ଢେଙ୍କାନାଳ,୦୯/୦୯: ସଦର ଥାନା ଭାପୁର ଫାଣ୍ଡି ଅଞ୍ଚଳରେ ଜଣେ ଅସହାୟ ଯୁବତୀଙ୍କୁ ମାସାଧିକକାଳ ଗଣଦୁଷ୍କର୍ମ ମାମଲାରେ ପୁଲିସ ୪ ଅଭିଯୁକ୍ତଙ୍କୁ ଉଠାଇ ଆଣିଛି । ଚିହ୍ନଟ ହୋଇଥିବା ଆଉ ୨ ଅଭିଯୁକ୍ତଙ୍କ ସମେତ ଏହି ଘଟଣାରେ ସମ୍ପୃକ୍ତ ଅନ୍ୟମାନଙ୍କୁ ଧରିବାକୁ ପୁଲିସ ଟିମ୍ ତନାଘନା ଚଳାଇଛି । ମାମଲା ରୁଜୁ ହେବା ସହ ପୀଡ଼ିତାଙ୍କ ଡାକ୍ତରୀ ପରୀକ୍ଷା ଓ ବୟାନ ରେକର୍ଡ କରାଯାଇଛି ।
ରବିବାର ପୂର୍ବାହ୍ନରେ ସଖୀକେନ୍ଦ୍ରର କର୍ମଚାରୀମାନେ ପୀଡ଼ିତାଙ୍କୁ ନେଇ ସଦର ଥାନାରେ ପହଞ୍ଚିଥିଲେ । ପୁଲିସ ପ୍ରଥମେ ପୀଡ଼ିତାଙ୍କୁ କାଉନସେଲିଂ କରି ଘଟଣା ସମ୍ପର୍କରେ ପଚାରି ବୁଝିଥିଲା । କେଉଁ କେଉଁମାନେ ଏପରି ଗଣ ଦୁଷ୍କର୍ମ କରି ଆସୁଥିଲେ ପୀଡ଼ିତା ଗୋଟି ଗୋଟି କରି ବଖାଣିଥିଲେ । ସେହିଆଧାରରେ ଏତଲା ଲେଖାଯିବା ସହ ମାମଲା ରୁଜୁ କରାଯାଇଛି । ଭାରତୀୟ ନ୍ୟାୟ ସଂହିତା(ବିଏନ୍ଏସ୍ ଆକ୍ଟ) ୧୮୦ରେ ପୀଡ଼ିତାଙ୍କ ବୟାନ ରେକର୍ଡ କରାଇଛି ପୁଲିସ । ପୀଡ଼ିତାଙ୍କ ବୟାନ ଅନୁଯାୟୀ ପୁଲିସ ଗାଁରେ ପହଞ୍ଚି ୪ ଜଣ ଅଭିଯୁକ୍ତଙ୍କୁ ଥାନାକୁ ଉଠାଇ ଆଣି ପଚରାଉଚୁରା କରୁଛି । ଅନ୍ୟ ୨ ଜଣ ଫେରାର୍ ଥିବା ବେଳେ ସେମାନଙ୍କୁ ଧରିବାକୁ ତନାଘନା ଚଳାଇଛି । ଜଣେ ଅଭିଯୁକ୍ତର କିଛି ମାସ ପୂର୍ବରୁ ମୃତ୍ୟୁ ହୋଇ ସାରିଥିବା ଜଣାଯାଇଛି ।
ଅନ୍ୟପକ୍ଷରେ ଏହି ସମ୍ବେଦନଶୀଳ ଘଟଣାକୁ ନେଇ ଉପମୁଖ୍ୟମନ୍ତ୍ରୀ ପ୍ରଭାତୀ ପରିଡ଼ା ଟ୍ୱିଟ୍ କରି ଜଣାଇଛନ୍ତି ଯେ ମୁଁ ଏହି ଘଟଣାରେ ମୁଁ ଗଭୀର ଭାବେ ମର୍ମାହତ । ଏହି ବିଷୟରେ ଏସ୍ପିଙ୍କ ସହିତ ଆଲୋଚନା କରିବା ସହିତ ଦୋଷୀଙ୍କ ବିରୋଧରେ ଦୃଢ଼ କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ନିର୍ଦ୍ଦେଶ ଦେଇଛି । ଡିଏସ୍ପି ର୍ୟାଙ୍କର ଜଣେ ଅଧିକାରୀଙ୍କ ନେତୃତ୍ୱରେ ଏକ ଟିମ୍ ଏହି ଘଟଣାର ତଦନ୍ତ କରିବ ବୋଲି ସୂଚନା ମିଳିଛି ।
ସୂଚନାଯୋଗ୍ୟ, ଢେଙ୍କାନାଳ ସଦର ଥାନା ଭାପୁର ଫାଣ୍ଡି ଅଞ୍ଚଳରେ ପୀଡ଼ିତାଙ୍କ ବାପା ଘରଜ୍ୱାଇଁ ଭାବେ ଶ୍ୱଶୁର ଘରେ ରହୁଥିଲେ । ମା’ଙ୍କ ମୃତ୍ୟୁ ପରେ ସମ୍ପର୍କୀୟମାନେ ସମ୍ପତ୍ତି ବାଡ଼ି ଛଡ଼ାଇ ନେଇଥିଲେ । ରକ୍ଷଣାବେକ୍ଷଣ ଅଭାବରୁ ଘରଦ୍ୱାର ଭାଙ୍ଗି ଯାଇଥିଲା । ଯେଉଁ ଘରେ ରହୁଥିଲେ ତାହାର କବାଟ ଭିତରୁ ବନ୍ଦ କରି ହେଉନଥିଲା । ବାପାଙ୍କ ମାନସିକ ବିକାରଗ୍ରସ୍ତ ଥିବାର ଫାଇଦା ନେଇ ଗାଁର ୭ ଜଣ ଯୁବକ ଏପରି କାଣ୍ଡ ଭିଆଇ ଆସୁଥିଲେ ।
