ଭୁବନେଶ୍ୱର,୧୭/୦୬: ନିର୍ବାଚନ ପରେ ଆସନ୍ତା ୨୮ ତାରିଖରେ ବିଏମ୍ସି କର୍ପୋରେସନ ବୈଠକ ବସିବ । ଏଥର କିନ୍ତୁ କର୍ପୋରେସନ ବୈଠକ ବେଶ ରୋଚକ ହେବ । ରାଜ୍ୟରେ ପ୍ରଥମ କରି ବିଜେପି ସରକାର ଗଠନ କରିଛି । ବିଏମ୍ସିରେ କିନ୍ତୁ ସିଂହଭାଗ ରହିଛନ୍ତି ବିଜେଡି କର୍ପୋରେଟର । ତେଣୁ ଅନେକ ଗୁଡିଏ ପ୍ରସଙ୍ଗକୁ ନେଇ ଏଥର ଟଣାଓଟରା ହେବା ଥୟ ।
ନିର୍ବାଚନ ଆଦର୍ଶ ଆଚରଣବିଧି ପାଇଁ ୩ ମାସ ବୈଠକ ବସିନଥିଲା । ଏଥର ବୈଠକରେ ଅନେକ ଗୁଡିଏ ଲୋକାଭିମୁଖୀ ପ୍ରକଳ୍ପରେ ମୋହର ବାଜିବ । ହେଲେ ପୂର୍ବ ଭଳି ଏଥର କର୍ପୋରେସନ ବୈଠକରେ ପ୍ରସ୍ତାବ ପାରିତ ହେବା ଏତେ ସହଜ ହେବ ନାହିଁ । ବିଏମ୍ସିର ଗତକାଲି ବୈଠକରେ ସାଂସଦ ଅପରାଜିତା ଯୋଗଦେଇ ଡ୍ରେନ୍ ସ୍ଥିତି ସମୀକ୍ଷା କରିଥିଲେ। ପ୍ରଥମ ପାଳିରେ ମାତ୍ର ଥରୁଟିଏ ସେ ବିଏମ୍ସି ବୈଠକକୁ ଆସିଥିଲେ । କିନ୍ତୁ କାଲିର ବୈଠକ ଦର୍ଶାଉଛି ଯେ ଏଥର କର୍ପୋରେସନ ବୈଠକରେ ସେ ନିଶ୍ଚିତ ଉପସ୍ଥିତ ରହିବେ । ପୂର୍ବରୁ ସେ ବିଏମ୍ସି କମିଶନର ଥିବାବେଳେ ତାଙ୍କର ପ୍ରଶାସନିକ ଅଭିଜ୍ଞତା ରହିଛି । ତେଣୁ ବିଜେଡି ମେୟର ସୁଲୋଚନା ଦାସ ଓ ବିଜେପି ସାଂସଦଙ୍କ ମଧ୍ୟରେ ବୈଠକରେ କଣ ସମ୍ମନ୍ୱୟ ରହୁଛି ତାକୁ ଅପେକ୍ଷା ରହିଛି ।
୩ ନିର୍ବାଚନ ମଣ୍ଡଳୀରୁ ଏକାମ୍ର ଆସନ ବିଜେପି ଖାତାକୁ ଯାଇଛି । ସେଠାରୁ ବାବୁ ସିଂ ବିଧାୟକ ଭାବେ ନିର୍ବାଚିତ ହୋଇଛନ୍ତି । ସେ ବି ବୈଠକକୁ ଆସିବେ । ତେଣୁ ବିଜେପି କର୍ପୋରେଟରଙ୍କ ବଳ ବଢିବ । ବର୍ତ୍ତମାନ ୬୭ ୱାର୍ଡରୁ ଶାସକଦଳ ବିଜେପି ହାତରେ ୯ କର୍ପୋରେଟର ରହିଛନ୍ତି । ନିର୍ବାଚନ ପୂର୍ବରୁ ଜଣେ କର୍ପୋରେଟର ବିଜେପି ଛାଡି ବିଜେଡିରେ ମିଶିଛନ୍ତି । ସେହିପରି ୯ ସ୍ୱାଧୀନ କର୍ପୋରେଟର ମଧ୍ୟରୁ ୭ ଜଣ ବିଜେଡିରେ ମିଶିଛନ୍ତି । ବର୍ତ୍ତମାନ ବିଜେଡିର ସଖ୍ୟା ମିଶାଇଲେ ୫୬ । ସେହିପରି ୨ ଜଣ ସ୍ୱାଧୀନ କର୍ପୋରେଟର ରହିଛନ୍ତି।
ବୈଠକରେ ଡ୍ରେନେଜ ସମସ୍ୟା ଉଠିବା ଥୟ । ପ୍ରତିବର୍ଷ ବର୍ଷା ହେଲେ ଜଳବନ୍ଦୀ ସମସ୍ୟା ଉପୁଜୁଛି । ଆଜି ଯାଏଁ ଏହାର ସ୍ଥାୟୀ ସମାଧାନ ହୋଇପାରିଲା ନାହିଁ । ତେଣୁ ଏଥର ସ୍ଥାନୀୟ ସାମାଧନ କରିବାକୁ ପ୍ରୟାସ ହେବ । ସେହିପରି ପରିମଳ ବ୍ୟବସ୍ଥା ଉପରେ ମଧ୍ୟ ବିସ୍ତୃତ ଭାବେ ଆଲୋଚନା ହେବାର ସମ୍ଭାବନା ରହିଛି । ଡେଙ୍ଗୁ ସ୍ଥିତି ନେଇ ବି ବୈଠକରେ ଆଲୋଚନା ହେବାର ସମ୍ଭାବନା ରହିଛି ।
