କଟକ,୨୬/୦୩: ତାଳଦଣ୍ଡାର ଯୋବ୍ରା ନିକଟରେ ତିଆରି କରାଯାଇଥିବା ବୋଟିଂ କ୍ଲବ୍ରେ ଏଣିକି ଆଉ ପାଣି ଅଭାବରୁ ବୋଟିଂ ବନ୍ଦ ହେବନି । ଏଠାରେ ବର୍ଷ ସାରା ବୋଟିଂ ହେବ । ଏଥିପାଇଁ ନୂଆବଜାର ପୋଲ ତଳକୁ ଏକ ‘କ୍ରସ୍ ରେଗୁଲେସନ୍ ଗେଟ୍’ ନିର୍ମାଣ କରାଯିବ । ଏହି ଗେଟ୍ ଜରିଆରେତାଳଦଣ୍ଡା କେନାଲରେ ନୂଆବଜାର ଠାରୁ ଯୋବ୍ରା ପର୍ଯ୍ୟନ୍ତ ସବୁବେଳେ ପାଣି ଭରପୂର ରହିବ । ଯାହାଦ୍ୱାରା ବର୍ଷତମାମ ଲୋକେ ବୋଟିଂର ସୁବିଧା ନେଇପାରିବେ । ତାଳଦଣ୍ଡା କେନାଲର ନବୀକରଣ ସହ ଯୋବ୍ରାଠାରୁ କେନାଲ୍ ଉଭୟ ପାଶ୍ୱର୍ ସିନ୍ଥେଟିକ୍ ୱାଲ୍କାମ ଆରମ୍ଭ ହୋଇଥିଲା । ଏହି ୱାଲ୍ କାମ ରାଣୀହାଟ ପର୍ଯ୍ୟନ୍ତ ଶେଷ ହେବାପରେ ଯୋବ୍ରା ନିକଟରେ ବୋଟିଂ ବ୍ୟବସ୍ଥା କରାଯାଇଛି । ବୋଟିଂ ପାଇଁ ଲୋକଙ୍କ ଗହଳିମଧ୍ୟ ହେଲା । କିନ୍ତୁ ପାଣି ଅଭାବରୁ ବୋଟିଂ ସବୁବେଳେ ହୋଇପାରୁନାହିଁ ।
ବର୍ଷାଦିନକୁ ଛାଡ଼ିଦେଲେ ବାକି ସମୟରେ ପ୍ରାୟ ବୋଟିଂ ବନ୍ଦ ରହୁଛି । ତାଳଦଣ୍ଡାରେ ଖରିଫ୍ ଧାନ ଚାଷ ପାଇଁ କେବଳ ପାଣି ଛଡ଼ାଯାଉଛି । ରବି ଚାଷ ପାଇଁ ପାଣି ଆଉ ଦିଆଯାଉନାହିଁ ।ଏମିତିରେ ଦେଖିଲେ ବର୍ଷର ପ୍ରାୟ ୭/୮ମାସରୁଅଧିକ ସମୟ ତାଳଦଣ୍ଡା କେନାଲ ଶୁଖିଲା ପଡ଼ୁଛି ।ତାଳଦଣ୍ଡାରେ ବର୍ଷ ସାରା ବୋଟିଂ ସୁବିଧା ପାଇଁହାଇକୋର୍ଟରେ ଏକ ମାମଲା ମଧ୍ୟ ରୁଜୁ ହୋଇଥିଲା । ହାଇକୋର୍ଟର ସହର ସମସ୍ୟା ବେଞ୍ଚ୍ରେ ମାମଲାର ଶୁଣାଣି ହୋଇଥିଲା । ହାଇକୋର୍ଟ ମାମଲାର ଶୁଣାଣି କରି ବର୍ଷସାରା କିପରି ବୋଟିଂ ସୁବିଧା ହୋଇପାରିବ ଏବଂ ପର୍ଯ୍ୟଟକମାନେ ଯେପରି କଟକ ଆସିପାରିବେ ସେନେଇ ଆବଶ୍ୟକ ପଦକ୍ଷେପ ନେବାକୁ ବିଭାଗୀୟ ଅଧିକାରୀଙ୍କୁ ନିର୍ଦ୍ଦେଶ ଦେଇଥିଲେ ।
ଏହା ମଧ୍ୟ ପଢନ୍ତୁ- ଶିକ୍ଷା ବର୍ଷ ସରିଲା: ମିଳିଲାନି ବହି, ବିନା ବହିରେ ପରୀକ୍ଷା ଦେଲେ ଛାତ୍ରଛାତ୍ରୀ
ହାଇକୋର୍ଟଙ୍କ ନିର୍ଦ୍ଦେଶ ପରେ ଜଳସମ୍ପଦ ବିଭାଗ ପକ୍ଷରୁ ସର୍ଭେକରାଯାଇ ବୋଟିଂ ସ୍ଥଳୀରେ ଯେପରି ବର୍ଷସାରା ପାଣିରହିବ ସେଥିପାଇଁ ଏଭଳି ଏକ ପଦକ୍ଷେପ ଗ୍ରହଣ କରାଯାଇଛି । ନୂଆବଜାର ପୋଲ ତଳକୁ ଏହି‘କ୍ରସ୍ ରେଗୁଲେସନ୍ ଗେଟ୍’ ନିର୍ମାଣ କରାଯିବ । ଗେଟ୍ ଜରିଆରେ ତାଳଦଣ୍ଡା କେନାଲରେ ପାଣି ନିୟନ୍ତ୍ରଣ କରି ତଳକୁ ଛଡ଼ାଯିବ । ଗେଟ୍ ଉପରକୁସବୁବେଳେ ବୋଟିଂ କଲାଭଳି ପାଣି ସଂରକ୍ଷିତରଖାଯିବ । ଚାଷ ପାଇଁ ଅବା କୌଣସି ଶିଳ୍ପସଂସ୍ଥା ପାଇଁ ଆବଶ୍ୟକତା ଅନୁସାରେ ପାଣି ଛଡ଼ାଯିବ ।ଏଥିପାଇଁ ୧୦ଟି ଗେଟ୍ ନିର୍ମାଣ କରାଯିବ । ଏଥିପାଇଁ ୨ କୋଟି ଟଙ୍କାର ବ୍ୟୟବରାଦ୍ କରାଯାଇଛି ।ଏପ୍ରିଲ୍ରୁ କାମ ଆରମ୍ଭ ହେବ । ଜୁନ୍ ସୁଦ୍ଧା ଏହି କାମ ଶେଷ କରାଯିବାକୁ ଲକ୍ଷ୍ୟ ଧାର୍ଯ୍ୟ କରାଯାଇଛି ବୋଲି ମହାନଦୀ ଦକ୍ଷିଣ ଡିଭିଜନ୍ର ଅଧୀକ୍ଷଣ ଯନ୍ତ୍ରୀ ସିଦ୍ଧାର୍ଥ ଶେଖର ସୂଚନା ଦେଇଛନ୍ତି ।
