ନୂଆଦିଲ୍ଲୀ ୧୮/୧୦: ଫେମିନା ମିସ୍‌ ଇଣ୍ଡିଆ ୱର୍ଲଡ୍‌-୨୦୨୪ ଟାଇଟଲ ଜିତିଛନ୍ତି ମଧ୍ୟପ୍ରଦେଶର ନିକିତା ପୋଡ଼ୱାଲ । ପରବର୍ତ୍ତୀ ବିଶ୍ୱ ସୁନ୍ଦରୀ ପ୍ରତିଯୋଗିତାରେ ସେ ଦେଶକୁ ପ୍ରତିନିଧିତ୍ୱ କରିବେ । ଦାଦ୍ରା ଓ ନଗର ହାବେଲୀର ରେଖା ପାଣ୍ଡେ ଫାର୍ଷ୍ଟ ରନର୍‌-ଅପ୍‌ ହୋଇଥିବା ବେଳେ ଗୁଜରାଟର ଆୟୁଷି ଢୋଲକିଆ ୨ୟ ସ୍ଥାନ ହାସଲ କରିଛନ୍ତି । ଗତ ବୁଧବାର ରାତିରେ, ମୁମ୍ବାଇର ୱର୍ଲି ସ୍ଥିତ ଫେମସ୍‌ ଷ୍ଟୁଡିଓଜ୍‌ରେ ଭାରତର ସବୁଠୁ ଲୋକପ୍ରିୟ ୬୦ତମ ଫେମିନା ମିସ୍‌ ଇଣ୍ଡିଆ-୨୦୨୪ ଫିନାଲେ ଅନୁଷ୍ଠିତ ହୋଇଥିଲା । ପ୍ରତିଯୋଗିତାରେ ୨୯ ରାଜ୍ୟ ଓ ଗୋଟିଏ କେନ୍ଦ୍ରଶାସିତ ଅଞ୍ଚଳକୁ ପ୍ରତିନିଧିତ୍ୱ କରୁଥିବା ୩୦ ପ୍ରତିଯୋଗୀ ଭାଗ ନେଇଥିଲେ ।

ଉଜ୍ଜୟିନୀ ବାସିନ୍ଦା ନିକିତା କାରମେଲ କନ୍‌ଭେଣ୍ଟ ସିନିଅର ସେକେଣ୍ଡାରୀ ସ୍କୁଲରେ ଅଧ୍ୟୟନ କରିଥିଲେ । ବର୍ତ୍ତମାନ ବଡୋଦ୍ରା ସ୍ଥିତ ମହାରାଜା ସାୟାଜିରାଓ ବିଶ୍ୱବିଦ୍ୟାଳୟରେ ସେ ଉଚ୍ଚ ଶିକ୍ଷା ଲାଭ କରୁଛନ୍ତି । ଥିଏଟରରେ ୬୦ରୁ ଅଧିକ ନାଟକରେ ଅଭିନୟ କରି କଳା ପ୍ରତି ସେ ନିଜ ଭଲପାଇବାର ପ୍ରମାଣ ଦେଇଛନ୍ତି । ‘କୃଷ୍ଣ ଲୀଲା’ ଶୀର୍ଷକ ୨୫୦ ପୃଷ୍ଠାର ଏକ ନାଟକ ମଧ୍ୟ ସେ ନିଜେ ରଚନା କରିଛନ୍ତି । ମଞ୍ଚ ଅଭିନୟ ଯଦିଓ ତାଙ୍କର ପ୍ରଥମ ପ୍ରେମ, ସିନେମାଟୋଗ୍ରାଫିରେ ନିଜ କୌଶଳର ପ୍ରସାର ଲାଗି ସେ ଅତ୍ୟନ୍ତ ଇଚ୍ଛୁକ । ଏକ ଫିଚର୍‌ ଫିଲ୍ମରେ ସେ ଅଭିନୟ କରିଛନ୍ତି, ଯାହା ଅନ୍ତର୍ଜାତୀୟ ଚଳଚ୍ଚିତ୍ର ମହୋତ୍ସବରେ ପ୍ରଦର୍ଶିତ ହୋଇଛି । ଏହା ଥିଏଟରରୁ ସିନେ ଦୁନିଆକୁ ଆସିବାର ତାଙ୍କ ଯାତ୍ରା ଉପରେ ଆଲୋକପାତ କରିଛି । ସଞ୍ଜୟ ଲୀଲା ଭଂସାଲିଙ୍କ ଭଳି ନିର୍ଦ୍ଦେଶକଙ୍କ ସହ ବଡ଼ ପ୍ରୋଜେକ୍ଟରେ କାମ କରିବାକୁ ନିକିତା ଇଚ୍ଛୁକ ।