ୱାଶିଂଟନ,୧୯/୦୯: ଆମେରିକାର ପୂର୍ବତନ ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ୍‌ ଭାରତର ପ୍ରଧାନମନ୍ତ୍ରୀ  ନରେନ୍ଦ୍ର ମୋଦିଙ୍କୁ ପ୍ରଶଂସା  କରିଛନ୍ତି । କହିଛନ୍ତି, ମୋଦି ଜଣେ  ଚମତ୍କାର ବ୍ୟକ୍ତି । ନିଜ କାମକୁ ନେଇ  ସେ ବେଶ୍‌ ଭଲ । ଆସନ୍ତା ସପ୍ତାହରେ ମୁଁ ତାଙ୍କୁ ସାକ୍ଷାତ କରିବି । ଆମେରିକାର  ମିଶିଗାନ ପ୍ରଦେଶରେ ଅନୁଷ୍ଠିତ ଏକ  ନିର୍ବାଚନ ପ୍ରଚାର କାର୍ଯ୍ୟକ୍ରମରେ ଟ୍ରମ୍ପ୍‌ ଏହା କହିଛନ୍ତି । ଏହି ପରିପ୍ରେକ୍ଷୀରେ ଟ୍ରମ୍ପ୍‌ ଭାରତର ଟିକସ ନୀତିକୁ ସମାଲୋଚନା  କରିଛନ୍ତି । 

ସେ କହିଛନ୍ତି, ଆମେରିକା  ସହ ଥିବା ବାଣିଜ୍ୟିକ ସମ୍ପର୍କର ଭାରତ  ଦୁରୁପଯୋଗ କରୁଛି। ଆମଦାନି  ଉପରେ ଭାରତ ଅତ୍ୟଧିକ ଟିକସ ଲାଗୁ  କରୁଛି । ରାଷ୍ଟ୍ରପତି ଭାବେ ନିର୍ବାଚିତ  ହେବା ପରେ ଆମେରିକାରେ ଯେସାକୁ  ତେସା ନୀତିରେ ବାଣିଜ୍ୟ ନୀତି ଲାଗୁ  କରିବି । ଆମ ଦେଶରୁ ହେଉଥିବା  ରପ୍ତାନି ଉପରେ ଯେଉଁ ଦେଶ ଯେତେ  ଟିକସ ଲାଗୁ କରିବ, ତାହା ଉପରେ  ସେତିକି ଟିକସ ଲାଗୁ କରାଯିବ । ଯଦି କୌଣସି ଦେଶ ୨୫୦ ଗୁଣା ଟିକସ  ଲାଗୁ କରନ୍ତି, ଆମେ ବି ସେତିକି ଟିକସ  ଲଦିବୁ । ଉଲ୍ଲେଖଯୋଗ୍ୟ, ପ୍ରଧାନମନ୍ତ୍ରୀ  ମୋଦି ଆସନ୍ତା ୨୧ ତାରିଖରେ ୩ ଦିନିଆ  ଆମେରିକା ଗସ୍ତରେ ଯାଉଛନ୍ତି । ଏହି  ସମୟରେ ସେ କ୍ୱାଡ୍‌ ସମ୍ମିଳନୀ ଏବଂ  ଜାତିସଂଘ ବୈଠକରେ ଯୋଗଦେବେ ।