ଭୁବନେଶ୍ୱର,୧୫/୦୬: ଅଧିକ ସୁଧର ଲୋଭ ଦେଖାଇ ୬ଟି  ରାଜ୍ୟରୁ ୧୨୩ କୋଟି ଠକିଥିବା ନିଧି ଫାଇନାନ୍ସର ନିର୍ଦ୍ଦେଶକ ତୁଷାର ଭଞ୍ଜଙ୍କୁ ୩ ଦିନିଆ ରିମାଣ୍ଡରେ ନେଇ ଜେରା କରୁଥିଲା ଇଓଡବ୍ଲ୍ୟୁ ।  ରିମାଣ୍ଡ ସମୟରେ ତା’ଠାରୁ ଅଧିକ ତଥ୍ୟ ମିଳିବ ବୋଲି ଇଓଡବ୍ଲ୍ୟୁ ଏସ୍‌ପି ଆଶା ରଖିଥିଲେ । ରିମାଣ୍ଡ ସରିଛି ହେଲେ ସେମିତି କିଛି ତଥ୍ୟ  ତା’ଠାରୁ ଆଦାୟ କରି ପାରିନି ଇଓଡବ୍ଲ୍ୟୁ । ହାତ ଗଣତି ଅନ୍ୟ କିଛି ନିର୍ଦ୍ଦେଶକଙ୍କ ଠିକଣା ପାଇ ଇଓଡବ୍ଲ୍ୟୁ ଖୁସ୍‌ ହୋଇଛି ।  

ଅଭିଯୁକ୍ତ ତୁଷାର ନିଧି ଫାଇନାନ୍ସ ସବୁ ନିୟମକୁ ଦଳି ମକଚି  ଓଡ଼ିଶା, ଝାଡ଼ଖଣ୍ଡ, ଆସାମ, ତ୍ରିପୁରା, ମହାରାଷ୍ଟ୍ର ଓ ପଶ୍ଚିମବଙ୍ଗରର  ୩୪ ହଜାର ନିବେଶକାରୀଙ୍କୁ ଠକେଇ କରିଥିଲା । ଚିଟ୍‌ଫଣ୍ଡ କମ୍ପାନୀ  ଭଳି ଅଧିକ ସୁଧର ଲୋଭ ଦେଖାଇ ୬ଟି ରାଜ୍ୟ ଓ ବାଂଲାଦେଶର ଜମାକାରୀଙ୍କଠୁ ସଂସ୍ଥା ୧୨୩ କୋଟି ଟଙ୍କା ଠକେଇ କରିଥିଲା ।  ଇଓଡବ୍ଲ୍ୟୁ ତୁଷାରକୁ ପଶ୍ଚିମବଙ୍ଗରୁ ଗିରଫ କରିଥିଲା । ହେଲେ ୧୨୩ କୋଟି ଟଙ୍କା କେଉଁଠି ଅଛି ସେ ବିଷୟରେ କିଛି ଜଣାପଡିନଥିଲା ।  କ୍ଷତିଗ୍ରସ୍ତ ଜମାକାରୀଙ୍କ ଟଙ୍କା କେଉଁଠି ନିବେଶ ହୋଇଛି ତାହା ଜାଣିବା ପାଇଁ ଇଓଡବ୍ଲ୍ୟୁର ଗତ ମଙ୍ଗଳବାର ଦିନ ୩ ଦିନ ରିମାଣ୍ଡରେ ଆଣି  ଜେରା କରୁଥିଲା । ଜେରା ସମୟରେ ଅନ୍ୟ କିଛି ନିର୍ଦ୍ଦେଶକଙ୍କ ଠିକଣା ମିଳିଥିଲା । ହେଲେ ନିବେଶକାରୀଙ୍କ ଅର୍ଥ କେଉଁଠି ବିନିଯୋଗ ହୋଇଛି  ସେ ବିଷୟରେ ତୁଷାର କୌଣସି ତଥ୍ୟ ଦେଇନଥିଲେ ।