ନୂଆଦିଲ୍ଲୀ: ଡିସେମ୍ବର ୪ରେ ହାଇଦ୍ରାବାଦରେ ହୋଇଥିବା ଦଳାଚକଟା ଘଟଣାକୁ ନେଇ ଆସିଛି ଏକ ରୋଚକ ଖବର। ପୁଷ୍ପା-୨ର ଚଳଚ୍ଚିତ୍ର ନିର୍ମାତା ମିଥ୍ରୀ ମୋଭିର କାର୍ଯ୍ୟକର୍ତ୍ତା ମାନେ ଏହି ଦୁର୍ଘଟଣାରେ ଶିକାର ହୋଇ ମୃତ୍ୟୁ ଘଟିଥିବା ରେବତୀଙ୍କ ପରିବାରଙ୍କୁ ଆର୍ଥିକ ସହାୟତା ପ୍ରଦାନ କରିଛନ୍ତି। ଏହି ଦୁର୍ଘଟଣାରେ ରେବତୀ ମୃତ୍ୟୁବରଣ କରିଥିବା ବେଳେ ତାଙ୍କ ୮ ବର୍ଷର ପୁଅ ଗୁରୁତର ଆହତ ହୋଇଥିଲେ। ତାଙ୍କ ପୁଅ ବର୍ତ୍ତମାନ ହାଇଦ୍ରାବାଦର ଏକ ସୁପର ସ୍ପେଶାଲିଟି ଡାକ୍ତରଖାନାରେ ଚିକିତ୍ସିତ ହେଉଛନ୍ତି।
ନିକଟରେ ଜାରି ହୋଇଥିବା ଏକ ଭିଡିଓରେ ପୁଷ୍ପା-୨ ଚଳଚ୍ଚିତ୍ରର ପ୍ରଯୋଜକ ନବିନ ୟେରନ୍ନେନୀ, ରେବତୀଙ୍କ ପରିବାରକୁ ୫୦ ଲକ୍ଷ ଟଙ୍କାର ଏକ ଚେକ୍ ଦେଉଥିବା ଦେଖାଯାଇଛି। ମନ୍ତ୍ରୀ କୋମତୀ ରେଡ୍ଡିଙ୍କ ସହ ନବିନ ୟେରନ୍ନେନୀ ଦଳାଚକଟାରେ ଗୁରୁତର ଆହାତ ହୋଇ କିମ୍ ହସ୍ପିଟାଲରେ ଚିକିତ୍ସିତ ହେଉଥିବା ଶ୍ରୀ ତେଜଙ୍କୁ ଭେଟିବାକୁ ଯାଇଥିଲେ। ଡାକ୍ତରଖାନାରୁ ଫେରିବା ପୂର୍ବରୁ ସେ ଏହି ଚେକ୍ ଟିକୁ ରେବତୀଙ୍କ ସ୍ୱାମୀ ଭାସ୍କରଙ୍କୁ ଦେଇଥିଲେ।
ଅଲ୍ଲୁ ଅର୍ଜୁନ ଶ୍ରୀ ତେଜ ଓ ତାଙ୍କ ପରିବାର ପାଇଁ ୨୫ ଲକ୍ଷ ଟଙ୍କାର ଆର୍ଥିକ ସହାୟତା ଯୋଗାଇ ଦେଇଥିଲେ। ଚଳଚ୍ଚିତ୍ରର ନିର୍ଦ୍ଦେଶକ ସୁକୁମାର ଓ ତାଙ୍କ ପତ୍ନୀ ତବିଥା ମଧ୍ୟ ୫ ଲକ୍ଷ ଟଙ୍କାର ଆର୍ଥିକ ସହାୟତା କରିଥିଲେ। ଅନ୍ୟପଟେ ପ୍ରଡ୍ୟୁସର ଅଲ୍ଲୁ ଅରବିନ୍ଦ ଓ ବନ୍ନି ଭାସୁଲୁ ବାକି ୨୦ ଲକ୍ଷ ଟଙ୍କାର ସହଯୋଗ କରିଥିଲେ।
ଦଳାଚକଟା ପରେ ଅଲୁ ଅର୍ଜୁନଙ୍କୁ ତେଲେଙ୍ଗାନା ପୋଲିସ ଗିରଫ କରିଥିଲା। କିନ୍ତୁ ସେହି ଦିନ ତେଲେଙ୍ଗାନା ହାଇକୋର୍ଟ ତାଙ୍କୁ ଚାରି ସପ୍ତାହ ପାଇଁ ମଧ୍ୟବର୍ତ୍ତୀକାଳୀନ ଜାମିନ ପ୍ରଦାନ କରିଥିଲେ। ଭାରତୀୟ ନ୍ୟାୟ ସଂହିତା (ବିଏନ୍ଏସ୍)ର ଅଧୀନରେ ଅଲ୍ଲୁ, ତାଙ୍କ ସୁରକ୍ଷା ଦଳ ଏବଂ ଥିଏଟର ପରିଚାଳନା ବିରୋଧରେ ଏକ ମାମଲା ରୁଜୁ କରାଯାଇଥିଲା।
