ରାଉରକେଲା,୧୪/୦୯: ହୋଟେଲରେ ଆତ୍ମାହୁତି ଉଦ୍ୟମ କରିଥିବା ଯୁବତୀ ଆଖି ବୁଜିଲେ । ଡାକ୍ତରଖାନାରେ ଚିକିତ୍ସାଧୀନ ଅବସ୍ଥାରେ ଗୁରୁବାର ବିଳମ୍ବିତ ରାତିରେ ତାଙ୍କର ମୃତ୍ୟୁ ଘଟିଛି । ଏହି ଘଟଣାକୁ ଗୁରୁତ୍ୱର ସହ ନେଇଛି ରାଉରକେଲା ପ୍ଲାଣ୍ଟସାଇଟ୍ ଥାନା ପୁଲିସ୍ । ସାଇଣ୍ଟିଫିକ୍ ଟିମ୍ ସହ ପୁଲିସ୍ ହୋଟେଲ ରୁମ୍ରେ ପହଞ୍ଚି ମାଜିଷ୍ଟ୍ରେଟ୍ଙ୍କ ଉପସ୍ଥିତିରେ ତଦନ୍ତ କରିଛି । ହୋଟେଲ ରେଜିଷ୍ଟର ଓ ସିସିଟିଭି କ୍ୟାମେରା ଯାଞ୍ଚ କରାଯାଇଛି । ଅନ୍ୟପଟେ ହୋଟେଲରେ ଯୁବତୀଙ୍କ ସହ ଥିବା ତାଙ୍କ ପୁରୁଷ ବନ୍ଧୁ ହିଁ ହତ୍ୟାକାରୀ ବୋଲି ପରିବାର ଲୋକ ଅଭିଯୋଗ କରିଛନ୍ତି । ପୁଲିସ୍ ହତ୍ୟା ମାମଲା ରୁଜୁ କରିଛି । ପୁରୁଷ ବନ୍ଧୁ ଅଜୟ ସାହାଙ୍କୁ ଗିରଫ କରିଛି । ହେଲେ ହୋଟେଲ୍ ରୁମ୍କୁ କିରାସିନି କେଉଁଠୁ ଆସିଲା, ଯୁବତୀ ଜଣକ କେଉଁ ପରିସ୍ଥିତିରେ ଆତ୍ମାହୁତି ଉଦ୍ୟମ କଲେ ତାହା ଅଦ୍ୟାବଧି ଅସ୍ପଷ୍ଟ ରହିଛି ।
ପୁଲିସ୍ ସୂଚନା ଅନୁଯାୟୀ, ଛେଣ୍ଡ ଥାନା ଅନ୍ତର୍ଗତ ବନପୋଷରେ ରୁହନ୍ତି ଅଜୟ ସା । ପ୍ରାୟ ୩ ବର୍ଷ ତଳେ ପ୍ଲାଣ୍ଟସାଇଟ୍ ଥାନା ଅଞ୍ଚଳର ସମ୍ପୃକ୍ତ ଯୁବତୀଙ୍କ ସହ ତାଙ୍କର ପ୍ରେମ ସମ୍ପର୍କ ଗଢ଼ି ଉଠିଥିଲା । ବୁଧବାର ସକାଳେ ଅଜୟ ଏବଂ ଯୁବତୀ ହୋଟେଲ ମହାରାଜାକୁ ଯାଇଥିଲେ। ଉଭୟେ ଗୋଟିଏ ରୁମ୍ରେ ରହିଥିଲେ । ରୁମ୍ ନେବାର କିଛି ସମୟ ପରେ ଅଜୟ କୌଣସି ସାମଗ୍ରୀ ନେବା ଲାଗି ବାହାରକୁ ଆସିଥିଲେ । ଏହି ସମୟରେ ଯୁବତୀ ଜଣକ କିରାସିନି ଢାଳି ହୋଇ ଦେହରେ ନିଆଁ ଲଗାଇ ଦେଇଥିଲେ । ଯନ୍ତ୍ରଣା ଅସହ୍ୟ ହେବାରୁ ଛଟପଟ ହୋଇ ରୁମ୍ର କବାଟ ଖୋଲି ବାହାରକୁ ଚାଲି ଆସିଥିଲେ । ଅଜୟ ହୋଟେଲରେ ପହଞ୍ଚିବା ବେଳକୁ ପ୍ରେମିକା ଜଳୁଥିଲେ । ହୋଟେଲ କର୍ମଚାରୀଙ୍କ ସହାୟତାରେ ତାଙ୍କୁ ଆଇଜିଏଚ୍ରେ ଭର୍ତ୍ତି କରିଥିଲେ । ମାତ୍ର ଚିକିତ୍ସାଧୀନ ଅବସ୍ଥାରେ ଗୁରୁବାର ବିଳମ୍ବିତ ରାତିରେ ତାଙ୍କର ମୃତ୍ୟୁ ଘଟିଥିଲା । ପ୍ରେମିକଙ୍କ ସହ ମନୋମାଳିନ୍ୟରୁ ସେ ଆତ୍ମହତ୍ୟା ଉଦ୍ୟମ କରିଥିବା ପୁଲିସ୍ ସନ୍ଦେହ କରୁଛି । ତଦନ୍ତ ପରେ ପ୍ରକୃତ ତଥ୍ୟ ପଦାକୁ ଆସିବ ବୋଲି ଜୋନାଲ ଡିଏସ୍ପି ନିର୍ମଳ ମହାପାତ୍ର ସୂଚନା ଦେଇଛନ୍ତି ।
