କାକଟପୁର,୨୫/୦୩: କାକଟପୁର ଅଞ୍ଚଳରେ ବେଧଡ଼କ ଭାବେ ଚାଲିଛି ନକଲି ମୃଦୁ ପାନୀୟ କାରବାର । ବିନା ଲାଇସେନ୍ସରେ ବିକ୍ରି ହେଉଛି ପାଣି ପାଉଚ୍, ପାଣି ବୋତଲ, ସୋଢ଼ା ଓ ବିଭିନ୍ନ ପ୍ରକାର ଥଣ୍ଡା ପାନୀୟ । ପୁଲିସ୍ ଓ ଜିଲ୍ଲା ପ୍ରଶାସନର ଅଧିକାରୀମାନେ ସବୁ ଜାଣି ଚୁପ୍ ବସିଛନ୍ତି ।
ଏହି ନକଲି ମୃଦୁ ପାନୀୟ ପିଇବା ଦ୍ୱାରା ଲୋକେ ବିଭିନ୍ନ ପ୍ରକାର ପେଟ ରୋଗରେ ଆକ୍ରାନ୍ତ ହେଉଛନ୍ତି ବୋଲି ଅଞ୍ଚଳର ଜଣେ ପ୍ରତିଷ୍ଠିତ ଡାକ୍ତର ପ୍ରକାଶ କରିଛନ୍ତି । ଦୋକାନରେ ଯେଉଁ କମ୍ପାନି ଗୁଡ଼ିକର ପାଣି ପାଉଚ୍, ପାଣି ବୋତଲ ଓ ଥଣ୍ଡା ବିକ୍ରି ହେଉଛି ଅଧିକାଂଶ ଗାଇଡ୍ଲାଇନ୍ ଉଲ୍ଲଙ୍ଘନ କରୁଥିବା ଅଭିଯୋଗ ହୋଇଛି । କାରଣ ଏହାର ବ୍ୟବହାର ଓ ଅବଧି ସଂପର୍କରେ କୌଣସି ସୂଚନା ଦିଆଯାଉନି
କେତେକ ମାଲିକ ଅଧିକ ଲାଭ ଆଶାରେ ବାହାରୁ ନାମୀଦାମୀ କମ୍ପାନିର ଲୋଗୋ ଥିବା ଜରି ଓ ଖାଲି ବୋତଲ କିଣି ଏଠାରେ ଦୂଷିତ ଜଳ ସହିତ ବିଭିନ୍ନ ପ୍ରକାର ଫ୍ଲେଭର ମିଶାଇ ମୃଦୁ ପାନୀୟ ପ୍ରସ୍ତୁତ କରୁଛନ୍ତି । ପରେ ଏହାକୁ ସିଲ୍ କରି ବଜାରକୁ ଛାଡୁଛନ୍ତି । ପାଣି ଓ ଥଣ୍ଡା ଉତ୍ପାଦନ ପ୍ରସ୍ତୁତ କରିବା ପାଇଁ ସରକାରଙ୍କ ଏକାଧିକ ନୀତି ନିୟମ ରହିଛି । କମ୍ପାନିର ଟ୍ରେଡ୍ମାର୍କ, ପାଣିର ଟେଷ୍ଟିଂ ସାର୍ଟିଫିକେଟ୍, ଲାବୋରେଟୋରି ସାର୍ଟିଫିକେଟ, ବିଏସ୍ଆଇ, ଆଇଏସ୍ଆଇ ମାନ୍ୟତା ସାର୍ଟିଫିକେଟ୍, ଫୁଡ୍ ଲାଇସେନ୍ସ ଆଦି ଏକାଧିକ ସର୍ତ୍ତାବଳୀ ରହିବା ବାଧ୍ୟତାମୂଳକ । ଏଠାରେ ଥିବା ବେନାମୀ ପାଣି କମ୍ପାନିମାନେ ଏସବୁ ନୀତି ନିୟମକୁ ଦଳିମକଚି ଦେଉଛନ୍ତି । କେବଳ ଲୋକ ଦେଖାଣିଆ ଭାବେ ଫୁଡ୍ ଲାଇସେନ୍ସ ହାତେଇ ପାଣି ଉତ୍ପାଦନ ହେଉଥିବା କାରଖାନା କାନ୍ଥରେ ଟାଙ୍ଗୀ ଦେଇ ଦୀର୍ଘଦିନ ଧରି ବେପାର ଚଳାଇ ଆସୁଛନ୍ତି।
ପାଣି ପାଉଚ୍ ଓ ଥଣ୍ଡା ବୋତଲ କିଛିଦିନ ରହିବା ପରେ ଏହାର ସ୍ୱାଦ ଏବଂ ଗନ୍ଧ ଅଲଗା ଲାଗୁଥିବା ଅଭିଯୋଗ ହେଉଛି । ପାଣି ଓ ଥଣ୍ଡା ପ୍ୟାକିଂ ପୂର୍ବରୁ ଏହାର ନମୁନା ବିଆଇସି ଲ୍ୟାବ୍କୁ ପଠାଇ ଏହାର ଗୁଣବତ୍ତା ଯାଞ୍ଚ କରିବା ଆବଶ୍ୟକତା ଥିବା ବେଳେ ଉପରୋକ୍ତ ମାନଦଣ୍ଡକୁ ପୂରଣ କରିବା ପାଇଁ ଅଧିକ ବ୍ୟୟବହୁଳ ହୋଇଥିବାରୁ ଅସାଧୁ ମାଲିକମାନେ ଏହାକୁ ପାଳନ କରୁନାହାନ୍ତି । କେବଳ ଜିଲ୍ଲା ସ୍ୱାସ୍ଥ୍ୟ ବିଭାଗ ପକ୍ଷରୁ କୌଣସି ଉପାୟରେ ଫୁଡ୍ ଲାଇସେନ୍ସ ହାତେଇ ଦୀର୍ଘଦିନ ଧରି ଅନାୟାସରେ ବେପାର ଚଳାଇ ଆସୁଛନ୍ତି । ସ୍ଥାନୀୟ ପୁଲିସ୍ ଓ ଜିଲ୍ଲା ପ୍ରଶାସନ ଏ ଦିଗରେ ଦୃଷ୍ଟି ଦେବା ସହ ଏକ ସ୍ୱତନ୍ତ୍ର ସ୍କ୍ୱାଡ୍ ଗଠନ କରି କାର୍ଯ୍ୟାନୁଷ୍ଠାନ ଗ୍ରହଣ ପାଇଁ କାକଟପୁର ଦୁର୍ନୀତି ସଂଘର୍ଷ ମଞ୍ଚ ପକ୍ଷରୁ ଦାବି କରାଯାଇଛି ।
