ପାଟଣାଗଡ଼,୧୩/୦୨: ପାଟଣାଗଡ଼ ପାର୍ସଲ ବୋମା ବିସ୍ଫୋରଣ ମାମଲାର ସାକ୍ଷୀମାନଙ୍କ ବୟାନ ରେକର୍ଡ଼ କରାଯାଉଛି । ଏହି ମାମଲାରେ ୬୮ଜଣ ସାକ୍ଷୀ ଥିବାବେଳେ ସୋମବାର ଅତିରିକ୍ତ ଜିଲ୍ଲା ଓ ଦୌରାଜଜରେ ୫୧ ନମ୍ବର ସାକ୍ଷୀ ଭାବେ ମୃତ ସୌମ୍ୟଶିଖରଙ୍କ ପତ୍ନୀ ରିମାରାଣୀ ସାହୁଙ୍କ ସାକ୍ଷ୍ୟ ଗ୍ରହଣ କରାଯାଇଛି । ଏଥିପାଇଁ ସେ ନିର୍ଦ୍ଧାରିତ ସମୟରେ କୋର୍ଟରେ ଉପସ୍ଥିତ ହୋଇଥିଲେ ।
ପାର୍ସଲ ବୋମା ଘରକୁ ପହଞ୍ଚିବା, ବିସ୍ଫୋରଣ ପରେ ଯାହାସବୁ ତାଙ୍କ ଆଖିଆଗରେ ଘଟିଯାଇଥିଲା ତାକୁ ଜଜଙ୍କ ପାଖରେ ଦୃଢତାର ସହ ଉପସ୍ଥାପନ କରିବା ସହିତ ଭାବବିହ୍ୱଳ ହୋଇ ପଡିଥିଲେ । ଏଥିସହ ବିପକ୍ଷ ଓକିଲଙ୍କ ପ୍ରତିଉତ୍ତରର ଜବାବ ମଧ୍ୟ ଦେଇଥିଲେ । ଏପର୍ଯ୍ୟନ୍ତ ୫୧ଜଣ ସାକ୍ଷୀଙ୍କ ବୟାନ ରେକର୍ଡ ସରିଥିବା ବେଳେ ବର୍ତ୍ତମାନ ସରକାରୀ କର୍ମଚାରୀ, ଛତିଶଗଡ଼, ଗୁଜୁରାଟ, ମୁମ୍ବାଇର ତିନିଜଣ କର୍ମଚାରୀଙ୍କ ସାକ୍ଷ୍ୟ ବୟାନ ବାକି ରହିଥିବା ସରକାରୀ ଓକିଲ ଆଶିଷ କୁମାର ଚନ୍ଦନଙ୍କ ଠାରୁ ଜଣାପଡିଛି । ଅପରପକ୍ଷେ, ଏହି ମାମଲାର ମୁଖ୍ୟ ଅଭିଯୁକ୍ତ ପୁଞ୍ଜିଲାଲ ମେହେରଙ୍କୁ ବଲାଙ୍ଗିର ଜେଲରୁ କଡାସୁରକ୍ଷା ବଳୟରେ ପାଟଣାଗଡ କୋର୍ଟକୁ ଅଣାଯାଇଥିଲା।
