ମୁମ୍ବାଇ ୨୭/୦୭: ଏକ ବିଳାସପୂର୍ଣ୍ଣ ହାଉସିଂ ପ୍ରୋଜେକ୍ଟ ଲାଗି ୨୦୨୩ ମସିହାରେ ଦିବଂଗତ ଅଭିନେତା ଦିଲିପ କୁମାରଙ୍କ ପାଲି ହିଲ୍ ବଙ୍ଗଳାର ଉଚ୍ଛେଦ ହେବ ବୋଲି ସ୍ଥିର ହୋଇଥିଲା । ଏବେ ଏଥିରେ ବଡ଼ ନିବେଶ ହୋଇଛି । ଆପ୍କୋ ଇନ୍ଫ୍ରାଟେକ୍ ପ୍ରା.ଲିଃ. ଏହି ଟ୍ରିପ୍ଲେକ୍ସ ଆପାର୍ଟମେଣ୍ଟ୍କୁ ୧୭୨ କୋଟି ଟଙ୍କାରେ କିଣିଛି । ୯ମ, ୧୦ମ ଓ ୧୧ତମ ମହଲାରେ ବିସ୍ତୃତ ଏହି ଆପାର୍ଟମେଣ୍ଟ୍ ୯,୫୨୭ ବର୍ଗଫୁଟର, ଯାହାର ମୂଲ୍ୟ ୧୫୫ କୋଟି । ଉକ୍ତ ଅଞ୍ଚଳରେ ପ୍ରତି ବର୍ଗଫୁଟର ମୂଲ୍ୟ ୧.୬୨ ଲକ୍ଷ ଟଙ୍କା । ଏଥିରେ ୯.୩ କୋଟିର ଷ୍ଟାମ୍ପ୍ ଡ୍ୟୁଟି ଓ ପଞ୍ଜିକରଣ ୩୦ ହଜାର ଟଙ୍କା ଯୋଡ଼ାଯାଇଛି ।
‘ଦ ଲିଜେଣ୍ଡ୍’ ନାମକ ଏହି ପ୍ରୋଜେକ୍ଟ ପରିଚାଳନା ଦାୟିତ୍ୱରେ ଅଛି ଆଶର ଗ୍ରୁପ୍ । ଏଥିରେ ୪ ଓ ୫ ବିଏଚ୍କେ ବିଳାସପୂର୍ଣ୍ଣ ଆପାର୍ଟମେଣ୍ଟ୍ ରହିଛି । ଏଥିସହିତ ଦିଲିପ କୁମାରଙ୍କୁ ସମର୍ପିତ ୨ ହଜାର ବର୍ଗଫୁଟର ଏକ ସଂଗ୍ରହାଳୟ ବି ରହିଛି । ୨୦୧୬ ମସିହାରେ ଦିଲିପ ଓ ଆଶର ଗ୍ରୁପ୍ ମଧ୍ୟରେ ହୋଇଥିବା ଚୁକ୍ତିକୁ ଏହି ପ୍ରୋଜେକ୍ଟ ଅନୁସରଣ କରୁଛି ।
