ଭୁବନେଶ୍ୱର,୧୬/୦୯: ଉତ୍କଳ ବିଶ୍ୱବିଦ୍ୟାଳୟର ଛାତ୍ରୀଙ୍କୁ ଯୌନ ନିର୍ଯାତନା ମାମଲା ଜାତୀୟ ମାନବାଧିକାର ଆୟୋଗ (ଏନ୍‌ଏଚ୍‌ଆର୍‌ସି)ରେ ପହଞ୍ଚିଛି । ଏହି ସମ୍ବେଦନଶୀଳ  ଘଟଣାକୁ ବିଶ୍ୱବିଦ୍ୟାଳୟ କର୍ତ୍ତୃପକ୍ଷ ଚାପିଦେବାକୁ ଚକ୍ରାନ୍ତ  ଚଳାଇଥିବା ଅଭିଯୋଗ ହୋଇଛି । ଘଟଣାର ନିରପେକ୍ଷ ତଦନ୍ତ  କରି ଦୋଷୀ ବିରୋଧରେ କାର୍ଯ୍ୟାନୁଷ୍ଠାନ ନେବା ସହ ପୀଡିତାଙ୍କୁ ୫ ଲକ୍ଷ ଟଙ୍କା କ୍ଷତିପୂରଣ ଦେବାକୁ ଦାବି ହୋଇଛି ।  

ସୂଚନା ଅଧିକାର କର୍ମୀ ଜୟନ୍ତ କୁମାର ଦାସ ଏ ନେଇ  ଏନ୍‌ଏଚ୍‌ଆର୍‌ସିରେ ପିଟିସନ ଦାୟର କରିଛନ୍ତି । ଏଥିରେ  ଉଲ୍ଲେଖ କରିଛନ୍ତି, ଅର୍ଥନୀତି ବିଭାଗର ଜଣେ ବରିଷ୍ଠ ପ୍ରଫେସର  ଉକ୍ତ ବିଭାଗର ଜଣେ ଛାତ୍ରୀଙ୍କୁ ଯୌନ ନିର୍ଯାତନା ଦେଇଛନ୍ତି । ଅଗଷ୍ଟ ୧୬ ତାରିଖରେ ଅପରାହ୍ନ ୨ଟା ବେଳେ ପ୍ରଫେସର ବହି ଆଣିବା ବାହାନାରେ ଛାତ୍ରୀଙ୍କୁ ତାଙ୍କ ପ୍ରକୋଷ୍ଠକୁ ଡାକି ତାଙ୍କୁ  ଅସଦାଚରଣ କରିଥିଲେ । ଛାତ୍ରୀ ଚିତ୍କାର କରି ପ୍ରଫେସରଙ୍କ  କବଳରୁ ବାହାରି ଆସିବା ପାଇଁ ଚେଷ୍ଟା କରିଥିଲେ । ଏ ନେଇ  ଛାତ୍ରୀ ଯୌନ ନିର୍ଯାତନା ସେଲ୍‌କୁ ଲିଖିତ ଅଭିଯୋଗ କରିଛନ୍ତି ।  

ଶ୍ରୀ ଦାସ ଅଭିଯୋଗ କରିଛନ୍ତି, ବିଶ୍ୱବିଦ୍ୟାଳୟ କର୍ତ୍ତୃପକ୍ଷ  କାର୍ଯ୍ୟାନୁଷ୍ଠାନ ନେବା ବଦଳରେ ଘଟଣାକୁ ଚାପି ଦେବାର ଚକ୍ରାନ୍ତ  ଚଳାଇଛନ୍ତି । ଯୌନ ନିର୍ଯାତନା ସେଲ୍‌ ଘଟଣାର ତଦନ୍ତରେ  ହେଳା କରୁଛି । ପ୍ରଫେସରଙ୍କୁ ସୁରକ୍ଷା ଦେବାକୁ ସବୁ ପ୍ରକାର  ଚେଷ୍ଟା ଚାଲିଛି । ତେଣୁ ଏକ ସ୍ୱତନ୍ତ୍ର କମିଟି ଦ୍ୱାରା ମାମଲାର  ତଦନ୍ତ କରିବାକୁ ସେ ଉଲ୍ଲେଖ କରିଛନ୍ତି । ଏହାସହ ସବୁ  ପ୍ରଫେସରଙ୍କ ପ୍ରକୋଷ୍ଠରେ ସିସିଟିଭି କ୍ୟାମେରା ଲଗାଇବାକୁ  ମଧ୍ୟ ଅନୁରୋଧ କରାଯାଇଛି ।