ଭୁବନେଶ୍ୱର, ୨୬/୦୩ : ବିଏମ୍ସି ୱାର୍ଡ ନମ୍ବର-୬୧ ଭୀମଟାଙ୍ଗି ଅଞ୍ଚଳରେ ମାରାତ୍ମକ ଜଣ୍ଡିସ ରୋଗ ଭୟାବହ ଆକାର ଧାରଣ କରିଛି । ୨ ଦିନରେ ଏହି ଅଞ୍ଚଳରେ ୧୦ ଜଣ ଆକ୍ରାନ୍ତ ଚିହ୍ନଟ ହୋଇଛନ୍ତି । ସରକାରୀ, ବେସରକାରୀ ଡାକ୍ତରଖାନାକୁ ମିଶାଇ ପ୍ରାୟ ୩୫ ଜଣ ଆକ୍ରାନ୍ତ ଚିକିତ୍ସିତ ହେଉଛନ୍ତି । ପିଇବା ପାଣିରୁ ଏହି ଦୁଃସାଧ୍ୟ ରୋଗ ମାଡ଼ୁଥିବା ସ୍ଥାନୀୟ ଲୋକେ ଅଭିଯୋଗ କରିଛନ୍ତି ।
ସୋମବାର ଭୀମଟାଙ୍ଗି ଉପରଫେଜ୍ ସାଇ ମନ୍ଦିର ରାସ୍ତା କଡ଼ ଜନବସତିରୁ ୧୦ ଜଣ ଜଣ୍ଡିସ ଆକ୍ରାନ୍ତ ଚିହ୍ନଟ ହୋଇ ପୋଖରୀପୁଟସ୍ଥିତ ଏକ ଘରୋଇ ହସ୍ପିଟାଲରେ ଚିକିତ୍ସିତ ହେଉଛନ୍ତି । ଅନୁରୂପ ଭାବେ ଏହା ପୂର୍ବରୁ ଉପରଫେଜ୍ରୁ ପ୍ରାୟ ୨୫ଜଣ ଆକ୍ରାନ୍ତ ବିଏମ୍ସି ହସ୍ପିଟାଲ ଓ ଅନ୍ୟାନ୍ୟ ଘରୋଇ ହସ୍ପିଟାଲ, କ୍ଲିନିକ୍ରେ ଚିକିତ୍ସିତ ହେଉଛନ୍ତି । ଏହି ଅଞ୍ଚଳରେ ପ୍ରାୟ ୯୦ ପ୍ରତିଶତ ଲୋକ ୱାଟ୍କୋ ଜଳ ଯୋଗାଣ ଉପରେ ନିର୍ଭରଶୀଳ । ଭୀମେଶ୍ୱର ମନ୍ଦିର ପରିସରରେ ନିର୍ମିତ ପାଣି ଟାଙ୍କି ମାଧ୍ୟମରେ ଲୋକଙ୍କ ଘରକୁ ଜଳ ଯୋଗାଣ ହୋଇଥାଏ । ଏହି ପାଣି ଟାଙ୍କି ନିର୍ମାଣ ହେବା ଦିନ ଠାରୁ ସଫା ହୋଇନାହିଁ । ସେହିଭଳି ଅନେକ ସ୍ଥାନରେ ସ୍ୱେରେଜ ଲାଇନ୍, ଡ୍ରେନ୍କୁ ପାଣି ପାଇପ୍ ଅତିକ୍ରମ କରୁଛି । ଏହି ସବୁ ସମସ୍ୟା ଯୋଗୁ ପ୍ରଦୂଷିତ ଜଳ ଲୋକଙ୍କ ପାଖରେ ପହଞ୍ଚୁଛି ବୋଲି ଲୋକଙ୍କ ଅଭିଯୋଗ । ଏଦିଗରେ ସରକାର ତୁରନ୍ତ ଦୃଷ୍ଟି ଦେଇ ଲୋକଙ୍କୁ ବିଶୁଦ୍ଧ ଜଳ ଯୋଗାଇବା ଆବଶ୍ୟକ ବୋଲି ଲୋକେ ଦାବି କରିଛନ୍ତି ।
ଏହି ଖବରଟିକୁ ପଢନ୍ତୁ-ଏସଟିଏଫ୍ ଭୟରେ ବ୍ରିଜ୍ରୁ ଡେଇଁ ପଡ଼ିଲେ ଗଞ୍ଜେଇ ମାଫିଆ, ଚାଲିଗଲା ଜୀବନ
