ନୂଆଦିଲ୍ଲୀ: ୱାନ ଡିରେକ୍ସନର ପୂର୍ବତନ ଗାୟକ ଲିଆମ ପାଇନ ହୋଟେଲ୍ର ବାଲକୋନିରୁ ପଡ଼ି ପ୍ରାଣ ହରାଇଛନ୍ତି । ମାତ୍ର ୩୧ ବର୍ଷ ବୟସରେ ତାଙ୍କର ମୃତ୍ୟୁ ଘଟିଛି । ଆର୍ଜେଣ୍ଟିନାର ଏକ ହୋଟେଲର ବାଲକୋନିରୁ ପଡ଼ି ତାଙ୍କର ମୃତ୍ୟୁ ହୋଇଥିବା ଅନ୍ତର୍ଜାତୀୟ ଗଣମାଧ୍ୟମ ରିପୋର୍ଟରୁ ଜଣାପଡ଼ିଛି । ଗତକାଲି ଲିଆମ ଆର୍ଜେଣ୍ଟିନାର ରାଜଧାନୀ ବଏନସ୍ ଏରିସର ଏକ ହୋଟେଲରେ ଥିଲେ । ସେ ନିୟମିତ ଭାବେ ଏହି ହୋଟେଲକୁ ଆସୁଥିବା ନେଇ ଜଣାପଡ଼ିଛି । ବୁଧବାର ହୋଟେଲରେ ଥିବାବେଳେ ବାଲକୋନିରେ ବୁଲାବୁଲି କରୁଥିଲେ ଲିଆମ ।
ଏହି ସମୟରେ ସେ ହଠାତ୍ ବାଲକୋନିରୁ ପଡ଼ି ଯାଇଥିଲେ। ହୋଟେଲ କର୍ମଚାରୀ ତାଙ୍କୁ ଉଦ୍ଧାର କରି ଡାକ୍ତରଖାନାରେ ଭର୍ତ୍ତି କରିଥିଲେ ମଧ୍ୟ ତାଙ୍କର ମୃତ୍ୟୁ ଘଟିଛି । ପୋଲିସ ଅନୁସାରେ, ହୋଟେଲର ପାଖ ବିଲ୍ଡିଂରେ ରହୁଥିବା ସ୍ଥାନୀୟ ଲୋକେ ବାଲକୋନିରେ ଜଣ ବ୍ୟକ୍ତିଙ୍କୁ ଅତ୍ୟଧିକ ମଦ୍ୟପାନ ଏବଂ ଡ୍ରଗ୍ସ ସେବନ ପରେ ଉତ୍ତେଜିତ ଅବସ୍ଥାରେ ଦେଖିଥିଲେ । ଏହାର କିଛି ସମୟ ମଧ୍ୟରେ ହୋଟେଲ କର୍ମଚାରୀ ଜୋରରେ ଚିତ୍କାର ଶୁଣିଥିଲେ ।
ଏହା ପରେ ହୋଟେଲ କର୍ମଚାରୀ ହୋଟେଲ ବାହାରେ ଯାଇ ଦେଖିଲେ ଯେ, ଜଣେ ବ୍ୟକ୍ତି ତଳେ ପଡ଼ିଛନ୍ତି । ପରବର୍ତ୍ତୀ ସମୟରେ ସେ ଲିଆମ ପାଇନ ବୋଲି ଜଣାପଡିଥିଲା । ପ୍ରବଳ ନିଶା କାରଣରୁ ସେ ଭାରସାମ୍ୟ ହରାଇ ତିନି ମହଲା କୋଠାର ବାଲକୋନିରୁ ପଡ଼ି ଯାଇଥିବା ପୋଲିସ ସନ୍ଦେହ କରୁଛି । ସୂଚନାଯୋଗ୍ୟ, ୱାନ୍ ଡିରେକ୍ସନ ହେଉଛି ଲଣ୍ଡନର ଏକ ପପ୍ ବ୍ୟାଣ୍ଡ । ଲିଆମ ପାଇନ ମଧ୍ୟ ଜଣେ ବ୍ରିଟିଶ ନାଗରିକ । ସେ ପୂର୍ବରୁ ଏହି ବ୍ୟାଣ୍ଡର ଗାୟକ ଥିଲେ । ଏହି ବ୍ୟାଣ୍ଡ ୨୦୧୦ରୁ ୨୦୧୬ ପର୍ଯ୍ୟନ୍ତ ସକ୍ରିୟ ଥିଲା । କିନ୍ତୁ ଏବେ ଏହା ବନ୍ଦ ରହିଛି ।
ଲିଆମ ପାଇନ ୨୦୦୮ରେ ପ୍ରଥମେ ଟେଲିଭିଜନ୍ ସିରିଜ୍ ‘ଦି ଏକ୍ସ ଫ୍ୟାକ୍ଟର’ରେ ଅଡିସନ୍ ଦେଇଥିଲେ । ପରେ ପୁଣି ଥରେ ୨୦୧୦ରେ ସେ ଅଡିସନ୍ ଦେଇଥିଲେ । ଏହି ସମୟରେ ଅନ୍ୟ ୪ ଜଣ ଗାୟକଙ୍କ ସହ ତାଙ୍କୁ ଓ୍ବାନ ଡିରେକ୍ସନରେ ସାମିଲ ହେବାକୁ ସୁଯୋଗ ମିଳିଥିଲା । ଆଉ ଓ୍ବାନ ଡିରେକ୍ସନ ଖୁବଶୀଘ୍ର ସବୁଠୁ ଲୋକପ୍ରିୟ ବୟ ବ୍ୟାଣ୍ଡ ହୋଇପାରିଥିଲା ।
