ଭୁବନେଶ୍ୱର,୧୬/୦୯: ଜଣେ ଯୁବତୀଙ୍କୁ ପ୍ରେମ ଜାଲରେ ଫସାଇ ବିବାହର ପ୍ରତିଶ୍ରୁତି ଦେଲା । ଯୁବତୀଙ୍କ ସହ ଶାରୀରିକ ସଂପର୍କ ରଖିଲା। ଯୁବତୀଙ୍କ  ନାଁରେ ଲୋନ୍‌ କରି ଏସି, ଫ୍ରିଜ୍‌, ଟିଭି ଓ ମୋବାଇଲ  ନେଇଗଲା । ଶେଷରେ ଅଧିକ ଟଙ୍କା ଲୋନ୍‌ କରିବାକୁ  ବାଧ୍ୟ କରି ମାଡ଼ ମାରିଲା । ଏଭଳି ଜଣେ ପ୍ରତାରକକୁ  ବାନ୍ଧିଛି ଭୁବନେଶ୍ୱର ମହିଳା ଥାନା ପୁଲିସ । ତାଙ୍କ  ନାମ ସୁଧୀର ବେହୁରା(୨୫) । ଘର କଟକ ନିଆଳି।  ସେ ପୁରୀ ବାଇପାସ୍‌ର ପାଣ୍ଡରାରେ ରହୁଥିଲେ । 

ପୁଲିସ ସୂଚନା ଅନୁଯାୟୀ, ପୀଡ଼ିତା ୨୦୨୨  ମସିହାରେ ସହିଦ ନଗରରେ ଏକ ମଲ୍‌ରେ କାମ  କରୁଥିବା ବେଳେ ସୁଧୀରଙ୍କ ସହ ଭେଟ ହୋଇଥିଲା ।  ପ୍ରଥମ ଦେଖାରୁ ଉଭୟଙ୍କ ମଧ୍ୟରେ ପ୍ରେମ ସଂପର୍କ  ଗଢ଼ି ଉଠିଥିଲା । ପରେ ସୁଧୀର ପୀଡ଼ିତାଙ୍କୁ ବିବାହ  କରିବାକୁ ତାଙ୍କ ମା’ଙ୍କୁ ପ୍ରସ୍ତାବ ଦେଇଥିଲେ । ପରେ  ଗତ ଏପ୍ରିଲ ୧ ତାରିଖରୁ ସେ ପୀଡ଼ିତାଙ୍କୁ ବିବାହର  ପ୍ରତିଶ୍ରୁତି ଦେଇ ତାଙ୍କୁ ସାଙ୍ଗରେ ଆଣି ଆସିଥିଲେ । ପାଣ୍ଡରାରେ ଏକ ଘର ଭଡ଼ା ନେଇ ଉଭୟ ପତିପତ୍ନୀର ପରିଚୟ ଦେଇ ରହୁଥିଲେ । ସେଠାରେ ସୁଧୀର  ପୀଡ଼ିତାଙ୍କ ସହ ଇଚ୍ଛା ବିରୋଧରେ ଶାରୀରିକ ସଂପର୍କ  ରଖିଥିଲେ । ଏହାପରେ ସେ ପୀଡ଼ିତାଙ୍କ ନାମରେ  ଲୋନ୍‌ କରି ଏସି, ଫ୍ରିଜ, ଟିଭି ଓ ଦାମୀ ମୋବାଇଲ  ଆଦି ନେଇଥିଲେ । କିଛିଦିନ ପରେ ସେ ପୁଣି ଲୋନ୍‌  କରି ଟଙ୍କା ଆଣିବାକୁ କହିଥିଲେ । ପୀଡ଼ିତା ମନା  କରିବାରୁ ସୁଧୀର ତାଙ୍କୁ ମାଡ଼ ମାରିଥିଲେ। ସୁଧୀର  ଏପରି ଅନେକ ଲୋକଙ୍କ ଠାରୁ ଋଣ କରିଥିବା  ପୀଡ଼ିତା ଜାଣିବାକୁ ପାଇଥିଲେ । ଏ ନେଇ ସୁଧୀରଙ୍କୁ  ସେ ପଚାରିବାରୁ ସୁଧୀର ତାଙ୍କୁ ପୁଣି ମାଡ଼ ମାରିବା  ସହ ତାଙ୍କ ମା’ଙ୍କୁ ମଧ୍ୟ ଗାଳିଗୁଲଜ କରି ମାଡ଼  ମାରିଥିଲେ । ପୀଡ଼ିତା ଏନେଇ ମହିଳା ଥାନାରେ  ଅଭିଯୋଗ କରିଥିଲେ । ପୁଲିସ ଏକ ମାମଲା ରୁଜୁ  କରି ସୁଧୀରଙ୍କୁ ଗିରଫ କରିଥିଲା । ଅପରାହ୍ଣରେ  ସୁଧୀରଙ୍କୁ ଅଦାଲତ ଚାଲାଣ କରାଯାଇଥିଲା । ଜାମିନ  ନାମଞ୍ଜୁର ହେବାରୁ ତାଙ୍କୁ ଝାରପଡ଼ାସ୍ଥିତ ସ୍ୱତନ୍ତ୍ର  କାରାଗାରକୁ ପଠାଇ ଦିଆଯାଇଛି ।