ରାଉରକେଲା,୧୫/୦୯: ହୋଟେଲ ରୁମ୍ରେ ନିଜ ଦେହରେ କିରାସିନି ଢାଳି ଆତ୍ମହୁତି ଉଦ୍ୟମ କରିଥିବା ଯୁବତୀଙ୍କ ମୃତ୍ୟୁ ଘଟଣାର ଖିଅ ଖୋଜୁଛି ପୁଲିସ୍ । ତିନି ଦିନ ହେଲା ପୁରୁଷ ବନ୍ଧୁଙ୍କୁ ପୁଲିସ୍ ଅଟକ ରଖି ପଚରାଉଚରା କରୁଛି । କିନ୍ତୁ ସିଦ୍ଧାନ୍ତରେ ପହଞ୍ଚିପାରୁନି । ଦୁହେଁ ହୋଟେଲ ରୁମ୍ରେ ଥିବା ସମୟରେ ସେମାନଙ୍କ ମଧ୍ୟରେ କଣ କଥା ହୋଇଥିଲା? ଗଣ୍ଡଗୋଳ ହୋଇଥିଲା କି? କାହିଁକି ଯୁବତୀ ଜଣକ ଆତ୍ମହତ୍ୟା କଲେ? ଏମିତି ଅନେକ ପ୍ରଶ୍ନର ଉତ୍ତର ପୁରୁଷ ବନ୍ଧୁଙ୍କ ପାଖରୁ ଖୋଜୁଛି ପୁଲିସ୍ । ହେଲେ ତିନି ଦିନ ବିତି ଯାଇଥିଲେ ମଧ୍ୟ ପୁରୁଷ ବନ୍ଧୁ ମୁହଁ ଖୋଲୁନାହାନ୍ତି । ଯାହା ପୁଲିସ୍ର ମୁଣ୍ଡବ୍ୟଥାର କାରଣ ସାଜିଛି ।
ଏଠାରେ ସ୍ମରଣଯୋଗ୍ୟ, ମୃତ ଯୁବତୀଙ୍କ ସହ ଛେଣ୍ଡ ଥାନା ଅନ୍ତର୍ଗତ ବନପୋଷରେ ରହୁଥିବା ଅଜୟ ସାଆଙ୍କ ପ୍ରେମ ସମ୍ପର୍କ ଥିଲା । ଗତ ବୁଧବାର ସକାଳେ ଅଜୟ ଏବଂ ଯୁବତୀ ଜଣକ ହୋଟେଲ ମହାରାଜାକୁ ଯାଇଥିଲେ । ଉଭୟେ ଗୋଟିଏ ରୁମ୍ରେ ରହିଥିଲେ । ରୁମ୍ ନେବାର କିଛି ସମୟ ପରେ ଅଜୟ କୌଣସି ସାମଗ୍ରୀ ନେବା ଲାଗି ବାହାରକୁ ଆସିଥିଲେ । ଏହି ସମୟରେ ଯୁବତୀ ଜଣକ କିରାସିନି ଢାଳି ହୋଇ ଦେହରେ ନିଆଁ ଲଗାଇ ଦେଇଥିଲେ ।