ଭୁବନେଶ୍ୱର,୦୬/୦୯: ରାଜଧାନୀ ରାସ୍ତାରେ ସଭିଏଁ ଶାନ୍ତିରେ ଯା’ଆସ କରିବେ । ଶଦ୍ଦ ପ୍ରଦୂଷଣକୁ ଆଦୌ ବରଦାସ୍ତ କରାଯିବନି । ଏହି ଲକ୍ଷ୍ୟରେ କମିଶନରେଟ୍ ପୁଲିସ ବିକଟାଳ ହର୍ଣ୍ଣ ଓ ସାଇଲେନ୍ସର ଚଢ଼ଉ ଅଭିଯାନକୁ ଜୋର୍ଦାର୍ କରିଛି । ଏହିକ୍ରମରେ ଭୁବନେଶ୍ୱରରୁ ଦିନକରେ ୨୩ଟି ବିକଟାଳ ହର୍ଣ୍ଣ ଓ ୨୧ଟି ସାଇଲେନ୍ସର ଜବତ ହୋଇଛି । ପୁଲିସ ଆୟୁକ୍ତ ସଞ୍ଜୀବ ପଣ୍ଡାଙ୍କ ନିର୍ଦ୍ଦେଶକ୍ରମେ ୨ଟି ଟ୍ରାଫିକ୍ ଥାନା ପୁଲିସ ଏହି ଚଢ଼ାଉ ଚଳାଇଛି ।
ଏଜି ଛକରେ ଟ୍ରାଫିକ୍ ଥାନା-୧ର କର୍ମଚାରୀମାନେ ଦିନତମାମ ଜୋରଦାର ଯାଞ୍ଚ କରିଥିଲେ । ମୋଟ ୨୧ଟି ବୁଲେଟ ଓ ଅନ୍ୟାନ୍ୟ ଗାଡି଼କୁ ଯାଞ୍ଚ କରାଯାଇଥିଲା । ଫଟ ଫଟ ଶଦ୍ଦ ବାହାରୁଥିବା ସାଇଲେନ୍ସରକୁ ଗାଡିରୁ କଢ଼ାଯାଇଥିଲା। ସମସ୍ତ ଗାଡି ମାଲିକଙ୍କଠାରୁ ୫୦୦ ଟଙ୍କା ଲେଖାଏଁ ମୋଟ ୧୦ ହଜାର ୫୦୦ ଟଙ୍କାର ଜରିମାନା ଆଦାୟ ହୋଇଥିଲା।
ସେହିପରି ଟ୍ରାଫିକ୍ ଥାନା-୨ ବିକଟାଳ ହର୍ଣ୍ଣ ଖୋଜିବାକୁ ଗୁରୁତ୍ୱ ଦେଇଥିଲା । ବରମୁଣ୍ଡା, ଜୟଦେବ ବିହାର ସମେତ ଅନ୍ୟାନ୍ୟ ବସଷ୍ଟପ୍ରେ ଯାତ୍ରୀବାହୀ ବସକୁ ଅଟକାଇଥିଲେ ଟ୍ରାଫିକ୍ ପୁଲିସ । ମୋଟ ୨୩ଟି ବସ୍ରୁ ବିକଟାଳ ହର୍ଣ୍ଣ କଢ଼ାଯାଇଥିଲା । ବସ୍ କର୍ମଚାରୀଙ୍କଠାରୁ ୧୧ ହଜାର ୫୦୦ ଟଙ୍କାର ଜରିମାନା ଆଦାୟ କରିଥିଲେ । ଆଗକୁ ଏହି ଅଭିଯାନ ଜୋର୍ଦାର୍ କରାଯିବ ବୋଲି ଶ୍ରୀ ପଣ୍ଡା ଚେତାଇଛନ୍ତି ।
ସୂଚନା ଥାଉ କି, ଗତମାସ ୩୦ ତାରିଖରେ ରାଜଧାନୀରେ ଶତାଧିକ ଯାତ୍ରୀବାହୀ ବସ୍କୁ ଯାଞ୍ଚ କରିଥିଲା । ପ୍ରାୟ ୭୫ଟି ବସ୍ରୁ ଉଚ୍ଚଶଦ୍ଦଯୁକ୍ତ ହର୍ଣ୍ଣକୁ କଢ଼ାଯାଇଥିଲା । ବସ୍ କର୍ମଚାରୀଙ୍କଠାରୁ ପ୍ରାୟ ୨୪ ହଜାର ଟଙ୍କା ଜରିମାନା ଆଦାୟ ହୋଇଥିଲା ।
