ନୂଆଦିଲ୍ଲୀ,୧୫/୦୬: ଲୋକସଭା ନିର୍ବାଚନ ପରେ ପୁଣି ଏନ୍ଡିଏ ସରକାର ଦେଶର କମାଣ ସମ୍ଭାଳିଛନ୍ତି । ଏଥିସହ ଅର୍ଥନୀତିକୁ ନେଇ ଖୁସି ଖବର ଆସିବା ଆରମ୍ଭ ହୋଇଯାଇଛି । ନିକଟରେ ବିଶ୍ୱ ବ୍ୟାଙ୍କ ପ୍ରକାଶ କରିଥିଲା ଯେ, ଭାରତର ଅଭିବୃଦ୍ଧି ଆଗକୁ ବି ଜାରି ରହିବ । ଏବେ ଗ୍ଲୋବାଲ ରେଟିଂ ଏଜେନ୍ସି ମୁଡିସ୍ର ନୂଆ ରିପୋର୍ଟରେ ଉଲ୍ଲେଖ କରାଯାଇଛି ଯେ, ଭାରତ ୨୦୨୪ରେ ଏସିଆ ପାସିଫିକ୍ରେ ସବୁଠାରୁ ଦ୍ରୁତ ଅଭିବୃଦ୍ଧିଶୀଳ ଅର୍ଥନୀତି ଭାବେ ଉଭା ହେବ । ରେଟିଂ ଏଜେନ୍ସିର କହିବାନୁସାରେ, ଘରୋଇ ସ୍ତରରେ ଚାହିଦା ଜାରି ରହିବ । ନୀତିରେ ମଧ୍ୟ ନିରନ୍ତରତା ରହିବ । ଭିତ୍ତିଭୂମି ବିକାଶ ଏବଂ ଘରୋଇ କ୍ଷେତ୍ରରେ ନିବେଶକୁ ପ୍ରୋତ୍ସାହନ ଅର୍ଥବ୍ୟବସ୍ଥାକୁ ଦ୍ରୁତ ବେଗରେ ଅଗ୍ରସର କରାଇବ ।
‘କ୍ରେଡିଟ୍ କଣ୍ଡିସନ୍ସ-ଏସିଆ ପାସିଫିକ୍ ଏଚ୍୨ ୨୦୨୪ କ୍ରେଡିଟ୍ ଆଉଟ୍ଲୁକ୍’ ରିପୋର୍ଟ ଇତି ମଧ୍ୟରେ ଜାରି କରାଯାଇଛି । ଏଥିରେ ମୁଡିସ୍ ପ୍ରକାଶ କରିଛି ଯେ, ୨୦୨୪ର ପ୍ରଥମ ୬ ମାସରେ ଇଣ୍ଡୋନେସିଆ, ଫିଲିପାଇନ୍ସ ଏବଂ ଭାରତ ଅଭିବୃଦ୍ଧି ହାରରେ ଅଗ୍ରଣୀ ରହିବେ । ଏହା ଉଲ୍ଲେଖ କରିଛି ଯେ, କମ୍ପାନି ଆୟ ଉନ୍ନତ ରହିବା କାରଣରୁ ଭାରତ ଏବଂ ଏସୀୟ ଅର୍ଥନୀତିଗୁଡ଼ିକରେ ଅଧିକ ପୋର୍ଟଫୋଲିଓ ନିବେଶ ଆସିବ ।
ଗତ ମେ’ରେ ମୁଡିସ୍ ଅନୁମାନ କରିଥିଲା ଯେ, ଚଳିତ କ୍ୟାଲେଣ୍ଡର ବର୍ଷରେ ଭାରତୀୟ ଅର୍ଥବ୍ୟବସ୍ଥା ୬.୮% ହାରରେ ବଢ଼ିପାରେ । ୨୦୨୫ରେ ଏହା ୬.୫% ରହିପାରେ । ଲୋକ ସଭା ନିର୍ବାଚନ ପରେ ନୀତିରେ ନିରନ୍ତରତା ଜାରି ରହିବା କାରଣରୁ ଭାରତର ଅଭିବୃଦ୍ଧି ବଜାୟ ରହିବ ବୋଲି ମୁଡିସ୍ ପ୍ରକାଶ କରିଛି ।
ସରକାରୀ ତଥ୍ୟ ଅନୁସାରେ, ୨୦୨୩- ୨୪ ଆର୍ଥିକବର୍ଷରେ ଭାରତର ବାସ୍ତବ ଜିଡିପି ଅଭିବୃଦ୍ଧି ୮.୨% ରହିଛି । ଏହା ବିଶ୍ୱରେ ସବୁଠାରୁ ଦ୍ରୁତ ଅଭିବୃଦ୍ଧି । ଏହାକୁ ଦୃଷ୍ଟିରେ ରଖି ଭାରତୀୟ ରିଜର୍ଭ ବ୍ୟାଙ୍କ(ଆର୍ବିଆଇ) ଚଳିତ ଆର୍ଥିକବର୍ଷ ପାଇଁ ଭାରତର ଅଭିବୃଦ୍ଧି ଅନୁମାନକୁ ୭.୨%କୁ ବଢ଼ାଇଦେଇଛି । ପୂର୍ବରୁ ସର୍ବୋଚ୍ଚ ବ୍ୟାଙ୍କର ଅନୁମାନ ଥିଲା ୭%। ବିଶ୍ୱ ବ୍ୟାଙ୍କ ମଧ୍ୟ ଭାରତ ପାଇଁ ଏହାର ଅଭିବୃଦ୍ଧି ଅନୁମାନକୁ ସଂଶୋଧିତ କରିଛି । ଏହା ପ୍ରକାଶ କରିଛି ଯେ, ୨୦୨୪-୨୫ ଆର୍ଥିକବର୍ଷରେ ଭାରତର ଅଭିବୃଦ୍ଧି ୬.୬% ରହିବ । ଏହାର ପୂର୍ବ ଆକଳନ ଥିଲା ୬.୪% ।
ବିଶ୍ୱବ୍ୟାଙ୍କ ଆହୁରି ପ୍ରକାଶ କରିଛି ଯେ, ଭାରତ ବିଶ୍ୱର ସର୍ବବୃହତ୍ ଅର୍ଥନୀତିଗୁଡ଼ିକ ମଧ୍ୟରେ ଦ୍ରୁତ ଅଭିବୃଦ୍ଧିଶୀଳ ରହିବ । ମଜଭୁତ ଘରୋଇ ନିବେଶ ଏବଂ ଚାହିଦା ବୃଦ୍ଧି ଯୋଗୁ ଏହା ଭାରତର ଅଭିବୃଦ୍ଧି ଅନୁମାନକୁ ସଂଶୋଧିତ କରିଛି । ଭାରତରେ ଶିଳ୍ପ ଗତିବିଧି ବଢୁଛି । ବିନିର୍ମାଣ ଏବଂ ନିର୍ମାଣ କ୍ଷେତ୍ରରେ ଉତ୍ସାହ ଦେଖିବାକୁ ମିଳୁଛି । ଏହା ଅଭିବୃଦ୍ଧିକୁ ତ୍ୱରାନ୍ୱିତ କରୁଥିବା ବିଶ୍ୱବ୍ୟାଙ୍କ ପ୍ରକାଶ କରିଛି । ୨୦୨୫- ୨୬ ପାଇଁ ବିଶ୍ୱ ବ୍ୟାଙ୍କ ଭାରତର ଅଭିବୃଦ୍ଧି ଅନୁମାନକୁ ୬.୫%ରୁ ବଢ଼ାଇ ୬.୭% କରିଛି ।
