ମୁମ୍ବାଇ ୧୮/୦୯: ଆମିର ଖାନ୍ଙ୍କ ପୁଅ ଜୁନେଦ ଖାନ୍ଙ୍କ ସହ ବଡ଼ ପରଦାରେ ନଜର ଆସିବେ ଶ୍ରୀଦେବୀ ତନୟା ଖୁସି କପୁର । ଫିଲ୍ମର ନିର୍ଦ୍ଦେଶନା ଦେବେ ଅଦ୍ୱେତ ଚନ୍ଦନ । ଦୀର୍ଘ ଦିନ ଧରି ଫିଲ୍ମର କଳାକାର ଚୟନକୁ ନେଇ ଅନେକ ଅନୁମାନ ହେଉଥିଲା । ଏବେ ନାୟକ-ନାୟିକାଙ୍କ ନାଁରେ ମୋହର ବାଜିବା ପରେ ବଲିଉଡ୍ରେ ପୁଣି ଥରେ ଚର୍ଚ୍ଚା ଆରମ୍ଭ ହୋଇଛି । ପ୍ରଥମ ଥର ଖୁସି-ଜୁନେଦଙ୍କ ଯୋଡ଼ି ବଡ଼ ପରଦାକୁ ଆସିବ । ତେଣୁ ନୂଆ ଯୋଡ଼ିଙ୍କୁ ନେଇ ଫିଲ୍ମ ସିନେପ୍ରେମୀଙ୍କ ଉତ୍ସାହ ଆହୁରି ବଢ଼ିଯାଇଛି ।
ନିର୍ମାତା ଇନ୍ଷ୍ଟାଗ୍ରାମ୍ରେ ଫିଲ୍ମର ପୋଷ୍ଟର୍ ଶେୟାର କରି ରିଲିଜ୍ ତାରିଖ ଘୋଷଣା କରିଛନ୍ତି । ଆସନ୍ତା ବର୍ଷ ଫେବ୍ରୁଆରୀ ୭ ତାରିଖରେ ଫିଲ୍ମଟି ସିନେମାଘରକୁ ଆସିବ । ଅଦ୍ୱେତଙ୍କ ନିର୍ଦ୍ଦେଶିତ ଶେଷ ଫିଲ୍ମ ଥିଲା ‘ଲାଲ୍ ସିଂହ ଚଡ୍ଢା’, ଯାହା ବକ୍ସ ଅଫିସ୍ରେ ଫ୍ଲପ୍ ହୋଇଥିଲା । ନିର୍ମାତା ଶେୟାର କରିଥିବା ପୋଷ୍ଟର୍ରେ ଜଣେ ପୁଅ ଓ ଜଣେ ଝିଅ ସେଲ୍ଫି ନେଉଥିବା ନଜର ଆସିଛନ୍ତି । ଫିଲ୍ମର ଟାଇଟଲ, ଟ୍ରେଲର ଓ ଗୀତ ଆଦି କେବେ ରିଲିଜ୍ ହେବ, ତାକୁ ଅପେକ୍ଷା କରିଛନ୍ତି ଦର୍ଶକ । ଚର୍ଚ୍ଚା ହେଉଛି, ଏଇଟି ହିଟ୍ ତାମିଲ ଫିଲ୍ମ ‘ଲଭ୍ ଟୁଡେ’ର ହିନ୍ଦୀ ନାଟ୍ୟ ରୂପାନ୍ତର ହେବ । ତେବେ, ନିର୍ମାତା ଏ ନେଇ ଅଦ୍ୟାବଧି ଘୋଷଣା କରିନାହାନ୍ତି ।
ଜୋୟା ଅଖତରଙ୍କ ୱେବ୍ ଫିଲ୍ମ ‘ଦ ଆର୍ଚିଜ’ ଜରିଆରେ ଅଭିନୟ କ୍ୟାରିଅର ଆରମ୍ଭ କରିଥିଲେ ଖୁସି । ୨୦୨୩ରେ ମୁକ୍ତିପ୍ରାପ୍ତ ଏହି ଫିଲ୍ମ ପ୍ରସିଦ୍ଧ କମିକ୍ସର ଭାରତୀୟ ନାଟ୍ୟ ରୂପାନ୍ତର ଥିଲା, ଯେଉଁଥିରେ ବେଟ୍ଟି କୁପର ଭୂମିକାରେ ନଜର ଆସିଥିଲେ ଖୁସି । ଅନ୍ୟପକ୍ଷେ, ଜୁନେଦ ମଧ୍ୟ ନେଟ୍ଫ୍ଲିକ୍ସରେ ମୁକ୍ତିପ୍ରାପ୍ତ ‘ମହାରାଜ’ ଜରିଆରେ ବଲିଉଡ୍ରେ ଏଣ୍ଟ୍ରି କରିଥିଲେ । ଏଥିରେ ତାଙ୍କ ଅଭିନୟ ସବୁ ମହଲରେ ପ୍ରଶଂସିତ ହୋଇଥିଲା ।