ପୁରୀ, ୧୭।୯: ପୁରୀ ବଳିଆପଣ୍ଡା ବସ୍ତିରେ ବୋମାମାଡ଼ ଓ ହଣାକଟା । ମଙ୍ଗଳବାର ପୂର୍ବାହ୍ନରେ ଏହି ଅଘଟଣ ଘଟିଥିବା ଜଣାପଡ଼ିଛି । ଏହି ହଣାକଟାରେ ବାପପୁଅ ଗୁରୁତର ଆହତ ହୋଇଛନ୍ତି । ଆହତ ଦୁଇ ଜଣ ବଳିଆପଣ୍ଡା ବିଜୟ ନଗର ବସ୍ତିର ସନ୍ଦୀପ ସାନିଏଲ ଓ ତାଙ୍କ ପୁଅ ମୃତ୍ୟୁଞ୍ଜୟ ସାନିଏଲ ବୋଲି ଜଣାପଡ଼ିଛି । ଉଭୟଙ୍କୁ ଜିଲ୍ଳା ମୁଖ୍ୟ ଚିକିତ୍ସାଳୟରେ ଭର୍ତ୍ତି କରାଯାଇଛି । ସକାଳ ସାଢ଼େ ୯ଟାରେ ମୃତ୍ୟୁଞ୍ଜୟ ତାଙ୍କ ଟୋଟୋରେ ବସିଥିଲେ । ହଠାତ୍ ତାଙ୍କ ପଡ଼ୋଶୀ ମାନସ ସେନାପତି ୪ଟି ବୋମାମାଡ଼ କରିଥିଲା । 

ପ୍ରଚଣ୍ଡ ଶବ୍ଦରେ ଟୋଟୋର ବ୍ୟାଟେରୀ ଫାଟିଯାଇଥିଲା । ଶବ୍ଦ ଶୁଣି ସନ୍ଦୀପ ଘରୁ ବାହାରି ଆସିଥିଲେ । ଏହି ସମୟରେ ମାନସ ତାଙ୍କୁ ଖଣ୍ଡାରେ ନୃଶଂସ ଭାବେ ହାଣିଥିଲା । ପରେ ସେ ଘଟଣାସ୍ଥଳରୁ ପଳାଇଥିଲା । ସେପଟେ ଟୋଟୋ ପାଖରେ ମୃତ୍ୟୁଞ୍ଜୟ ଗୁରୁତର ଆହତ ଅବସ୍ଥାରେ ପଡ଼ିଥିଲେ । ଉଭୟଙ୍କୁ ପରିବାର ଲୋକେ ରକ୍ତ ଜୁଡ଼ୁବୁଡ଼ୁ ଅବସ୍ଥାରେ ଡାକ୍ତରଖାନାରେ ଭର୍ତ୍ତି କରିଥିଲେ । ପ୍ରାଥମିକ ଚିକିତ୍ସା ପରେ ଦୁହିଁଙ୍କୁ କଟକ ସ୍ଥାନାନ୍ତର କରାଯାଇଛି ।