ପୁରୀ,୨୨/୦୭: ଚାହିଁଦେଲେ ବୋଲି ଚାଞ୍ଚଲ୍ୟ ଖେଳାଇଲେ ଦୁର୍ବୃତ୍ତ । କାହିଁକି ଚାହିଁଲୁ କହି ହାଣିଦେଲେ । ୨ ଜଣ ଯୁବକଙ୍କୁ ଅତି ନୃସଂଶ ଭାବେ ହାଣି ଦୁର୍ବୃତ୍ତ ଗାଏବ୍ ହୋଇଗଲେ । ହଣାଖାଇ ରକ୍ତ ଜୁଡ଼ୁବୁଡ଼ୁ ଅବସ୍ଥାରେ ତଳେ ଗଡ଼ୁଥିବା ୨ ଜଣ ଯୁବକଙ୍କୁ ଉଦ୍ଧାର କରାଯାଇ ଡାକ୍ତରଖାନାରେ ଭର୍ତ୍ତି କରାଯାଇଛି । ଆକ୍ରମଣର ଶିକାର ଦୁଇ ଯୁବକ ହେଲେ ଗୁଣ୍ଡିଚା ବିହାରର ସ୍ୱରୂପ ମହାପାତ୍ର(୨୨) ଓ ତାଙ୍କ ସାଙ୍ଗ ।
ଖବର ଅନୁସାରେ ଶନିବାର ମଧ୍ୟରାତ୍ରି । ସ୍ୱରୂପ ଓ ତାଙ୍କ ସାଙ୍ଗ କଲେଜ ଛକଠାରେ ଖୋଲାଥିବା ଏକ ପାନ ଦୋକାନରେ ଛିଡ଼ା ହୋଇଥିଲେ। ଏହି ସମୟରେ ୨ ଜଣ ଯୁବକ ସେଠାରେ ପହଞ୍ଚିଥିଲେ । ଏହି ଯୁବକଙ୍କୁ ସ୍ୱରୂପ ଓ ତାଙ୍କ ସାଙ୍ଗ ଚାହିଁ ଦେଇଥିଲେ । ଏହି ଚାହାଣିକୁ ଯୁବକ ଦୁହେଁ ବର୍ଦାସ୍ତ କରି ପାରିନଥିଲେ । କାହିଁକି ଚାହିଁଲୁ ବୋଲି ପଚାରିବା ବେଳେ ଉଭୟ ପକ୍ଷଙ୍କ ମଧ୍ୟରେ ଝଗଡ଼ା ହୋଇଥିଲା । ୨ ଯୁବକ ଆକ୍ରମଣର ଶିକାର ହୋଇ ତାଙ୍କ ବନ୍ଧୁଙ୍କୁ ଖବର ଦେଇଥିଲେ । ଯୁବକ ଦୁହିଁଙ୍କ ଆଉ ୨ ଜଣ ବନ୍ଧୁ ତତ୍କ୍ଷଣାତ୍ ସେଠାରେ ପହଞ୍ଚିଥିଲେ । ୪ ଜଣ ମିଶି ସ୍ୱରୂପ ଓ ତାଙ୍କ ସାଙ୍ଗଙ୍କୁ ନିସ୍ତୁକ ପିଟିବା ସହ ଖଣ୍ଡାରେ ହାଣି ଘଟଣାସ୍ଥଳରେ ଗଡ଼ାଇ ଦେଇଥିଲେ । ସ୍ୱରୂପଙ୍କ ମୁଣ୍ଡ ଓ ମୁହଁରେ ଗଭୀର କ୍ଷତ ଲାଗିଥିବା ବେଳେ ତାଙ୍କ ସାଙ୍ଗଙ୍କ ହାତରେ ଚୋଟ ବାଜି ପ୍ରବଳ ରକ୍ତସ୍ରାବ ହୋଇଥିଲା । ଉଭୟ ସଙ୍ଗିନ ଅବସ୍ଥାରେ ସେଠାରେ ପଡ଼ିଥିବା ବେଳେ ସେମାନଙ୍କ ଦେହରୁ ପ୍ରଚୁର ପରିମାଣର ରକ୍ତ ବୋହି ରାସ୍ତାରେ ପଡ଼ିଥିଲା । ତାଙ୍କ ସମ୍ପର୍କୀୟ ଓ ଟାଉନ୍ ଥାନା ପୁଲିସ ଉଭୟଙ୍କୁ ଉଦ୍ଧାର କରି ଜିଲ୍ଲା ମୁଖ୍ୟ ଚିକିତ୍ସାଳୟରେ ଭର୍ତ୍ତି କରିଥିଲେ । ଅବସ୍ଥା ସଙ୍ଗିନ ଥିବାରୁ ଅଧିକ ଚିକିତ୍ସା ନିମାନ୍ତ ଉଭୟଙ୍କୁ ଅନ୍ୟତ୍ର ସ୍ଥାନାନ୍ତର କରାଯାଇଛି ।
ଏନେଇ ଟାଉନ୍ ଥାନା ଆଇଆଇସି ସୁନୀଲ ପ୍ରଧାନ କହିଛନ୍ତି ଯେ, ଉଭୟଙ୍କ ପକ୍ଷରୁ ଏଯାଏଁ ଅଭିଯୋଗ ହୋଇ ନାହିଁ । ସେମାନଙ୍କ ପରିବାର ଲୋକେ ଏତଲା ଦେବା ପାଇଁ ଇଚ୍ଛା କରୁନାହାନ୍ତି । ତଥାପି ଅନୁସନ୍ଧାନ ଜାରି ରହିଥିବାବେଳେ କିଏ ଓ କେଉଁ କାରଣ ପାଇଁ ଏଭଳି କାଣ୍ଡ ଘଟାଇଲେ ତାହା ପରେ ଜଣାପଡ଼ିବ ବୋଲି କହିଛନ୍ତି ଆଇଆଇସି ଶ୍ରୀ ପ୍ରଧାନ।