କଟକ,୨୫/୦୩: ଶ୍ରୀରାମଚନ୍ଦ୍ର ଭଞ୍ଜ ମେଡିକାଲ କଲେଜ୍ ଏବଂ ହସ୍ପିଟାଲ୍ (ଏସ୍ସିବି)ରେ ଶିଶୁ ବଦଳକୁ ନେଇ ରୁଜୁ ମାମଲାରେ ହାଇକୋର୍ଟ ଉଦ୍ବେଗ ପ୍ରକାଶ କରିଛନ୍ତି । ହାଇକୋର୍ଟ କହିଛନ୍ତି, ସରକାରୀ ମେଡିକାଲ୍ ଉପରେ ଲୋକଙ୍କ ଅଖଣ୍ଡ ବିଶ୍ୱାସ ରହିଥାଏ । କିନ୍ତୁ ଯେତେବେଳେ ଏହି ଭରସା ତୁଟିଯାଏ ସେତେବେଳେ କେବଳ ଏହି ହସ୍ପିଟାଲ୍ର ବିଶ୍ୱସନୀୟତା ପ୍ରତି ପ୍ରଶ୍ନ ଉଠେନି ପୂରା ଅନୁଷ୍ଠାନ ଉପରେ ଥିବା ବିଶ୍ୱାସ ଦୋହଲିଯାଏ । ତେଣୁ ଏଭଳି ଏକ ଘଟଣାର ଗୁରୁତ୍ୱ ଦୃଷ୍ଟିରୁ ହାଇକୋର୍ଟ ଏସ୍ସିବି ଅଧୀକ୍ଷକଙ୍କୁ ଜବାବ ଦାଖଲ ଲାଗି ନିର୍ଦ୍ଦେଶ ଦେଇଛନ୍ତି । ଏପ୍ରିଲ ୨ ତାରିଖ ସୁଦ୍ଧା ଅଧୀକ୍ଷକ ଏହା ଉପରେ ଜବାବ ରଖିବେ । ରତନା ବେହେରାଙ୍କ ପକ୍ଷରୁ ଆଗତ ମାମଲାର ଶୁଣାଣି କରି ବିଚାରପତି ଜଷ୍ଟିସ୍ ଏସ୍.କେ. ପାଣିଗ୍ରାହୀ ଏହି ନିର୍ଦ୍ଦେଶ ଦେଇଛନ୍ତି ।
୨୦୨୫ ଫେବ୍ରୁଆରୀ ୧୦ରେ ଆବେଦନକାରୀଙ୍କ ପତ୍ନୀ ଏସ୍ସିବିର ସ୍ତ୍ରୀ ରୋଗ ଓ ପ୍ରସୂତି ବିଭାଗରେ ଭର୍ତ୍ତି ହୋଇଥିଲେ । ୧୧ ତାରିଖ ସକାଳେ ତାଙ୍କର ଶିଶୁ କନ୍ୟା ଜନ୍ମ ନେଇଥିଲା । ଜନ୍ମ ସମୟରେ ଶିଶୁ କନ୍ୟା ସୁସ୍ଥ ଥିଲା । ପରିବାର ଲୋକେ ଶିଶୁ କନ୍ୟାର ଫଟୋ ମଧ୍ୟ ଉଠାଇଥିଲେ । କିଛି ସମୟ ପରେ ଶିଶୁ କନ୍ୟା ଅସୁସ୍ଥ ଥିବା ଦର୍ଶାଇ ଡାକ୍ତର ଆଇସିୟୁରେ ଭର୍ତ୍ତି କରିବା ସହ ଶିଶୁର ସ୍ୱାସ୍ଥ୍ୟାବସ୍ଥା ସ୍ଥିର ଥିବା କହିଥିଲେ । ୧୨ ତାରିଖ ସକାଳେ ଶିଶୁ କନ୍ୟାର ଜେଜେମା ଦେଖିବାକୁ ଆଇସିୟୁକୁ ଯାଇଥିଲେ । ଡାକ୍ତରଖାନା କର୍ମଚାରୀ ଶିଶୁ କନ୍ୟାକୁ ମୃତ ଦର୍ଶାଇବା ସହ ତତ୍କ୍ଷଣାତ୍ ମୃତଦେହ ହସ୍ତାନ୍ତର କରିଥିଲେ । ଏଥିସହ ମହାନଦୀ ପଠାରେ ମୃତଦେହ ପୋତିଦେବାକୁ କହିଥିଲା । ମୃତ ଶିଶୁର ଶରୀର କପଡ଼ାରେ ଢାଙ୍କି ହୋଇ ରହିଥିଲା । ଶିଶୁକୁ ପୋତିବା ସମୟରେ ମୁହଁ ଦେଖିବା ପରେ ଏହା ତାଙ୍କ ଶିଶୁ କନ୍ୟା ନୁହେଁ ବୋଲି ସେମାନେ ଜାଣିଥିଲେ । କିଛି ସମୟ ପରେ ସେମାନେ ପୁନର୍ବାର ଉକ୍ତ ସ୍ଥାନକୁ ଯାଇ ବାଲି ଖୋଳି ଦେଖିଥିଲେ ହେଲେ ମୃତଦେହ ନଥିଲା କେବଳ କପଡ଼ା ମିଳିଥିଲା । ଏସ୍ସିବିରେ ତାଙ୍କ ଶିଶୁ ବଦଳ କରାଯାଇଥିବା ନେଇ ମେଡିକାଲ ଅଧୀକ୍ଷକଙ୍କ ନିକଟରେ ଅଭିଯୋଗ କରିଥିଲେ ମାତ୍ର କୌଣସି ସୁଫଳ ମିଳିନଥିଲା । ପରେ ସେମାନେ ମଙ୍ଗଳାବାଗ ଥାନାଧିକାରୀ, କଟକ ଡିସିପି ଓ କଟକ ଜିଲ୍ଲାପାଳଙ୍କ ନିକଟରେ ଅଭିଯୋଗ ଜଣାଇଥିଲେ । ସବୁଠୁ ନିରାଶ ହୋଇ ଆବେଦନକାରୀ ହାଇକୋର୍ଟଙ୍କ ଦ୍ୱାରସ୍ଥ ହୋଇଥିଲେ । ହାଇକୋର୍ଟ ମାମଲାକୁ ବିଚାର ନିମନ୍ତେ ଗ୍ରହଣ କରି ସମସ୍ତ ପ୍ରତିପକ୍ଷଙ୍କୁ ନୋଟିସ୍ କରିଛନ୍ତି ।
