ଧେ କହିଛନ୍ତି, ସମସ୍ତଙ୍କୁ କହିବାର ସ୍ବାଧୀନତା ଅଛି । ଆମେ ବ୍ୟଙ୍ଗକୁ ବି ବୁଝୁଛୁ । ହେଲେ, ଏହାର ଏକ ନିର୍ଦ୍ଦିଷ୍ଟ ସୀମା ରହିବା ଦରକାର । ସେପଟେ କୁନାଲ କ୍ଷମା ମାଗିବାକୁ ମନା କରିବା ପରେ ମହାରାଷ୍ଟ୍ର ସରକାରରେ ଥିବା ଜଣେ ମନ୍ତ୍ରୀ କହିଛନ୍ତି, ‘ଯଦି ସେ କ୍ଷମା ମାଗିବେ ନାହିଁ, ତେବେ ଶିବସେନା ତାଙ୍କୁ ଛାଡ଼ିବ ନାହିଁ । ଆମେ ଏମିତି ଅପମାନକୁ ବରଦାସ୍ତ କରିବୁନି । ଯଦି ସେ କ୍ଷମା ନ ମାଗିବେ ତେବେ ବାହାରକୁ ଆସନ୍ତୁ, ଲୁଚୁଛନ୍ତି କାହିଁକି ।
