ମୁମ୍ବାଇ ୧୫/୦୯: ସଲମାନ ଖାନ୍‌ ଷ୍ଟାରର୍‌ ‘ସିକନ୍ଦର’ ଷ୍ଟାର୍‌ କାଷ୍ଟ୍‌ରେ ଏଣ୍ଟ୍ରି କରିଛନ୍ତି ଅଭିନେତ୍ରୀ କାଜଲ ଅଗ୍ରୱାଲ । ଇନ୍‌ଷ୍ଟାଗ୍ରାମ୍‌ରେ ଏକ ପୋଷ୍ଟ୍‌ ସେୟାର କରି କାଜଲ ଏହି ଘୋଷଣା କରିଛନ୍ତି । ଏଆର୍‌ ମୁରୁଗଡୋସଙ୍କ ନିର୍ଦ୍ଦେଶିତ ଏହି ଫିଲ୍ମରେ ରଶ୍ମିକା ମନ୍ଦନାଙ୍କୁ ମୁଖ୍ୟ ନାୟିକା ଭାବେ କାଷ୍ଟ୍‌ କରାଯାଇଛି । ‘ସିକନ୍ଦର’ ସୁଟିଂର ପ୍ରଥମ ଦିନର ଏକ ଫଟୋ କାଜଲ ଇନ୍‌ଷ୍ଟାରେ ଶେୟାର କରିଛନ୍ତି । ଏଥିରେ ସୂର୍ଯ୍ୟମୁଖୀ ଫୁଲତୋଡ଼ା ପାଖରେ ସେ ନିଜର ଭିଆଇପି ପରିଚୟ ପତ୍ର ଧରିଥିବା ଦେଖିବାକୁ ମିଳିଛି । ସେ ନିଜ ପୋଷ୍ଟ୍‌ରେ ନାଦିଆଦୱାଲା ଗ୍ରାଣ୍ଡ୍‌ସନ୍‌ ଏଣ୍ଟରଟେନ୍‌ମେଣ୍ଟ, ରଶ୍ମିକା ମନ୍ଦନାଙ୍କୁ ଟ୍ୟାଗ୍‌ କରିଛନ୍ତି ଏବଂ ହାସ୍‌ଟ୍ୟାଗ୍‌ ‘ସିକନ୍ଦର ଡେ-୧’ ଲେଖିଛନ୍ତି ।

ଏକ ମନୋରଞ୍ଜନଧର୍ମୀ ଗଣମାଧ୍ୟମର ରିପୋର୍ଟ ଅନୁସାରେ, କାଜଲଙ୍କ ଭୂମିକା ବିଷୟରେ କୌଣସି ସୂଚନା ଏ ଯାଏ ସାର୍ବଜନୀନ କରାଯାଇନାହିଁ । ଗତ ଜୁନ୍‌ରେ ୩୩ ହଜାର ଫୁଟ ଉଚ୍ଚରେ ଏକ ଦମ୍‌ଦାର ଆକ୍ସନ୍‌ ସିକ୍ୱେନ୍ସ ସହିତ ‘ସିକନ୍ଦର’ର ସୁଟିଂ ଆରମ୍ଭ ହୋଇଥିଲା । ବିମାନ ଭିତରେ ସଲମାନ ଥିଲେ । ଫିଲ୍ମ ଟିମ୍‌ ଏବେ ୪୫ ଦିନିଆ ସୁଟିଂରେ ବ୍ୟସ୍ତ ଅଛନ୍ତି । ତା’ପରେ ସେମାନେ ହାଇଦ୍ରାବାଦର ଏକ ପ୍ରାସାଦକୁ ସୁଟିଂ ପାଇଁ ଯିବେ । ଚଳିତ ବର୍ଷ ଇଦ ଅବସରରେ ‘ସିକନ୍ଦର’ ମୁକ୍ତିଲାଭ ଖବର ଘୋଷଣା ହେବା ପରଠୁ ଫିଲ୍ମକୁ ନେଇ ଚର୍ଚ୍ଚା ଲାଗି ରହିଛି । ଦେଢ଼ ବର୍ଷର ବ୍ରେକ୍‌ ପରେ ସଲମାନ ଥିଏଟରକୁ ଫେରିଥିବାରୁ ଫ୍ୟାନ୍‌ଙ୍କ ଉତ୍ସାହ ବଢ଼ିଯାଇଛି । ଏଆର ମୁରୁଗଡୋସ୍‌ଙ୍କ ‘ଗଜନି’ ଓ ‘ହଲିଡେ: ଏ ସୋଲଜର ଇଜ୍‌ ନେଭର ଅଫ୍‌ ଡ୍ୟୁଟି’ ଭଳି ଫିଲ୍ମ ଇଣ୍ଡଷ୍ଟ୍ରିରେ ସର୍ବଦା ଚର୍ଚ୍ଚାର ବିଷୟ ହୋଇଛି । ସେହି ଦୃଷ୍ଟିରୁ ‘ସିକନ୍ଦର’ ଦର୍ଶକଙ୍କ ପାଇଁ ବଡ଼ ସର୍‌ପ୍ରାଇଜ୍‌ ପ୍ୟାକେଜ୍‌ ହେବ ବୋଲି ଆଶା ରହିଛି ।