ପୁରୀ,୦୭/୦୯: ସହରରେ ଚାଲିଛି ବେଧଡ଼କ୍ ଜୁଆଆଡ୍ଡା । ବାରମ୍ବାର ଅଭିଯୋଗ ହେଉଛି । କିନ୍ତୁ ଚଢ଼ଉ କରୁନି ପୁଲିସ । ଲକ୍ଷ ଲକ୍ଷ ଟଙ୍କା ପାଲିରେ ଲାଗୁଥିବା ବେଳେ ପାନ ଦୋକାନ ପଛପଟେ କିମ୍ବା ପରିବା ମାର୍କେଟ୍ରେ ଚଢ଼ଉ କରୁଛି ପୁଲିସ । ୨ରୁ ୪ ହଜାର ଟଙ୍କା ଜବତ କରି ଦୁଇଚାରିଜଣଙ୍କୁ ବାନ୍ଧି ଜୁଆଆଡ୍ଡାରେ ଚଢ଼ଉ ହେଲା ବୋଲି ପୁଲିସ ରେକର୍ଡ ପ୍ରସ୍ତୁତ କରୁଛି । କିନ୍ତୁ ଲକ୍ଷପତି ଜୁଆଡ଼ିମାନେ ପୁଲିସ ବାବୁମାନଙ୍କୁ କାହିଁକି ଧରୁନି ପୁଲିସ ବୋଲି ଅଭିଯୋଗ ହୋଇଛି । ସମୁଦ୍ର କୂଳ ଓ ବଳିଆପଣ୍ଡା ଥାନା ଅଞ୍ଚଳରେ ଥିବା ଏକାଧିକ ହୋଟେଲ୍ରେ ଚାଲିଛି ଜୁଆଆଡ୍ଡା । ଏଭଳି ସ୍ଥିତିରେ ସଦର ଥାନା ଅଞ୍ଚଳରେ ଚାଲିଥିବା ଏକ ସମ୍ଭ୍ରାନ୍ତ ଶ୍ରେଣୀର ଜୁଆଆଡ୍ଡା ପାଇଁ ପୁଲିସ ବଦନାମ୍ ମୁଣ୍ଡାଇଛି ।
ସଦର ଥାନା ଅଧୀନ ଇଡ୍କୋ ରୋଡରେ ଦୀର୍ଘଦିନ ଧରି ଚାଲିଛି ଏହି ବଡ଼ଧରଣର ଜୁଆ ଆଡ୍ଡା । ସନ୍ଧ୍ୟା ୫ଟାରୁ ରାତି ୯ଟା ଯାଏଁ ପାଲିରେ ଲାଗୁଛି ଲକ୍ଷ ଲକ୍ଷ ଟଙ୍କା । କଟକ, ଭୁବନେଶ୍ୱର ଓ ପୁରୀର କିଛି ପ୍ରଭାବଶାଳୀ ବ୍ୟକ୍ତି ଏହି ଆଡ୍ଡାରେ ଟଙ୍କା ଲଗାଉଛନ୍ତି । ପ୍ରତି ଥର ୫୦ରୁ ୬୦ ଲକ୍ଷ ଟଙ୍କା ଖେଳ ହେଉଥିବା ଏକ ସୂତ୍ରରୁ ଖବର ମିଳିଛି । ଏହି ଆଡ୍ଡାକୁ ସୁରକ୍ଷା ଦେବା ପାଇଁ କିଛି ଯୁବକ ନିୟୋଜିତ ହୋଇଛନ୍ତି । ଗିରଳ ଛକଠାରେ ଜଗୁଛନ୍ତି ଏହି ଯୁବକ । ଆଉ କିଛି ଯୁବକ ଇଡ୍କୋ ରୋଡ୍ ଓ ଜୁଆଆଡ୍ଡାଠାରେ ଜଗି ରହୁଛନ୍ତି । କଡ଼ା ସୁରକ୍ଷାବଳୟରେ ଚାଲୁଛି ଏହି ଜୁଆଆଡ୍ଡା । ଖବର ପାଇଲେ ବି ଘଟଣାସ୍ଥଳକୁ ଯାଉନି ପୁଲିସ ।
