ନୂଆଦିଲ୍ଲୀ,୧୭।୧୦: ଇସ୍ରାଏଲ ଓ ହମାସ ମଧ୍ୟରେ ଯୁଦ୍ଧ ୧ ବର୍ଷରୁ ଅଧିକ ସମୟ ବିତିସାରିଛି। ଗତ ୭ ଅକ୍ଟୋବରରେ ହମାସ ପକ୍ଷରୁ ଇସ୍ରାଏଲ ଛପରେ ଆକ୍ରମଣ ପରେ ଗାଜାରେ ସଂଘର୍ଷ ଜାରି ରହିଛି। ଏବେ ଯୁଦ୍ଧଗ୍ରସ୍ତ ଗାଜାରୁ ଆସିଛି ଛାତିଥରା ଦୃଶ୍ୟ। ଏହି ଫଟୋରେ ବୁଲା କୁକୁର ମୃତଦେହ ଗୁଡିକୁ ଖାଉଥିବାର ନଜର ଆସୁଛନ୍ତି। ଗାଜାର ଜରୁରୀକାଳୀନ ସେବାର ମୁଖ୍ୟ ଫୋରେସନ୍ ଅଫାନା କହିଛନ୍ତି, ତାଙ୍କୁ ଓ ତାଙ୍କର ସହଯୋଗୀଙ୍କୁ ଉତ୍ତର ଗାଜାରେ ମୃତ ପାଲେଷ୍ଟେନୀୟଙ୍କ ମୃତଦେହ ମିଳିଛି। ଯାହାଙ୍କ ଭିତରୁ ବହୁ ଲୋକ ଶବକୁ ବୁଲା କୁକୁର ଝୁଣି ଖାଇଥିବାର ଚିହ୍ନ ରହିଛି।
ଫାରେସ୍ ଅଫାନା ସିଏନ୍ଏନ୍କୁ କହିଛନ୍ତି, ଭୋକିଲା ବୁଲା କୁକୁର ରାସ୍ତାରେ ପଡିଥିବା ଏହି ଶବକୁ ଝୁଣି ଖାଉଛନ୍ତି। ଫଳରେ ଆମେ ମୃତଦେହକୁ ଚିହ୍ନଟ କରିବା ସମ୍ଭବ ହେଉ ନାହିଁ। ସେ ଉତ୍ତର ଗାଜା ଓ ଜବାଲିୟାରେ ଇସ୍ରାଏଲର ଏୟାର ଏବଂ ଗ୍ରାଉଣ୍ଡ ଅପରେସନ୍ ଯୋଗୁଁ ମୃତଦେହର ଅନ୍ତିମ ସଂସ୍କାର ହୋଇନପାରୁଥିବା କଥା କହିଛନ୍ତି। ସେଭଳି ଇସ୍ରାଏଲ ସାବି କରିଛି ହମାସ ଆତଙ୍କୀ ଏହି ଅଞ୍ଚଳରେ ପୁଣିଥରେ ଏକାଠି ହେଉଛନ୍ତି।
ଉଲ୍ଲେଖନୀୟ ଯେ, ଗତ ବର୍ଷ ୭ ଅକ୍ଟୋବରରେ ଇସ୍ରାଏଲ ଉପରେ ହମାସ ପ୍ରଥମେ ଆକ୍ରମଣ କରିଥିଲା। ଏହି ଆକ୍ରମଣରେ ୧,୨୦୬ ଜଣଙ୍କର ମୃତ୍ୟୁ ହୋଇଥିଲା। ଏଥିରେ ଅଧିକାଂଶ ସାଧାରଣ ଲୋକ ଥିଲେ। ସେବେଠାରୁ ଇସ୍ରାଏଲର ଆକ୍ରମଣରେ ଗାଜାରେ ୪୨,୪୦୯ ଜଣଙ୍କର ମୃତ୍ୟୁ ହୋଇସାରିଲାଣି। ସେଭଳି ୯୯,୧୫୩ରୁ ଅଧିକ ଲୋକ ଆହତ ହୋଇସାରିଲେଣି।