ମୁମ୍ବାଇ ୧୮/୧୦: ବଲିଉଡ ଇଣ୍ଡଷ୍ଟ୍ରିରେ କ୍ୟାରିୟର କରିବାକୁ ସ୍ୱପ୍ନ ଦେଖନ୍ତି ଅନେକ । କିନ୍ତୁ ସଫଳତା କେବଳ ଅଳ୍ପ କେତେଜଣଙ୍କ ପାଦ ଚୁମିଥାଏ । ଆଜି ଆମେ ଆପଣଙ୍କୁ ଏପରି ଜଣେ ଅଭିନେତାଙ୍କ ବିଷୟରେ କହିବୁ, ଯିଏକି ଦିନେ ବିକ୍ରି କରୁଥିଲେ ଆମ୍ବ, କିନ୍ତୁ ତାଙ୍କ ଭାଗ୍ୟରେ ଲେଖା ଥିଲା ଆଉ କିଛି। ସେ ବଲିଉଡକୁ ଆସିଲେ ଆଉ ତାଙ୍କ ଉତ୍କୃଷ୍ଟ ଅଭିନୟ ସହିତ ଇଣ୍ଡଷ୍ଟ୍ରିରେ ଛାଇଗଲେ। କିନ୍ତୁ ତା’ପରେ ହଠାତ୍ ଏହି ଅଭିନେତା ଫିଲ୍ମ ଦୁନିଆନରୁ ହୋଇଗଲେ ଗାଏବ । ଆଜି ଜଣେ ସେ ବଡ ବ୍ୟବସାୟୀ ହେବା ବ୍ୟତୀତ ଅମିତାଭ ବଚ୍ଚନଙ୍କ ଜ୍ୱାଇଁ। ଏହି ଅଭିନେତା ହେଉଛି କୁନାଲ କପୁର। ଯିଏ ଆଜି ତାଙ୍କର ୪୭ ତମ ଜନ୍ମଦିନ ପାଳନ କରୁଛନ୍ତି।
୨୦୦୪ ମସିହାରେ କୁନାଲ କପୁର 'ମୀନାକ୍ଷୀ: ଏକ ଟେଲ ଅଫ୍ ଥ୍ରୀ ସିଟିଜ୍' ଫିଲ୍ମରୁ ବଲିଉଡ ଡେବ୍ୟୁ କରିଥିଲେ। ଏହି ଫିଲ୍ମରେ ସେ ତବୁଙ୍କ ସହ ମୁଖ୍ୟ ଭୂମିକାରେ ନଜର ଆସିଥିଲେ। ଏହା ପରେ ୨୦୦୬ ରେ ତାଙ୍କୁ ସୁପରହିଟ୍ 'ରଙ୍ଗ ଦେ ବସନ୍ତୀ'ରେ ଦେଖିବାକୁ ମିଳିଥିଲା, ଯାହା ତାଙ୍କୁ ଇଣ୍ଡଷ୍ଟ୍ରିରେ ଏକ ଭିନ୍ନ ପରିଚୟ ଦେଇଥିଲା। ଏହା ପରେ କୁନାଲଙ୍କୁ 'ଲଗା ଚୁନରି ମେଁ ଦାଗ୍', 'ଆଜା ନଚଲେ', 'ବଚ୍ଚନା ଏ-ହସିନୋ' ଭଳି ଅନେକ ଫିଲ୍ମରେ ଦେଖିବାକୁ ମିଳିଥିଲା। କିନ୍ତୁ ସେ ଅଧିକ ସଫଳତା ହାସଲ କରିନଥିଲେ ତେଣୁ ଅଭିନେତା ଧୀରେ ଧୀରେ ସିନେମାଠାରୁ ଦୂରେଇ ଗଲେ। ଏହା ପରେ ସେ ବ୍ୟବସାୟରେ ଭାଗ୍ୟ ପରୀକ୍ଷା କଲେ। ଆଜି କୁନାଲ ଟପ୍ କ୍ରାଉଡ୍-ଫଣ୍ଡିଂ ପ୍ଲାଟଫର୍ମ କେଟ୍ଟୋର ସହ-ପ୍ରତିଷ୍ଠାତା, ଯାହା ସେ ୨୦୧୨ ରେ ପ୍ରତିଷ୍ଠା କରିଥିଲେ।
ଖୁବ୍ କମ୍ ଲୋକ ଜାଣନ୍ତି ଯେ କୁନାଲ ୨୦୧୫ ମସିହାରେ ଅମିତାଭ ବଚ୍ଚନଙ୍କ ସାନଭାଇ ଅଜିତାଭ ବଚ୍ଚନଙ୍କ ଝିଅ ନୈନା ବଚ୍ଚନଙ୍କୁ ବିବାହ କରିଥିଲେ। ତାଙ୍କ କ୍ୟାରିୟର ବିଷୟରେ କହିବାକୁ ଗଲେ ଅଭିନେତାଙ୍କୁ ଶେଷ ଥର ପାଇଁ ୨୦୨୧ ଫିଲ୍ମ ‘ଅନକହୀ କାହାନିଆ’ରେ ଦେଖିବାକୁ ମିଳିଥିଲା, ଯାହା ନେଟଫ୍ଲିକ୍ସରେ ରିଲିଜ୍ କରିଥିଲା । ଏହା ବ୍ୟତୀତ ତାଙ୍କୁ ୨୦୨୧ ଫିଲ୍ମ ‘କୋଇ ଜାନେ ନା’ ରେ ମଧ୍ୟ ଦେଖିବାକୁ ମିଳିଥିଲା । ସେବେଠାରୁ ବର୍ତ୍ତମାନ ପର୍ଯ୍ୟନ୍ତ କୁନାଲଙ୍କୁ କୌଣସି ଫିଲ୍ମରେ ଦେଖିବାକୁ ମିଳିନାହିଁ। କିନ୍ତୁ ବର୍ତ୍ତମାନ ଆଲୋଚନା ହେଉଛି ଯେ ନୀତୀଶ ତିୱାରୀଙ୍କ ନିର୍ଦ୍ଦେଶିତ ଫିଲ୍ମ ରାମାୟଣରେ ଅଭିନେତା ରଣବୀର କପୁରଙ୍କ ସହ କୁନାଲ ନଜର ଆସିବେ।
