ଦୁବାଇ, ୧୬/୦୯: ସଦ୍ୟ ଘୋଷିତ ଆଇସିସି ଦିନିକିଆ ମାନ୍ୟତା ତାଲିକାରେ ପାକିସ୍ତାନକୁ ହଟାଇ ଅଷ୍ଟ୍ରେଲିଆ ଶୀର୍ଷ ସ୍ଥାନ ଦଖଲ କରିଛି। ଏସିଆ କପ୍ ସୁପର-୪ ରାଉଣ୍ଡ୍ ମ୍ୟାଚ୍ରେ ଆୟୋଜକ ଶ୍ରୀଲଙ୍କା ନିକଟରୁ ପରାଜିତ ହେବା ପରେ ପାକିସ୍ତାନ ତୃତୀୟ ସ୍ଥାନକୁ ଖସିଯାଇଛି। ଅନ୍ୟ ପଟରେ ଏସିଆ କପ୍ ଫାଇନାଲ୍ରେ ପ୍ରବେଶ କରିଥିବା ଭାରତ ଦ୍ୱିତୀୟ ସ୍ଥାନକୁ ଉନ୍ନୀତ ହୋଇଛି । ଅଷ୍ଟ୍ରେଲିଆ ମୋଟ ୧୧୮ପଏଣ୍ଟ ସହ ଶୀର୍ଷରେ ରହିଥିବାବେଳେ ଭାରତ ମାତ୍ର ୨ପଏଣ୍ଟ ପଛୁଆ ରହି ଦ୍ୱିତୀୟରେ ରହିଛି ।
ରୋହିତବାହିନୀଙ୍କ ନିକଟରେ ଶୀର୍ଷ ସ୍ଥାନ ଦଖଲ କରିବାର ସୁଯୋଗ ରହିଛି । ଭାରତୀୟ ଦଳ ଏବେ ଟେଷ୍ଟ ଓ ଟି-ଟ୍ୱେଣ୍ଟିରେ ଏକ ନମ୍ବର ସ୍ଥାନରେ ରହିଛି । ଦିନିକିଆ ଏକ ନମ୍ବର ସ୍ଥାନ ପାଇଁ ଅଷ୍ଟ୍ରେଲିଆ ଓ ଭାରତ ମଧ୍ୟରେ ଲଢ଼େଇ ହେବ । ଅଷ୍ଟ୍ରେଲିଆ ଦଳ ଆଗାମୀ ବିଶ୍ୱକପ୍ ପୂର୍ବରୁ ଭାରତ ଗସ୍ତରେ ଆସି ୩ଟି ଦିନିକିଆ ଖେଳିବାର କାର୍ଯ୍ୟକ୍ରମ ରହିଛି।