ମୁମ୍ବାଇ,୨୬/୦୩:  ସାଉଥ ଫିଲ୍ମ ଇଣ୍ଡଷ୍ଟ୍ରି ପାଇଁ ଦୁଃଖଦ ଖବର । ଆଉ ନାହାନ୍ତି ସାଉଥ ଅଭିନେତା ତଥା ନିର୍ଦ୍ଦେଶକ ମନୋଜ ଭାରତୀରାଜା । ଗତକାଲି ସନ୍ଧ୍ୟାରେ ଚେନ୍ନାଇର ଚେତପେଟସ୍ଥିତ ନିଜସ୍ବ ବାସଭବନରେ ତାଙ୍କର ଦେହାନ୍ତ ହୋଇଛି । ମୃତ୍ୟୁ ବେଳକୁ ତାଙ୍କୁ ୪୮ ବର୍ଷ ବୟସ ହୋଇଥିଲା । ଇଣ୍ଡିଆ ଟୁଡେ ରିପୋର୍ଟ ଅନୁସାରେ, ମନୋଜ ଭାରତୀରାଜାଙ୍କ କିଛି ଦିନ ପୂର୍ବରୁ ବାଇପାସ୍ ସର୍ଜରୀ ହୋଇଥିବା କୁହାଯାଉଛି। ଅନ୍ୟପଟେ  ତାମିଲନାଡୁ ମୁଖ୍ୟମନ୍ତ୍ରୀ ଏମକେ ଷ୍ଟାଲିନ ସୋସିଆଲ ମିଡିଆ ମାଧ୍ୟମରେ ତାଙ୍କ ବିୟୋଗରେ ଶୋକ ପ୍ରକାଶ କରିଛନ୍ତି। 

ଅଭିନେତା ତଥା ନିର୍ଦ୍ଦେଶକ ମନୋଜ ଭାରତୀରାଜ ସାଉଥ ଇଣ୍ଡଷ୍ଟ୍ରିର କିମ୍ବଦନ୍ତୀ ଚଳଚ୍ଚିତ୍ର ନିର୍ମାତା ଏବଂ ଅଭିନେତା ଭାରତୀରାଜଙ୍କ ପୁଅ ଥିଲେ। ତାଙ୍କ ପରିବାରରେ ତାଙ୍କ ସ୍ତ୍ରୀ ଅଶ୍ୱଥି ଓରଫ ନନ୍ଦନା ଏବଂ ଦୁଇ ଝିଅ ଅର୍ଶିତା ଏବଂ ମାଥିଭାଥାନୀ ଅଛନ୍ତି। ଅଭିନେତାଙ୍କ ହଠାତ୍ ବିୟୋଗରେ ସାଉଥ ଇଣ୍ଡଷ୍ଟ୍ରି ଏବଂ ଫ୍ୟାନ୍ସ ମର୍ମାହତ। ମୁଖ୍ୟମନ୍ତ୍ରୀ ଏମକେ ଷ୍ଟାଲିନ୍ ଏକ୍ସରେ ମନୋଜ ଭାରତୀରାଜଙ୍କୁ ଶ୍ରଦ୍ଧାଞ୍ଜଳି ଜଣାଇ ଲେଖିଛନ୍ତି, 'ଅଭିନେତା ଏବଂ ନିର୍ଦ୍ଦେଶକ ଭାରତୀରାଜଙ୍କ ପୁଅ ମନୋଜ ଭାରତୀଙ୍କ ମୃତ୍ୟୁ ଖବର ଶୁଣି ମୁଁ ଗଭୀର ଦୁଃଖିତ। ସେ ତାଙ୍କ ପିତାଙ୍କ ନିର୍ଦ୍ଦେଶିତ ଚଳଚ୍ଚିତ୍ର ତାଜମହଲରୁ ତାଙ୍କର କ୍ୟାରିଅର ଆରମ୍ଭ କରିଥିଲେ। ସେ ସମୁତିରାମ, ଅଲ୍ଲୀ ଅର୍ଜୁନ, ଭାରୁଶମେଲମ୍ ବସନ୍ତମ୍ ଭଳି ଅନେକ ଚଳଚ୍ଚିତ୍ରରେ କାମ କରି ନିଜର ଛାପ ଛାଡ଼ିଯାଇଛନ୍ତି ।

