ନୂଆଦିଲ୍ଲୀ,୧୩/୮: ବଲିଉଡ ଅଭିନେତା ରାଜପାଲ ଯାଦବଙ୍କ ଘରେ ଉତ୍ତରପ୍ରଦେଶ ଶାହଜାନପୁରର ସେଣ୍ଟ୍ରାଲ ବ୍ୟାଙ୍କ ଟିମ୍। ତାଙ୍କ ଘରୁ କୋଟି କୋଟି ଟଙ୍କାର ସମ୍ପତି ଜବତ ହୋଇଛି । ସେଣ୍ଟ୍ରାଲ ବ୍ୟାଙ୍କ ଅଫ ଇଣ୍ଡିଆ ମୁମ୍ବାଇ ଶାଖାରୁ ରାଜପାଲ ଯାଦବ କୋଟି କୋଟି ଟଙ୍କା ଋଣ ନେଇଥିଲେ  । ଯେଉଁଥିପାଇଁ ସେ ବାପା ନାରଙ୍ଗ ଯାଦବଙ୍କ ନାଁରେ ଥିବା ଜମି ଓ ଘର ବନ୍ଧକ ରଖି ଟଙ୍କା ଆଣିଥିଲେ  । ଏନେଇ ସେଣ୍ଟ୍ରାଲ ବ୍ୟାଙ୍କ ଅଫ ଇଣ୍ଡିଆ, ବାନ୍ଦ୍ରା କୁର୍ଲା କମ୍ପ୍ଲେକ୍ସ ମୁମ୍ବାଇ ଶାଖାର ଟିମ ଦୁଇ ଦିନ ପୂର୍ବରୁ ଶାହାଜାନପୁରରେ ପହଞ୍ଚିଥିଲା  । ଏହାପରେ ଗୋପନୀୟ ଢଙ୍ଗରେ ଋଣରେ ବୁଡିଥିବା ରାଜପାଲ ଯାଦବଙ୍କ ସମ୍ପତ୍ତିକୁ ଜବତ କରିଛି ବ୍ୟାଙ୍କ  ।

ତେବେ ରାଜପାଲ ଯାଦବଙ୍କ ବାପାଙ୍କ ନାମରେ କୋଟି କୋଟି ମୂଲ୍ୟର ଏହି ସମ୍ପତ୍ତି ସହରର ସଦର ବଜାର ନିକଟ ସେଟ ଏକ୍ବାଲ୍ୟାବ ପାଖରେ ଏହି ସମ୍ପତ୍ତି ରହିଛି । ବ୍ୟାଙ୍କ କର୍ମଚାରୀମାନେ ଗେଟ୍‌ରେ ତାଲା ପକାଇ ସିଲ୍‌ କରିଦେଇଛନ୍ତି  । ଏହା ସହ ସେଠାରେ ବ୍ୟାଙ୍କ ସମ୍ପତ୍ତି ଲେଖି ବ୍ୟାନର ମାରିଛନ୍ତି । ପ୍ରକାଶ ଥାଉକି, ଏହା ପୂର୍ବରୁ ଅତା ପତା ଲାପତା ଫିଲ୍ମର ଋଣ ନ ସୁଝିବା ଯୋଗୁଁ ଜେଲ ଯାଇସାରିଛନ୍ତି ରାଜପାଲ ଯାଦବ  ।ପୁଣି ଥରେ ବ୍ୟାଙ୍କ କରଜ ନ ସୁଝିବା ଯୋଗୁଁ ବନ୍ଧକ ରଖିଥିବା ସମ୍ପତ୍ତିକୁ ଜବତ କରିଛି ବ୍ୟାଙ୍କ  ।