ନୂଆଦିଲ୍ଲୀ,୦୯/୦୬: ସମଗ୍ର ଦେଶରେ ଉଭୟ ଗ୍ରାମାଞ୍ଚଳ ଓ ସହରାଞ୍ଚଳକୁ ବିଚାରକୁ ନେଲେ ଓଡ଼ିଶା ଏବଂ ପଶ୍ଚିମବଙ୍ଗରେ ଲୋକେ ଇନ୍ଧନ ଏବଂ ବିଜୁଳି କ୍ଷେତ୍ରରେ ସର୍ବାଧିକ ଖର୍ଚ୍ଚ କରୁଛନ୍ତି । ଖାଦ୍ୟ ସାମଗ୍ରୀ କ୍ଷେତ୍ରରେ ଓଡ଼ିଶାର ସହରାଞ୍ଚଳ ପରିବାର ସମାନଙ୍କ ମୋଟ୍ ଖର୍ଚ୍ଚ ମଧ୍ୟରୁ ଡାଲିରେ ୧୧.୭% ବ୍ୟୟ କରୁଛନ୍ତି । ସେହିଭଳି ଦୁଗ୍ଧ ଏବଂ ଦୁଗ୍ଧ ଜାତୀୟ ସାମଗ୍ରୀରେ ୧୦.୮%, ପରିବାରେ ୧୨.୮%, ଫଳରେ ୮.୪%, ଅଣ୍ଡା, ମାଛ ଓ ମାଂସରେ ୧୧.୩% ଖର୍ଚ୍ଚ ହେଉଛି । ସେହିଭଳି ପାନୀୟ ଏବଂ ପ୍ରକ୍ରିୟାକୃତ ଖାଦ୍ୟ କ୍ଷେତ୍ରରେ ସର୍ବାଧିକ ୨୬.୫% ଏବଂ ଅନ୍ୟ ଆନୁଷଙ୍ଗିକ କ୍ଷେତ୍ରରେ ୧୮.୫% ଖର୍ଚ୍ଚ କରୁଛନ୍ତି ରାଜ୍ୟର ଲୋକେ । ପରିସଂଖ୍ୟାନ ଏବଂ ଯୋଜନା କାର୍ଯ୍ୟାନ୍ୱୟନ ମନ୍ତ୍ରଣାଳୟ ପକ୍ଷରୁ ଜାରି ପାରିବାରିକ ଖର୍ଚ୍ଚ ସର୍ଭେରୁ ଏହା ଜଣାପଡିଛି ।
ରିପୋର୍ଟ ଅନୁସାରେ, ଓଡ଼ିଶାର ଗ୍ରାମାଞ୍ଚଳରେ ଲୋକେ ଡାଲିରେ ୧୨.୮%, ଦୁଗ୍ଧ ଏବଂ ଦୁଗ୍ଧ ଜାତୀୟ ସାମଗ୍ରୀରେ ୬.୮%, ପନିପରିବାରେ ୧୫.୩%, ଫଳ ୬.୬%, ଅଣ୍ଡା, ମାଛ ଓ ମାଂସରେ ୧୩.୧%, ପାନୀୟ ଏବଂ ପ୍ରକ୍ରିୟାକୃତ ଖାଦ୍ୟ କ୍ଷେତ୍ରରେ ୨୨.୯% ଏବଂ ଅନ୍ୟ କ୍ଷେତ୍ରରେ ୨୨.୫% ଖର୍ଚ୍ଚ କରୁଛନ୍ତି ।
ରାଜ୍ୟର ଗ୍ରାମାଞ୍ଚଳରେ ଅଣ ଖାଦ୍ୟ ସାମଗ୍ରୀ କ୍ଷେତ୍ରରେ ଖର୍ଚ୍ଚକୁ ଦେଖିଲେ ପୋଷାକ, ବେଡିଂ ଏବଂ ଜୋତାରେ ୧୩.୨%, ସୁବିଧା ପାଇଁ ୧୨.୫%, ଟିଭି ଫ୍ରିଜ ଭଳି ଆପ୍ଲାଏନ୍ସେସ୍ ପାଇଁ ୧୦.୪%, ଶିକ୍ଷା ପାଇଁ ୪.୬%, ଇନ୍ଧନ ଏବଂ ଆଲୋକ ଲାଗି ୧୭%, ମେଡିକାଲ ୧୩.୨%, ସଙ୍ଗୀତ ମନୋରଞ୍ଜନ ବାବଦକୁ ୧୨.୬% ଏବଂ ଅନ୍ୟ ସବୁ କ୍ଷେତ୍ରରେ ୧୬.୬% ଖର୍ଚ୍ଚ ହେଉଛି ।
