ନୂଆଦିଲ୍ଲୀ: ବହୁ ପ୍ରତୀକ୍ଷିତ ‘ବିଜୟ ଯୋଜନା’ ଘୋଷଣା କଲେ ୟୁକ୍ରେନ ରାଷ୍ଟ୍ରପତି ଭୋଲୋଦିମିର ଜେଲେନସ୍କି । ଋଷ ସହ ଅଢ଼େଇ ବର୍ଷ ଧରି ଯୁଦ୍ଧ ଲଢୁଥିବା ୟୁକ୍ରେନର ରାଷ୍ଟ୍ରପତି ଭୋଲୋଦିମିର ଜେଲେନସ୍କି ସଂସଦରେ ନିଜର ବିଜୟ ଯୋଜନା ଘୋଷଣା କରିଛନ୍ତି । ସଂସଦରେ ବିଜୟ ଯୋଜନା ଘୋଷଣା କରି ସେ କହିଛନ୍ତି ଯେ, ଆମର ପ୍ରମୁଖ ସହଯୋଗୀ ଆମେରିକାରେ ନଭେମ୍ବର ୫ ରେ ହେବାକୁ ଥିବା ନିର୍ବାଚନ ପାଇଁ ଆମକୁ ଏକଜୁଟ ରହିବାକୁ ପଡ଼ିବ । ସେପଟେ ୟୁକ୍ରେନ୍ର ବିଜୟ ଯୋଜନାକୁ ନେଇ ଋଷ ତୀବ୍ର ପ୍ରତିକ୍ରିୟା ପ୍ରକାଶ କରିଛି । ଏବେ ଆମେରିକା ଓ ନାଟୋ ମଧ୍ୟରେ ସିଧାସଳଖ ମୁହାଁମୁହିଁ ହେବାର ସମ୍ଭାବନା ରହିଛି ବୋଲି ଋଷ କହିଛି।
ସଂସଦରେ ବିଜୟ ଯୋଜନା ଘୋଷଣା କରିବା ସମୟରେ ଜେଲେନସ୍କି କହିଛନ୍ତି, ୨୨ ଫେବୃଆରୀ ୨୦୨୨ରେ ୟୁକ୍ରେନ୍ ସହ ଋଷ ଆରମ୍ଭ କରିଥିବା ଯୁଦ୍ଧର ପରିସମାପ୍ତି ହୋଇପାରିବ । ନାଟୋରେ ସାମିଲ ହେବାକୁ ପ୍ରୟାସ, ଦୂରଗାମୀ ମିସାଇଲ୍ ଉପରୁ କଟକଣା ହଟାଇବା ସହ ଋଷର କୁର୍ସକ କ୍ଷେତ୍ରରେ ଆକ୍ରମଣ ଜାରି ରଖିବା ଆଦି ନିଜର ବିଜୟ ଯୋଜନାରେ ସାମିଲ କରିଛନ୍ତି ୟୁକ୍ରେନ୍ ରାଷ୍ଟ୍ରପତି ଜେଲେନସ୍କି । ୟୁକ୍ରେନ ରାଷ୍ଟ୍ରପତିଙ୍କ ବିଜୟ ଯୋଜନାକୁ ନେଇ କ୍ରେମଲିନ୍ କଡ଼ା ଟିପ୍ପଣୀ ଦେଇଛି । କିଭ୍ ନିଶା କମ୍ କରିବା ଦରକାର ବୋଲି କହିଛନ୍ତି କ୍ରେମଲିନ୍ ମୁଖପାତ୍ର । ସେପଟେ ସାଂସଦଙ୍କୁ ସମ୍ବୋଧନ ବେଳେ ଜେଲେନସ୍କି ଚୀନ୍, ଉତ୍ତର କୋରିଆ ଏବଂ ଇରାନକୁ ସମାଲୋଚନା କରିଛନ୍ତି । ଏହି ସବୁ ଦେଶ ‘ଅପରାଧୀଙ୍କ ମେଣ୍ଟ’ ବୋଲି ଅଭିଯୋଗ କରିଛନ୍ତି ଜେଲେନସ୍କି ।
ଅନ୍ୟ ଏକ ରିପୋର୍ଟ ଅନୁଯାୟୀ, ଜେଲେନସ୍କି ଗୁରୁବାର ନାଟୋ ପ୍ରତିରକ୍ଷା ମନ୍ତ୍ରୀଙ୍କ ବୈଠକରେ ଯୋଗ ଦେବେ । ଏହାରି ମଧ୍ୟରେ ଆମେରିକା ୟୁକ୍ରେନ ପାଇଁ ୪୨୫ ମିଲିୟନ ଡଲାରର ସାମରିକ ସହାୟତା ଘୋଷଣା କରିଛି । ଜେଲେନସ୍କି ସାଂସଦମାନଙ୍କୁ କହିଛନ୍ତି ଯେ ତାଙ୍କ ଯୋଜନାରେ ପାଞ୍ଚଟି ମୁଖ୍ୟ ପଏଣ୍ଟ ଅନ୍ତର୍ଭୁକ୍ତ । ଅନ୍ୟତମ କଥା ହେଉଛି ନାଟୋରେ ନିଃସର୍ତ୍ତ ଯୋଗ ଦେବା ଏବଂ ନିର୍ଦ୍ଦିଷ୍ଟ ଅସ୍ତ୍ରଶସ୍ତ୍ର ହାସଲ କରିବା । ଏହାର ଦାୟିତ୍ୱ ଆମ ସହଯୋଗୀଙ୍କ ଉପରେ ରହିଛି । ସେପଟେ ଆମେରିକା ରାଷ୍ଟ୍ରପତି ଜୋ ବାଇଡେନ୍ ବୁଧବାର ୟୁକ୍ରେନ୍ ରାଷ୍ଟ୍ରପତି ଜେଲେନସ୍କିଙ୍କ ସହ କଥା ହୋଇ ୪୨୫ ମିଲିୟନ ଡଲାରର ନୂତନ ସାମରିକ ସହାୟତା ପ୍ୟାକେଜ୍ ଘୋଷଣା କରିଛନ୍ତି ।