କଟକ,୦୧/୦୭ : ମାତିଛନ୍ତି ସାଇବର ଠକ । ରଥଯାତ୍ରା ଆଳ ଦେଖାଇ ଲୋକଙ୍କୁ ଠକୁଛନ୍ତି । ଏହାକୁ ନେଇ ବଡ଼ ଆକ୍ସନ ନେଇଛନ୍ତି କ୍ରାଇମବ୍ରାଞ୍ଚ । ୧୫ ଜାଲ ହୋଟେଲ ବୁକିଂ ୱେବସାଇଟ୍ ବନ୍ଦ କରିଛି କ୍ରାଇମବ୍ରାଞ୍ଚ ।

ପୁରୀ ରଥଯାତ୍ରା ସମୟରେ ସାଇବର ଠକ ଜାଲ ୱେବସାଇଟ୍ କରି ହୋଟେଲ ବୁକିଂ ନାଁରେ ଶ୍ରଦ୍ଧାଳୁଙ୍କୁ ଠକୁଛନ୍ତି । ଏନେଇ ଅଭିଯୋଗ ହେବ ପରେ କ୍ରାଇମବ୍ରାଞ୍ଚ ସାଇବର ସେଲ୍‌ ଇଣ୍ଟରନେଟରେ ଥିବା ୧୫ଟି ଜାଲ ହୋଟେଲ ବୁକିଂ ୱେବସାଇଟକୁ ହଟାଇଛନ୍ତି । ବିଭିନ୍ନ ସୂତ୍ରରୁ ପୁଲିସକୁ ଏଭଳି ଠକେଇ ଅଭିଯୋଗ ଆସିଥିଲା । ସେହି ଆଧାରରେ ସାଇବର ସେଲ୍‌ ଗତ ଜୁନ ୨୨ ତାରିଖରୁ ଏ ଦିଗରେ କାମ କରୁଥିଲା । ଏଯାବତ ୨୩ଟି ଜାଲ ହୋଟେଲ ବୁକିଂ ୱେବସାଇଟ ଚିହ୍ନଟ ହୋଇଛି । ସେଥିରୁ ୧୫ଟି କୁ ବନ୍ଦ କରାଯାଇଛି । ବାକି ଗୁଡିକ ବନ୍ଦ ପାଇଁ ପ୍ରକ୍ରିୟା ଚାଲିଛି । 

ଏହି ଜାଲ ୱେବସାଇଟ୍ ଚିହ୍ନଟ ଓ ବନ୍ଦ କାମ ନୀଳାଦ୍ରି ବିଜେ ପର୍ଯ୍ୟନ୍ତ ଜାରି ରହିବ । ଅନ୍ୟପଟେ ହୋଟେଲ ବୁକିଂ ପୂର୍ବରୁ ପୁଲିସ ଦେଇଥିବା ନିର୍ଦ୍ଦେଶାବଳୀ ଅନୁସାରେ ବୁକିଂ କରିବାକୁ ପରାମର୍ଶ ଦିଆଯାଇଛି । ନିର୍ଦ୍ଦେଶାବଳୀ ଅନୁସାରେ - ପ୍ରତିଷ୍ଠିତ ୱେବସାଇଟରେ ହୋଟେଲ ବୁକ କରିବା, ଟଙ୍କା ପୈଠ ପୂର୍ଵରୁ ଫୋନ କରି ହୋଟେଲ ସହ କଥା ହେବା, ହୋଟେଲ ଭଡା ଅଧା ପୈଠ କରିବା, upiରେ ନ ଦେଇ ଇଣ୍ଟରନେଟ ବ୍ୟାଙ୍କିଙ୍ଗରେ ଦେବା, ଶସ୍ତାରେ ରୁମ ଦେଉଥିଲେ ତା ଠାରୁ ଦୂରେଇ ରହିବା, ୱେବସାଇଟରୁ ରିଭ୍ୟୁ ଓ ରେଟିଂ ଭଲ ଭାବେ ଯାଞ୍ଚ ପାଇଁ ପରାମର୍ଶ ଦିଆଯାଇଛି ।