ମୁମ୍ବାଇ,୦୮/୦୯:  ମାଆ ହେବେ ଦୀପିକା ପାଦୁକୋନ । ଯାହାକୁ ନେଇ ବର୍ତ୍ତମାନ ଶିରୋନାମାରେ ରହିଛନ୍ତି ବଲିଉଡ ଲୋକପ୍ରିୟ ଦମ୍ପତି ରଣଭୀର ସିଂ ଏବଂ ଦୀପିକା ।  ଏପରି ସମୟରେ ବର୍ତ୍ତମାନ ଦୀପିକା ପାଦୁକୋନଙ୍କୁ ଶନିବାର ମୁମ୍ବାଇର ଏକ ଡାକ୍ତରଖାନାରେ ଦେଖିବାକୁ ମିଳିଥିଲା । ଗଣମାଧ୍ୟମ ରିପୋର୍ଟ ଅନୁଯାୟୀ, ଦୀପିକା ପାଦୁକୋନ ପ୍ରସବ ପାଇଁ ଡାକ୍ତରଖାନାରେ ଭର୍ତ୍ତି ହୋଇଥିବା ଜଣାପଡିଛି । ତେବେ ଏହି ଖବର ଆସିବା ପରେ କୁନି ଅତିଥି ଅପେକ୍ଷାରେ ରହିଛନ୍ତି ପରିବାର ଓ ଫ୍ୟାନ୍ସ ।

ତେବେ ଦୀପିକା ପାଦୁକୋନଙ୍କୁ ଏଚ୍.ଏନ୍ ରିଲାଏନ୍ସ ଫାଉଣ୍ଡେସନ୍ ହସ୍ପିଟାଲରେ ଭର୍ତ୍ତି କରାଯାଇଛି । ଅଭିନେତ୍ରୀ ଯେ କୌଣସି ସମୟରେ ଏକ ସନ୍ତାନ ପ୍ରସବ କରିପାରନ୍ତି । ଦୀପିକା ପାଦୁକୋନଙ୍କ ସହ ତାଙ୍କ ପରିବାରର ଅନ୍ୟ କିଛି ସଦସ୍ୟ ମଧ୍ୟ ନଜର ଆସିଛନ୍ତି। ସେପ୍ଟେମ୍ବରର ଶେଷ ସପ୍ତାହରେ ଦୀପିକା ଏକ ସନ୍ତାନ ପ୍ରସବ କରିବାକୁ ଯାଉଛନ୍ତି ବୋଲି ଆଲୋଚନା ଜୋର ଧରିଥିଲା । ବର୍ତ୍ତମାନ କୁହାଯାଉଛି ଯେ ଏହି ଦମ୍ପତି ଏବଂ ସେମାନଙ୍କ ପରିବାର ସିଜରିଆନ୍ ଡେଲିଭରି  ମାଧ୍ୟମରେ ଶିଶୁକୁ ସ୍ୱାଗତ କରିବାକୁ ଯୋଜନା କରିଛନ୍ତି, ତେଣୁ ଅଭିନେତ୍ରୀଙ୍କୁ ଏଚ୍.ଏନ୍ ରିଲାଏନ୍ସ ହସ୍ପିଟାଲରେ ଭର୍ତ୍ତି କରାଯାଇଛି । ସୂଚନାଯୋଗ୍ୟ ଯେ ଗଣେଶ ପୂଜାର ଗୋଟିଏ ଦିନ ପୂର୍ବରୁ ରଣଭୀର ସିଂ ଏବଂ ଦୀପିକା ପାଦୁକୋନ ମୁମ୍ବାଇର ପ୍ରସିଦ୍ଧ ସିଦ୍ଧବିନାୟକ ମନ୍ଦିରରେ ପହଞ୍ଚିଥିଲେ । ପାରମ୍ପାରିକ ଲୁକରେ ଦୀପିକା ବାପ୍ପାଙ୍କ ଦର୍ଶନ କରିଥିଲେ ।