ଅଣ ଖାଦ୍ୟ ସାମଗ୍ରୀ କ୍ଷେତ୍ରରେ ସହରାଞ୍ଚଳରେ ପୋଷାକ, ବେଡିଂ ଏବଂ ଜୋତାରେ ୧୦.୪%, ସୁବିଧା ପାଇଁ ୧୪%, ଟିଭି ଫ୍ରିଜ ଭଳି ଜିନିଷ ପାଇଁ ୧୩.୨%, ଶିକ୍ଷା ପାଇଁ ୭.୨%, ଇନ୍ଧନ ଏବଂ ଆଲୋକ ଲାଗି ୧୧.୫%, ମେଡିକାଲ ୯.୧%, ସଙ୍ଗୀତ ମନୋରଞ୍ଜନ ବାବଦକୁ ୧୦.୭% ଏବଂ ଅନ୍ୟ ସବୁ କ୍ଷେତ୍ରରେ ୧୨୩.୯% ଖର୍ଚ୍ଚ ହେଉଛି ।
ରିପୋର୍ଟ ଅନୁସାରେ ଦେଶର ଗ୍ରାମାଞ୍ଚଳ ଏବଂ ସହରାଞ୍ଚଳରେ ପରିବାର ଗୁଡିକ ମୃଦୁପାନୀୟ, ରିଫ୍ରେସମେଣ୍ଟ ଏବଂ ପ୍ରକ୍ରିୟାକୃତ ଖାଦ୍ୟ ସାମଗ୍ରୀରେ ସେମାନଙ୍କ ଖର୍ଚ୍ଚର ଅଧିକାଂଶ ଭାଗ ଖର୍ଚ୍ଚ କରୁଛନ୍ତି । ତେବେ ଅନ୍ୟ କିଛି ରାଜ୍ୟରେ ଏହି ଧାରା ଭିନ୍ନ । କିଛି ରାଜ୍ୟରେ ଦୁଗ୍ଧ ଏବଂ ଦୁଗ୍ଧ ଜାତୀୟ ଖାଦ୍ୟ ସାମଗ୍ରୀ ସହ ମାଛ, ମାଂସ ଏବଂ ଅଣ୍ଡାରେ ଅଧିକ ଖର୍ଚ୍ଚ ହେଉଛି ।
ଦେଶର ବିଭିନ୍ନ ରାଜ୍ୟଗୁଡିକୁ ବିଚାରକୁ ନେଲେ ଗ୍ରାମାଞ୍ଚଳରେ ହରିୟାଣାର ପରିବାରଗୁଡିକ ମୋଟ ଖାଦ୍ୟ ଖର୍ଚ୍ଚର ସର୍ବାଧିକ ୪୧.୭% ଦୁଗ୍ଧ ଏବଂ ଦୁଗ୍ଧ ଜାତୀୟ ସାମଗ୍ରୀରେ ବ୍ୟୟ କରୁଛନ୍ତି । ସେହିଭଳି କେରଳରେ ଲୋକେ ଅଣ୍ଡା, ମାଛ ଏବଂ ମାଂସରେ ସେମାନଙ୍କ ମୋଟ ଖର୍ଚ୍ଚର ୨୩.୫% ବ୍ୟୟ କରୁଥିବା ଜଣାପଡିଛି ।