ମୁଖ୍ୟମନ୍ତ୍ରୀ ଆହୁରି ଲେଖିଛନ୍ତି, 'କମ୍ ବୟସରେ ତାଙ୍କର ଅପ୍ରତ୍ୟାଶିତ ମୃତ୍ୟୁ ଆଶ୍ଚର୍ଯ୍ୟଜନକ।' ମୁଁ ଇୟାକୁନାର ଇମାୟମ ଭାରତୀରାଜା ଏବଂ ତାଙ୍କ ପରିବାର ଏବଂ ଫିଲ୍ମ ଇଣ୍ଡଷ୍ଟ୍ରିର ବନ୍ଧୁମାନଙ୍କୁ ମୋର ହୃଦୟର ସହାନୁଭୂତି ଏବଂ ସମବେଦନା ଜଣାଉଛି । ତାଙ୍କ ବ୍ୟତୀତ ସଂଗୀତଜ୍ଞ ଇଲାଇୟାରାଜା ଶୋକ ପ୍ରକାଶ କରି ଲେଖିଛନ୍ତି, 'ମୋର ପ୍ରିୟ ବନ୍ଧୁ ଭାରତୀରାଜଙ୍କ ପୁଅ ମନୋଜ କୁମାରଙ୍କ ମୃତ୍ୟୁ ଖବରରେ ମୁଁ ମର୍ମାହତ।' ମୋ ପାଖରେ କୌଣସି ଶବ୍ଦ ନାହିଁ। ତାଙ୍କ ସହିତ ଏପରି ଦୁଃଖଦ ଘଟଣା ଘଟିବା ଉଚିତ୍ ନ ଥିଲା। ତଥାପି ଏହି ଭାଗ୍ୟକୁ ଗ୍ରହଣ କରିବା ବ୍ୟତୀତ ଆମ ପାଖରେ ଅନ୍ୟ କୌଣସି ବିକଳ୍ପ ନାହିଁ। ମନୋଜ ଭାରତୀରାଜଙ୍କ ଆତ୍ମାକୁ ଶାନ୍ତି ମିଳୁ ବୋଲି ମୁଁ ଭଗବାନଙ୍କ ନିକଟରେ ପ୍ରାର୍ଥନା କରୁଛି।

ଏହା ୱମଧ୍ୟ ପଢନ୍ତୁ- କୁନାଲ କାମ୍‌ରାଙ୍କ ବିବାଦ ଭିତରେ ହଂସଲ-କଙ୍ଗନା ମୁହାଁମୁହିଁ, ଅଭିନେତ୍ରୀ କହିଲେ-‘ମୋ ଦୁଃଖ ସମୟରେ ସେ ହସିଥିଲେ’

ପ୍ରକାଶ ଥାଉକି, ମନୋଜ ଭାରତୀରାଜା ୧୯୯୯ ମସିହାରେ 'ତାଜମହଲ' ଫିଲ୍ମ ସହିତ ତାଙ୍କର ଫିଲ୍ମ କ୍ୟାରିଅର ଆରମ୍ଭ କରିଥିଲେ। ଏହି ଚଳଚ୍ଚିତ୍ରଟି ତାଙ୍କ ପିତା ଭାରତୀରାଜଙ୍କ ଦ୍ୱାରା ନିର୍ମିତ ହୋଇଥିଲା। ତଥାପି, ଏହି ଫିଲ୍ମଟି ବକ୍ସ ଅଫିସରେ ଫ୍ଲପ୍ ପ୍ରମାଣିତ ହେଲା। ଫିଲ୍ମର ଗୀତଗୁଡ଼ିକ ଏ.ଆର. ରହମାନ ରଚନା କରିଥିଲେ ଯାହା ବହୁତ ପସନ୍ଦ ଆସିଥିଲା। ଏହା ପରେ ମନୋଜ ଭାରତୀରାଜା ଅଲ୍ଲୀ ଅର୍ଜୁନ, ମହା ନଦୀଗନ୍ ଏବଂ ଭାରୁଶମେଲମ୍ ବସନ୍ତମ୍ ଭଳି ଫିଲ୍ମରେ କାମ କରିଥିଲେ। ଚଳଚ୍ଚିତ୍ର ବ୍ୟତୀତ ସେ ତାମିଲ ଚଳଚ୍ଚିତ୍ରର ନିର୍ଦ୍ଦେଶନା ମଧ୍ୟ ଦେଇଥିଲେ।