ବୁଧବାର ଜିଲ୍ଲା ଭିତର ଓ ବାହାରର ଜୁଆଡ଼ି ପାଲିରେ ୫୦ ଲକ୍ଷରୁ ଅଧିକ ଟଙ୍କା ଖେଳିଥିଲେ । ଏନେଇ ସଦର ଥାନା ପୁଲିସ ଖବର ପାଇଥିଲା । ଏପରିକି ପୁଲିସର କର୍ମଚାରୀ ମଧ୍ୟ ଘଟଣାସ୍ଥଳକୁ ଯାଇ ଯାଞ୍ଚ୍ କରିଥିଲେ । ଘଟଣା ସତ ବୋଲି ପୁଲିସ ଯାଞ୍ଚ ବେଳେ ଜାଣିବାକୁ ପାଇଥିଲା । ହେଲେ ପୁଲିସ ଟିମ୍ କାହିଁକି ଚଢ଼ଉ କରି ନ ଥିଲା ତାହା ଏବେ ସନ୍ଦେହ ଘେରରେ । ଜୁଆଖେଳ ସହିତ ଅସାମାଜିକଙ୍କର ସେଠାରେ ମଦମାଂସର ଆସର ବି ଜମୁଛି । ଫଳରେ ଜୁଆଡ଼ିଙ୍କ ପାଇଁ ଇଡ୍କୋ ରୋଡ୍ ଏକ ଅଭୟ ସ୍ଥାନ ପାଲଟିଥିବା ଜଣାପଡିଛି । ଜୁଆଆଡ୍ଡା ଚଳାଉଥିବା ମାଷ୍ଟର୍ ମାଇଣ୍ଡ୍ ସୁରକ୍ଷା ବାବଦରେ ମାସିକ ଲକ୍ଷାଧିକ ଟଙ୍କା ଖର୍ଚ୍ଚ କରୁଛି । ସ୍ଥାନୀୟ ଲୋକଙ୍କ କହିବା ଅନୁସାରେ ଇଡ୍କୋ ରୋଡ୍ର ଏହି ଅନ୍ଧାରିଆ ନିକାଞ୍ଚନ ସ୍ଥାନରେ ବହୁ ଦାମୀ ଗାଡ଼ି ଲାଗୁଛି । ନିୟମିତ କେତେକ ଦାମୀ କାର୍ରେ ଏଠାକୁ ଆସୁଛି । ସ୍ଥାନୀୟ ଲୋକେ ଏସବୁ ଅନୁଧ୍ୟାନ କରିବା ପରେ ଜୁଆଆଡ୍ଡା ଚାଲିଥିବା ନେଇ ସ୍ପଷ୍ଟ ହୋଇଥିଲେ ।
ଏନେଇ ସଦର ଥାନା ଅଧିକାରୀ ଭାବଗ୍ରାହୀ ରାଉତ କହିଛନ୍ତି, ଘଟଣା ସତ ହେଲେ ଖବର ପାଇବା ପରେ ହଠାତ୍ ଚଢ଼ଉ କରିବା ସମ୍ଭବ ନୁହେଁ । ଏଥିପାଇଁ ପ୍ରସ୍ତୁତ ହୋଇ ଚଢ଼ଉ କରିବାକୁ ପଡ଼ିବ ବୋଲି ସେ କହିଛନ୍ତି । ତେବେ ଥାନା ଅଞ୍ଚଳରେ ଜୁଆଆଡ୍ଡା ଚାଲିଥିବା ନେଇ ପୁଲିସ ପାଖରେ କେମିତି ଖବର ନ ଥିଲା । ଏଭଳି ସମ୍ବେଦନଶୀଳ ଖବର ପାଇବା ପରେ ପୁଲିସକୁ କିଭଳି ପ୍ରସ୍ତୁତି ଦରକାର ତାକୁ ନେଇ ପ୍ରଶ୍ନ ଉଠିଛି । ନିକଟରେ ଏକ ସାମ୍ବାଦିକ ସମ୍ମିଳନୀରେ ଏସ୍ପି ପିନାକ ମିଶ୍ରଙ୍କୁ ସହରରେ ଜୁଆ ଖେଳ ଚାଲିଥିବା ନେଇ ପଚରାଯିବାରୁ ସେ କହିଥିଲେ, ଖବର ମିଳିଲେ ଚଢ଼ଉ ହେବ । ଜୁଆ ଯେ କେବଳ ଟଙ୍କାର ଖେଳ ନୁହେଁ । ଏହା ଅନେକ ପରିବାରକୁ ଛାର୍ଖାର୍ କରିଦିଏ । ଜୁଆରେ ଅନେକ ସର୍ବସ୍ୱାନ୍ତ ହେବା ପରେ ଆତ୍ମହତ୍ୟା କରିଥିବାର ନଜିର ମଧ୍ୟ ରହିଛି । ପୁଲିସ ଏଥିପ୍ରତି ନଜର ରଖିବା ଜରୁରୀ ବୋଲି ବୁଦ୍ଧିଜୀବୀମାନେ କହିଛନ୍ତି ।
