ମୁମ୍ବାଇ ୧୬/୦୯: ବଲିଉଡ୍ ଅଭିନେତା ଗୋବିନ୍ଦା ନବେ ଦଶକର ଲୋକପ୍ରିୟ ଅଭିନେତାଙ୍କ ମଧ୍ୟରୁ ଅନ୍ୟତମ । ସେତେବେଳେ ତାଙ୍କର ପ୍ରଶଂସକଙ୍କ ସଂଖ୍ୟା ବହୁତ ଅଧିକ ଥିଲା । ବିଶେଷ କରି ମହିଳା ପ୍ରଶଂସକମାନେ ତାଙ୍କର ଏକ ଝଲକ ପାଇବା ଲାଗି ତାଙ୍କ ଫିଲ୍ମ ସେଟ୍ କିମ୍ବା ଘର ବାହାରେ ଲାଇନ୍ ଲଗାଇ ଛିଡ଼ା ହେଉଥିଲେ । ଏପିରିକି କିଛି ଝିଅ ଗୋବିନ୍ଦାଙ୍କୁ ଷ୍ଟେଜ୍ ଉପରେ ଦେଖିଲେ ବେହୋସ ହୋଇଯାଉଥିଲେ । ଥରେ ତ ଗୋବିନ୍ଦାଙ୍କର ଜଣେ ମହିଳା ପ୍ରଶଂସକ ତାଙ୍କ ଘରେ ୨୦ ଦିନ ଧରି ଚାକରାଣୀ ଭାବେ କାମ କରିଥିଲେ । ପରେ ସେ ଜଣେ ମନ୍ତ୍ରୀଙ୍କ ଝିଅ ବୋଲି ଜଣାପଡ଼ିଥିଲା । ଗୋବିନ୍ଦାଙ୍କ ପତ୍ନୀ ସୁନୀତା ନିଜେ ଏକଥା ଖୁଲାସା କରିଛନ୍ତି ।
ନିକଟରେ ଏକ ପଡ୍କାଷ୍ଟରେ ସୁନୀତା କହିଛନ୍ତି ଯେ, ଜଣେ କମ୍ ବୟସର ଝିଅ ଆମ ଘରେ ୨୦-୨୨ ଦିନ ଚାକରାଣୀ ହୋଇ ରହିଥିଲା । ତାର ଚେହେରାରୁ ସେ ଭଲ ଘରର ଝିଅ ଭଳି ଲାଗୁଥିଲା । ତାକୁ ବାସନ ଧୋଇବା କିମ୍ବା ଘରସଫା କରିବା ଭଳି କିଛି କାମ ଠିକ୍ରେ ଆସୁନଥିଲା । ସେ ବିଳମ୍ବିତ ରାତି ଯାଏ ଜାଗ୍ରତ ରହି ଗୋବିନ୍ଦାଙ୍କ ଆସିବା ଲାଗି ଅପେକ୍ଷା କରୁଥିଲା । ଏହା ଦେଖି ମୋତେ ସନ୍ଦେହ ହେବାରୁ ମୁଁ ମୋ ଶାଶୂଙ୍କୁ ଜଣାଇଲି । ପରେ ଆମେ ତାର ପରିଚୟ ସନ୍ଧାନ କରିବାରୁ ସେ ଜଣେ ପ୍ରଭାବଶାଳୀ ମନ୍ତ୍ରୀଙ୍କ ଝିଅ ବୋଲି ଜଣାପଡ଼ିଲା ଯିଏକି ଗୋବିନ୍ଦାଙ୍କର ପ୍ରଶଂସକ ଥିଲା । ଏଥର ମୁଁ ତାକୁ ସତ କଥା ପଚାରିବାରୁ ସେ କାନ୍ଦିବା ଆରମ୍ଭ କଲା ।
ସୁନୀତା କହିଛନ୍ତି, ଗୋବିନ୍ଦାଙ୍କୁ ଦେଖିବା ଲାଗି ହିଁ ଚାକରାଣୀ ଭାବେ ଆମ ଘରେ ରହିଆସୁଥିଲା ସେ ବୋଲି କହିଥିଲା । ପରେ ତାର ବାପା ଗାଡ଼ିର ପଟୁଆର ସହିତ ତାକୁ ନେବାକୁ ଆମ ଘରକୁ ଆସିଥିଲେ । ମୁଁ ଗୋବିନ୍ଦାଙ୍କର ଏଭଳି ପ୍ରଶଂସକ ଦେଖିଛି । ୩୭ ବର୍ଷର କ୍ୟାରିୟରରେ ଗୋବିନ୍ଦା ୧୭୦ଟି ଫିଲ୍ମରେ କାମ କରିଛନ୍ତି । ଶେଷ ଥର ଲାଗି ୨୦୧୯ରେ ତାଙ୍କର ‘ରଙ୍ଗିଲା ରାଜା’ ଫିଲ୍ମ ରିଲିଜ୍ ହୋଇଥିଲା । ତେବେ ତାହା ଫ୍ଲପ୍ ହୋଇଯାଇଥିଲା । ତା’ ପରଠାରୁ ସେ ଆଉ କୌଣସି ଫିଲ୍ମରେ କାମ କରିନାହାନ୍ତି ।