ମୁମ୍ବାଇ,୧୭/୦୯:ବଲିଉଡ ଅଭିନେତା ସଲମାନ ଖାନଙ୍କ ନାଁ ନେଇ ଠକେଇ କରିବାକୁ କରାଯାଇଛି ଚେଷ୍ଟା । ଏନେଇ ଜାଣିବା ପରେ ସଲମାନ ଖାନ ଏବଂ ତାଙ୍କ ଟିମ ଏକ ଅଫିସିଆଲ ନୋଟିସ ଜାରି କରି ଫ୍ୟାନ୍ସଙ୍କୁ ଠକାମିରୁ ଦୂରେଇ ରହିବାକୁ ପରାମର୍ଶ ଦେଇଛନ୍ତି । ଏଥିସହ ଯେଉଁମାନେ ଠକାମି କରୁଛନ୍ତି ସେମାନଙ୍କ ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ମଧ୍ୟ ଚେତାବନୀ ଦେଇଛନ୍ତି ।

ତେବେ ସୂଚନା ଅନୁସାରେ,ଆମେରିକାରେ ସଲମାନ ଖାନ କନସର୍ଟ କରୁଥିବା ଖବର ସାମ୍ନାକୁ ଆସିଥିଲା । ଯାହାକୁ ନେଇ ଏବେ ସଲମାନ ଖାନ ଓ ତାଙ୍କ ଟିମ ସ୍ପଷ୍ଟୀକରଣ ଦେଇଛନ୍ତି। ସୋମବାର, ସେପ୍ଟେମ୍ବର ୧୬ରେ ସଲମାନ ଖାନ ଇନଷ୍ଟାଗ୍ରାମରେ ଆମେରିକାର ଯାତ୍ରା ସମ୍ବନ୍ଧରେ ଅଫିସିଆଲ ନୋଟିସ ଜାରି କରିଛନ୍ତି । ସେ ଏହି ପୋଷ୍ଟରେ ଆମେରିକା କନସର୍ଟକୁ ମିଥ୍ଯା କହିବା ସହ ଫ୍ୟାନ୍ସଙ୍କୁ ଏପରି ଠକାମିରୁ ଦୂରେଇ ରହିବାକୁ ପରାମର୍ଶ ଦେଇଛନ୍ତି । ସେହି ପୋଷ୍ଟରେ ଲେଖିଛନ୍ତି ଯେ,'ସଲମାନଙ୍କ ପ୍ରଦର୍ଶନକୁ ନେଇ ସମସ୍ତ ଦାବି ସମ୍ପୂର୍ଣ୍ଣ ମିଥ୍ୟା। ଦୟାକରି କୌଣସି ଏକ କନସର୍ଟକୁ ପ୍ରୋତ୍ସାହିତ କରୁଥିବା କୌଣସି ଇମେଲ,ବାର୍ତ୍ତା କିମ୍ବା ବିଜ୍ଞାପନରେ ବିଶ୍ୱାସ କରନ୍ତୁ ନାହିଁ ।  ଯଦି କେହି ସଲମାନ ଖାନଙ୍କ ନାମକୁ ଜାଲିଆତି କରିଥିବାର ଦେଖାଯାଏ, ତେବେ ତାଙ୍କ ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ। ସଲମାନ ଖାନ କିମ୍ବା ତାଙ୍କର କୌଣସି କମ୍ପାନୀ କିମ୍ବା ଟିମ ୨୦୨୪ ରେ ଆମେରିକାରେ କୌଣସି ସଙ୍ଗୀତ କାର୍ଯ୍ୟକ୍ରମ ଆୟୋଜନ କରୁନାହାଁନ୍ତି ।''ତେବେ ଅଭିନେତା ସଲମାନ ଖାନ ବର୍ତ୍ତମାନ ଫିଲ୍ମ 'ସିକନ୍ଦର'ରେ ନଜର ଆସିବେ । ଏହି ଫିଲ୍ମର ନିର୍ଦ୍ଦେଶନା  ଆର୍ ମୁରୁଗାଦୋସ  ଦେଉଥିବା ବେଳେ ସଲମାନଙ୍କ ସହ ପ୍ରଥମ ଥର ପାଇଁ କାମ କରିବେ ଏହି ନିର୍ଦ୍ଦେଶକ ।