ଭଦ୍ରେଶ୍ୱର,୦୬/୦୯: ଜଣେ ମହିଳାଙ୍କ ସହ  ଥାନା ବାବୁଙ୍କ ରୋମାଣ୍ଟିକ୍‌ କଲ୍‌ ଏବେ ଭାଇରାଲ୍‌  ହୋଇଛି । କଟକ ଜିଲ୍ଲାର ଏକ ଥାନା ଅଧିକାରୀଙ୍କ ଏଭଳି ଅଡିଓ ଏବେ ମୋବାଇଲ୍‌ରୁ ମୋବାଇଲ୍‌  ଘୂରି ବୁଲୁଛି । ଘଣ୍ଟା ଘଣ୍ଟା ଧରି ପ୍ରେମାଳାପରେ ମସଗୁଲ୍‌ ଥିବା ଏହି ଥାନା ବାବୁଙ୍କ ଅଡ଼ିଓରେ ଅଶ୍ଳୀଳ ବାର୍ତ୍ତାଳାପ ଥିବା ଶୁଣିବାକୁ ମିଳିଛି ।   

ମିଳିଥିବା ସୂଚନା ମୁତାବକ, ଜଣେ ବିବାହିତା ମହିଳା ନିଜର କିଛି ସମସ୍ୟାର ସମାଧାନ ନିମନ୍ତେ  ଥାନା ବାବୁଙ୍କ ପାଖକୁ ଆସିଥିଲେ । ମହିଳାଙ୍କ ସମସ୍ୟାର  ସମାଧାନ କରାଇ ଦେବାକୁ କହି ତାଙ୍କ ଫୋନ୍‌ ନମ୍ବର ହାସଲ କରିନେଇଥିଲେ ରଂଗିଲା ବାବୁ । ପରେ ଧିରେ  ଧିରେ ମହିଳାଙ୍କ ସହ ଥାନାବାବୁଙ୍କ ନିବିଡ଼ ସମ୍ପର୍କ ଗଢ଼ି ଉଠିଥିଲା । ଫଳରେ ସଂପୃକ୍ତ ମହିଳା ଏହି ଥାନାକୁ ବାରମ୍ବାର ଯିବା ଆସିବା କରୁଥିବା ଦେଖିବାକୁ  ମିଳିଥିଲା । ଅପରପକ୍ଷେ ବିଳମ୍ବିତ ରାତି ଯାଏ ଉଭୟ ଫୋନରେ ଅଶ୍ଳୀଳ ବାର୍ତ୍ତାଳାପ କରୁଥିବା ଭାଇରାଲ  ଅଡିଓରୁ ଜଣାପଡୁଛି। ଏହା ସହିତ ଥାନାବାବୁ ଓ  ସଂପୃକ୍ତ ମହିଳାଙ୍କର କିଛି ସେଲ୍‌ଫି ଫଟୋ ମଧ୍ୟ  ଭାଇରାଲ ହେବାରେ ଲାଗିଛି । 

ସବୁଠାରୁ ଗୁରୁତ୍ୱପୂର୍ଣ୍ଣ  କଥା ହେଉଛି, ଏହି ଅଡିଓରେ ଥାନାବାବୁ ଜଣକ ଅଶ୍ଳୀଳତାର ସମସ୍ତ ସୀମା ଟପିଯାଇଥିବା ଶୁଣିବାକୁ  ମିଳୁଛି । ଜଣେ କର୍ତ୍ତବ୍ୟରତ ଦାୟିତ୍ୱସମ୍ପନ୍ନ ଥାନାବାବୁଙ୍କ ଏଭଳି ଭାଷା ସାଧାରଣରେ ପ୍ରଶ୍ନବାଚୀ ସୃଷ୍ଟି କରିଛି ।  ଘଟଣା ସମ୍ପର୍କରେ ଥାନା ଅଧିକାରୀଙ୍କୁ ପଚାରିବାରୁ  ଭାଇରାଲ ହେଉଥିବା ଅଡିଓ ତାଙ୍କର ନୁହେଁ ବୋଲି ସେ  କହିଛନ୍ତି । ଅପରପକ୍ଷେ ଘଟଣାକୁ ବୁଦ୍ଧିଜୀବୀ ମହଲରେ  ଘୋର ନିନ୍ଦା କରାଯିବା ସହ ଭାଇରାଲ ଅଡିଓର  ସତ୍ୟାସତ୍ୟ ଉନ୍ମୋଚନ ପାଇଁ ପୁଲିସ ପ୍ରଶାସନର  ଉଚ୍ଚ କର୍ତ୍ତୃପକ୍ଷ ଏହାର ଫରେନ୍‌ସିକ୍‌ ଯାଞ୍ଚ୍‌ କରିବାକୁ ମତ ପ୍ରକାଶ ପାଇଛି । ତେବେ ଏହି ଅଭିଯୋଗକୁ  ସମ୍ପୃକ୍ତ ଥାନା ଅଧିକାରୀ ଅସ୍ୱୀକାର କରିଛନ୍ତି । ଏହା  ତାଙ୍କର କଣ୍ଠସ୍ୱର ନୁହେଁ ବୋଲି ସେ କହିଛନ୍ତି ।