ରାଜସ୍ଥାନର ସହରାଞ୍ଚଳରେ ଦୁଗ୍ଧ ଏବଂ ଦୁଗ୍ଧ ଜାତୀୟ ସାମଗ୍ରୀରେ ୩୩.୨% ଖର୍ଚ୍ଚ ହେଉଛି । ଏହା ପଛକୁ ରହିଥିବା ହରିୟାଣା ଏବଂ ପଞ୍ଜାବ ଏ କ୍ଷେତ୍ରରେ ଯଥାକ୍ରମେ ୩୩.୧% ଏବଂ ୩୨.୩% ଖର୍ଚ୍ଚ କରିଛନ୍ତି । କେରଳ ରାଜ୍ୟ ଅଣ୍ଡା, ମାଛ ଏବଂ ମାଂସରେ୧୯.୮% ଖର୍ଚ୍ଚ କରୁଛି । ସେହିଭଳି ରାଜସ୍ଥାନ, ପଞ୍ଜାବ, ଗୁଜରାଟ, ଉତ୍ତରପ୍ରଦେଶ ଏବଂ ମଧ୍ୟପ୍ରଦେଶ ଭଳି ରାଜ୍ୟରେ ଗ୍ରାମାଞ୍ଚଳରେ ଲୋକମାନେ ଦୁଗ୍ଧ ଏବଂ ଦୁଗ୍ଧ ଜାତୀୟ ଖାଦ୍ୟ ସାମଗ୍ରୀରେ ଅଧିକ ଖର୍ଚ୍ଚ କରୁଛନ୍ତି ।
ପ୍ରମୁଖ ରାଜ୍ୟ ଗୁଡିକର ଖାଦ୍ୟ ସାମଗ୍ରୀ ଖର୍ଚ୍ଚ କ୍ଷେତ୍ରରେ ପାନୀୟ ଏବଂ ପ୍ରକ୍ରିୟାକୃତ ଖାଦ୍ୟର ଅଂଶ ସର୍ବାଧିକ ରହିଛି । ତାମିଲନାଡୁରେ ଏହା ସର୍ବାଧିକ । ଏଠାକାର ଗ୍ରାମାଞ୍ଚଳ ଏବଂ ସହରାଞ୍ଚଳରେ ଏହା ଯଥାକ୍ରମେ ୨୮.୪% ଏବଂ ୩୩.୭% । ଗ୍ରାମାଞ୍ଚଳରେ ପାରିବାରିକ ଖର୍ଚ୍ଚର ୪୬% ଖାଦ୍ୟ ସାମଗ୍ରୀ ଥିବା ବେଳେ ଏଥିରେ ପାନୀୟ, ରିଫ୍ରେସ୍ମେଣ୍ଟ ଏବଂ ପ୍ରକ୍ରିୟାକୃତ ଖାଦ୍ୟର ଅଂଶ ୯.୬୨% । ସେହିଭଳି ଦୁଗ୍ଧ ଏବଂ ଦୁଗ୍ଧ ଜାତୀୟ ସାମଗ୍ରୀ ୮.୩୩%, ପନିପରିବାର ଅଂଶ ୫.୩୮% ରହିଛି ।
ଡାଲିଜାତୀୟ ସାମଗ୍ରୀ ପାଇଁ ଖର୍ଚ୍ଚ ହେଉଛି ୪.୯୧% । ଏହବାଦ୍ ସହରାଞ୍ଚଳରେ ଲୋକେ ଖାଦ୍ୟ ସାମଗ୍ରୀ ପାଇଁ ୩୯% ଖର୍ଚ୍ଚ କରୁଛନ୍ତି । ସହରାଞ୍ଚଳରେ ମଧ୍ୟ ଲୋକମାନେ ପାନୀୟ, ରିଫ୍ରେସମେଣ୍ଟ ଏବଂ ପ୍ରକ୍ରିୟାକୃତ ଖାଦ୍ୟରେ ଅଧିକ ଖର୍ଚ୍ଚ କରୁଛନ୍ତି, ଯାହା ୧୦.୬୪% ରହିଛି । ଅପରପକ୍ଷେ ଦୁଗ୍ଧ ଏବଂ ଦୁଗ୍ଧ ଜାତୀୟ ସାମଗ୍ରୀରେ ୭.୨୨% ଏବଂ ଫଳ ଓ ପନିପରିବାରେ ଯଥାକ୍ରମେ ୩.୮% ଲେଖାଏଁ ଖର୍ଚ୍ଚ କରୁଥିବା ସର୍ଭେରୁ ଜଣାପଡ଼ିଛି ।