ନୂଆଦିଲ୍ଲୀ: ନିକଟରେ ଟେସଲାର ‘We, Robot’ (ଓ୍ବି ରୋବଟ୍) ସମାରୋହର ଉଦଘାଟନ କରିଥିଲେ ଏଲନ ମସ୍କ । ଏହି ସମାରୋହରେ ମସ୍କ ଟେସଲା ରୋବଟ୍ର ପ୍ରଦର୍ଶନ କରିଥିଲେ । ଏହା ସହ ସମ୍ପୂର୍ଣ୍ଣ ସ୍ବୟଂଚାଳିତ ସାଇବର କ୍ୟାବ ଏବଂ ରୋବୋ ଭ୍ୟାନ୍କୁ ସାର୍ବଜନୀନ କରାଯାଇଥିଲା । ଏହାକୁ ନେଇ ସମଗ୍ର ବିଶ୍ବରେ ଉତ୍ସାହ ଦେଖିବାକୁ ମିଳିଥିବା ସତ୍ତ୍ୱେ ଟେସଲା ଶେୟାରରେ ଅବନିତୀ ଘଟିଛି । ଏହା ସହ ଏଲନ ମସ୍କଙ୍କ ବ୍ୟକ୍ତିଗତ ସଂପତ୍ତି ହ୍ରାସ ପାଇଛି ।
ଟେସଲା ଶେୟାର ୯ ପ୍ରତିଶତ ଖସିଆସିବା ସହ ୨୧୭.୮୦ ଡଲାର ପ୍ରତି ଶେୟାର ହୋଇଛି । ଟେସଲାର ୧୩ ପ୍ରତିଶତ ଶେୟାର ରଖିଥିବା ମସ୍କଙ୍କ ସଂପତ୍ତିରେ ୧୫ ବିଲିୟନ୍ ଡଲାର କ୍ଷତି ଦେଖିବାକୁ ମିଳିଛି । ଏହା ସତ୍ତ୍ୱେ ଦୁନିଆର ଏକ ନମ୍ବର ଧନୀ ଭାବରେ ଶୀର୍ଷ ସ୍ଥାନରେ ରହିଛନ୍ତି ମସ୍କ । ଏବେ ତାଙ୍କ ସଂପତ୍ତିର ମୂଲ୍ୟ ୨୪୦ ବିଲିୟନ୍ ଡଲାର । ତେବେ ଟେସଲାର ରୋବୋଟ୍ୟାକ୍ସି କନସେପ୍ଟ ପରେ କମ୍ପାନିର ଶେୟାର ଖସିଆସିଛି । ରୋବୋଟ୍ୟାକ୍ସି ସଂପର୍କରେ ଟେସଲା ପକ୍ଷରୁ ପର୍ଯ୍ୟାପ୍ତ ସୂଚନା ଦିଆଯାଇ ନଥିବାରୁ ଶେୟାର ହୋଲ୍ଡରଙ୍କ ବିଶ୍ବାସ ହରାଇଛି କମ୍ପାନି ।
ସେପଟେ ଖୁବଶୀଘ୍ର ଟେସଲା କାରର ମୂଲ୍ୟ ହ୍ରାସ ହେବ ବୋଲି ମସ୍କ ପ୍ରତିଶ୍ରୁତି ଦେଇଥିବା ବେଳେ ସେଭଳି କିଛି କରାଯାଇ ନାହିଁ । ଏହାକୁ ନେଇ ହିତଧାରକଙ୍କ ଗହଣରେ ଆଶଙ୍କା ବୃଦ୍ଧି ପାଇଛି । ହୁଏତ ଟେସଲା ଶେୟାର ଖସିବା ପଛରେ ଏହି ସବୁ କାରଣ ଥାଇପାରେ ବୋଲି ଚର୍ଚ୍ଚା ହେଉଛି । ଅନ୍ୟପକ୍ଷରେ ଟେସଲା ଶେୟାର ଖସିବା ନୂଆ ନୁହେଁ ।
ଗତ ଜୁଲାଇରେ We, Robot’ (ଓ୍ବି ରୋବଟ୍) ସମାରୋହ ଆୟୋଜନ କରିବାରେ ବିଳମ୍ବ ହେବାରୁ ମଧ୍ୟ କମ୍ପାନିର ଶେୟାର ତଳମୁହାଁ ହୋଇଥିଲା । ସେତେବେଳେ କମ୍ପାନିର ଶେୟାର ୭ ପ୍ରତିଶତ କମିଥିଲା । ଅଗଷ୍ଟ ପର୍ଯ୍ୟନ୍ତ ଏହି ଟ୍ରେଣ୍ଡ ଥିବା ବେଳେ ସେପ୍ଟେମ୍ବରରେ ଏଥିରେ ସାମାନ୍ୟ ସୁଧାର ଦେଖିବାକୁ ମିଳିଥିଲା । ଏହା ସତ୍ତ୍ୱେ ଏଲନ ମସ୍କଙ୍କ ସଂପତ୍ତି ମ୍ୟାକଡୋନାଲ୍ଡ ଏବଂ ପେପସି ଭଳି କମ୍ପାନିର ମୋଟ ମୂଲ୍ୟଠାରୁ ଅଧିକ ରହିଛି ।