ଭୁବନେଶ୍ୱର,୨୫/୩ : ରାଜ୍ୟରେ ୪୦% ସ୍ତ୍ରୀ ରୋଗ ଓ ପ୍ରସୂତି ବିଭାଗ ଡାକ୍ତର ପଦବିରେ ବିଶେଷଜ୍ଞ ନାହାନ୍ତି । ୫୮୪ ମଞ୍ଜୁରିପ୍ରାପ୍ତ ପଦବି ମଧ୍ୟରେ ୩୫୧ ଜଣ ବିଶେଷଜ୍ଞ ରହିଥିଲା ବେଳେ ୨୩୩ ଖାଲି ପଡ଼ିଛି । ମହିଳାଙ୍କ ଚିତ୍କାର ଶୁଣିବାକୁ କେହି ନାହାନ୍ତି । ଉପଯୁକ୍ତ ଚିକିତ୍ସା ନପାଇ ମହିଳା ଛଟପଟ ହେଉଛନ୍ତି । ମହିଳାଙ୍କ ଯନ୍ତ୍ରଣା ପ୍ରତି ସମ୍ବେଦନଶୀଳ ନୁହନ୍ତି ରାଜ୍ୟ ସରକାର । ସ୍ତ୍ରୀ ରୋଗ ଓ ପ୍ରସୂତି ଜନିତ ସମସ୍ୟା ହେଲେ କେଉଁ ସ୍ତ୍ରୀ ରୋଗ ବିଶେଷଜ୍ଞଙ୍କ ପାଖକୁ ଯିବେ ଭାବିଲା ବେଳକୁ ଚାରିଆଡ଼େ ଅନ୍ଧାର ଦେଖା ଦେଉଛି । ରାଜ୍ୟରେ ସ୍ତ୍ରୀ ଓ ପ୍ରସୂତି ବିଭାଗରେ ବିଚିତ୍ର ପରିସ୍ଥିତି ସୃଷ୍ଟି ହୋଇଛି ।
ନୟାଗଡ଼ ଜିଲ୍ଲାରେ କିଶୋରୀ ଓ ମହିଳାଙ୍କ ରୋଗ ଯନ୍ତ୍ରଣାରେ କଲବଲ । ଜିଲ୍ଲାରେ ଜଣେ ହେଲେ ବିଶେଷଜ୍ଞଙ୍କୁ ନିଯୁକ୍ତି କରିପାରିନାହାନ୍ତି ରାଜ୍ୟ ସରକାର । ଜିଲ୍ଲାରେ ୧୬ ମଞ୍ଜୁରିପ୍ରାପ୍ତ ପଦବିରେ ଶୂନ୍ୟ ପଡ଼ିଛି ବିଶେଷଜ୍ଞଙ୍କ ସଂଖ୍ୟା । ସିଏ ପ୍ରସୂତି ଯନ୍ତ୍ରଣା ହେଉ ବା ସ୍ତ୍ରରୋଗ ସମସ୍ୟା କାହାପାଖକୁ ଯଦି ଥଳକୂଳ ପାଉନାହାନ୍ତି । ସାଧାରଣ ଓ ଗରିବ ରୋଗୀଙ୍କ ଚିନ୍ତା ବଢ଼ିଯାଉଛି । ରାୟଗଡ଼ାରେ ସେହି ସମାନ ସ୍ଥିତି ଉପୁଜିଛି । ସେଠାରେ ୧୮ ପଦବିରେ ୧୩ ଜଣ ବିଶେଷଜ୍ଞ ନାହାନ୍ତି । ଜିଲ୍ଲାରେ ସଙ୍ଗିନ ସ୍ଥିତି ଉପୁଜିଛି । ମାଲକାନଗିରି ଜିଲ୍ଲାରେ ୧୫ରୁ ୧୦ ପଦବି ଖାଲି ପଡ଼ିଛି । କନ୍ଧମାଳରେ ୨୧ ପଦବିରେ ୧୪ ବିଶେଷଜ୍ଞ ପଦ ଶୂନ୍ୟ ରହିଛି । କେନ୍ଦଝରରେ ୨୪ ଡାକ୍ତରଙ୍କ ସ୍ଥାନରେ ଅଛନ୍ତି ୧୫ ଡାକ୍ତର ଓ ଖାଲି ପଡ଼ିଛି ୧୧ ପଦବି । ନୂଆପଡ଼ାରେ ୧୨ରୁ ଖାଲିପଡ଼ିଛି ୭ ବିଶେଷଜ୍ଞ ପଦବି । ବୌଦ୍ଧରେ ୧୦ରୁ ୭ ପଦବି ଫାଙ୍କା ରହିଛି । କୋରାପୁଟ୍ରେ ୨୧ରୁ ୯ ପଦବିରେ କେହି ନାହାନ୍ତି । ବିଶେଷ କରି ଆଦିବାସୀ ବହୁଳ ଜିଲ୍ଲାରେ ଚିକିତ୍ସା ପାଇଁ ନୟାନ୍ତ ହେଉଛନ୍ତି ମହିଳା ।
ମୟୂରଭଞ୍ଜ ଭଳି ବଡ଼ ଜିଲ୍ଲାରେ ୩୯ ବିଶେଷଜ୍ଞ ପଦବିରୁ ୧୧ ପଦବିରେ କେହି ନାହାନ୍ତି । ଅନ୍ୟ ଜିଲ୍ଲାରେଗୁଡ଼ିକରେ ସ୍ଥିତି ବି ଉଣା ଅଧିକ ସମାନ ରହିଛି । ଅନୁଗୁଳରେ ୧୮ ପଦବିରେ ୧୧ ଜଣ ଅଛନ୍ତି ଏବଂ ୭ ଖାଲିପଡ଼ିଛି । ସେହିପରି ବାଲେଶ୍ୱର ୩, ବରଗଡ଼ରେ ୧, ବଲାଙ୍ଗିରରେ ୧୨, କଟକରେ ୫, ଦେବଗଡ଼ରେ ୭, ଢ଼େଙ୍କାନାଳରେ ୬, ଗଞ୍ଜାମ ୧୪ ପଦବି ଖାଲି ପଡ଼ିଛି । ଯାଜପୁର ୧, ଝାରସୁଗୁଡ଼ାରେ କଳାହାଣ୍ଡି ୨୫ରୁ ୧୫, କେନ୍ଦ୍ରାପଡ଼ାରେ ୫, ଖୋର୍ଦ୍ଧାରେ ୫ ପଦବି ଫାଙ୍କା । ଏହାଛଡ଼ା ପୁରୀରେ ୯, ସମ୍ବଲପୁରରେ ୬, ସୁବର୍ଣ୍ଣପୁରରେ ୧, ସୁନ୍ଦରଗଡ଼ରେ ୧୦ ପଦବି ଖାଲି ପଡ଼ିଛି ।
